.jpg)
អាជ្ញាធរខេត្តពោធិ៍សាត់ព្រមានចាត់វិធានការទៅលើប្រជាពលរដ្ឋ ៣១ គ្រួសារ ដែលមកតាំងទីលំនៅដោយខុសច្បាប់ដោយរំលោភកាន់កាប់ដីប្រមាណជា ១០០ ហិកតា។ សហការី
ពោធិ៍សាត់: អាជ្ញាធរខេត្តពោធិ៍សាត់ព្រមានចាត់វិធានការទៅលើប្រជាពលរដ្ឋ ៣១ គ្រួសារ ដែលមកតាំងទីលំនៅដោយខុសច្បាប់ដោយរំលោភកាន់កាប់ដីប្រមាណជា ១០០ ហិកតា នៅក្នុងដែនជម្រកសត្វព្រៃភ្នំសំកុសនៅក្នុងភូមិស្ទឹងថ្មី ស្រុកវាលវែងដោយដាក់ឱសានវាទត្រឹមថ្ងៃទី ១៨ ខែវិច្ឆិកាសប្ដាហ៍ក្រោយនេះ។ នេះបើយោងតាមលិខិតជូនដំណឹងរបស់មន្ទីរបរិស្ថានខេត្តពោធិ៍សាត់ចុះថ្ងៃទី ៨ ខែវិច្ឆិកាដែលភ្នំពេញប៉ុស្ដិ៍ទើបទទួលបាន។
លិខិតជូនដំណឹងនេះបានឲ្យដឹងថា ប្រជាពលរដ្ឋចំនួន ៣១ គ្រួសារ ដែលកំពុងមកតាំងទីលំនៅ និងកាប់គាស់រុករាន ឈូសឆាយដីព្រៃ ព្រមទាំងបោះបង្គោលរបងហ៊ុមព័ទ្ធដីក្នុងសហគមន៍តំបន់ការពារធម្មជាតិភូមិស្ទឹងថ្មីនៃដែនជម្រកសត្វព្រៃភ្នំសំកុស ស្រុកវាលវែង ត្រូវបានការពារដោយព្រះរាជក្រឹត្យ ដែលមានក្រសួងបរិស្ថានជាសមត្ថកិច្ចគ្រប់គ្រង និងបានបង្កើតជាសហគមន៍តំបន់ការពារធម្មជាតិស្ទឹងថ្មី ដើម្បីថែរក្សារួចរាល់ហើយ។ ដូចនេះការមកតាំងទីលំនៅនេះ ផ្ទុយពីច្បាប់ស្តីពីតំបន់ការពារធម្មជាតិទាំងស្រុង។
លិខិតដដែលនេះបានឲ្យដឹងថា៖ «ដោយទុករយៈពេល ៧ ថ្ងៃសម្រាប់បងប្អូនប្រជាពលរដ្ឋចំនួន ៣១ គ្រួសារ ធ្វើការរុះរើក្រោលគោ ពពែ ខ្ទម ផ្ទះ ៣៥ ខ្នង បង្គោលរបង និងដំណាំផ្សេងៗយកទៅសាងសង់នៅទីតាំងផ្សេងដោយខ្លួនឯងចាប់ពីថ្ងៃទី ១១ ខែវិច្ឆិកា ឆ្នាំ ២០១៩ រហូតដល់ថ្ងៃទី ១៨ ខែវិច្ឆិកា ឆ្នាំ ២០១៩ ជាកំណត់»។ «ដល់ថ្ងៃផុតកំណត់ក្នុងសេចក្តីជូនដំណឹងនេះ មន្ទីរបរិស្ថានខេត្តនឹងចាត់វិធានចុះរុះរើដោយមិនទទួលខុសត្រូវលើការបាត់បង់ និងការខូចខាតផ្សេងៗនោះទេក្នុងករណីបងប្អូនប្រជាពលរដ្ឋណាដែលរឹងរូស ឬប្រឆាំងតបតដោយហិង្សានឹងត្រូវទទួលទោសតាមច្បាប់ជាធរមាន»។
ទោះយ៉ាងណាក៏ដោយក្នុងលិខិតដដែលបានឲ្យដឹងដែរថា កន្លងមកមន្ទីរបរិស្ថានខេត្តពោធិ៍សាត់បានសម្របសម្រួលឲ្យពួកគាត់រុះរើ និងទៅតាំងទីលំនៅកន្លែងផ្សេងជាច្រើនលើកមកហើយ។ ដូចនេះដើម្បីថែរក្សាព្រៃឈើ និងដីសហគមន៍តំបន់ការពារធម្មជាតិដែលជាប្រភពធនធានធម្មជាតិដ៏សំខាន់បំផុតសម្រាប់បម្រើដល់ជីវភាពសមាជិកសហគមន៍ និងប្រជាពលរដ្ឋស្របច្បាប់ក្នុងស្រុកវាលវែងទាំងមូល មន្ទីរបរិស្ថានខេត្តពោធិ៍សាត់នឹងចាត់វិធានការរដ្ឋបាលបោសសម្អាតទីលំនៅមិនស្របច្បាប់ក្នុងសហគមន៍តំបន់ការពារធម្មជាតិនេះ។
លោក ប៉ាន់ មរកត ប្រធានមន្ទីរបរិស្ថានខេត្តពោធិ៍សាត់បានថ្លែងថា៖ «រហូតមកដល់ពេលនេះ ពួកគាត់មិនទាន់បានរុះរើនៅឡើយ ហើយក៏មិនមានប្រតិកម្មអ្វីពីពួកគាត់ដែរ ប៉ុន្ដែអាជ្ញាធរបានផ្ដល់ឱសានវាទចាប់ពីថ្ងៃទី ១១ ខែវិច្ឆិកា ឆ្នាំ ២០១៩ រហូតដល់ថ្ងៃទី ១៨ ខែវិច្ឆិកា ឆ្នាំ ២០១៩ ជាកំណត់»។ «អាជ្ញាធរបានពន្យល់ណែនាំពួកគាត់អំពីនីតិវិធីច្បាប់នៃការមកចាប់ដី និងទន្ទ្រានដីព្រៃតំបន់ការពារនេះរហូតចាប់តាំងពីឆ្នាំ ២០១៧ ខណៈដែលពួកគាត់មកតាំងទីលំនៅដំបូងម្ល៉េះ ហើយក៏បានជូនដំណឹងជាច្រើនលើកទៀត ប៉ុន្ដែពួកគាត់នៅតែមិនបានគោរពតាមការណែនាំនេះទេ»។
លោក មរកត បានឲ្យដឹងថា តំបន់នោះមានប្រជាពលរដ្ឋចំនួន ៧ គ្រួសារដែលរស់នៅស្របច្បាប់ ហើយត្រូវបានអាជ្ញាធរអនុញ្ញាតឲ្យពួកគាត់ចងក្រងគ្នាធ្វើជាសហគមន៍ ដើម្បីការពារតំបន់ធម្មជាតិសំកុសនេះ ប៉ុន្ដែនៅឆ្នាំ ២០១៧ នេះមានពលរដ្ឋចំណាកស្រុកពីខេត្តបាត់ដំបង ប៉ៃលិន ព្រៃវែង និងខេត្តមួយចំនួនទៀតសរុបប្រមាណ ៣១ គ្រួសារនាំគ្នាចាប់ដី កាប់ទន្ទ្រានដីព្រៃការពារធម្មជាតិសំកុសប្រមាណជាង ១០០ ហិកតាធ្វើជាកម្មសិទ្ធិផ្ទាល់ខ្លួន។
លោក មរកត បញ្ជាក់ថា៖ «កន្លងមកយើងបានអនុវត្តច្បាប់ចាប់បានមេខ្យល់ប្រមាណ ៦ នាក់រួចហើយ ដោយដាក់ពន្ធនាគារដែលពួកគាត់តាំងខ្លួនជាអ្នកគ្រប់គ្រងតំបន់នោះ ដោយមានដីកាពីតុលាការចាប់ខ្លួនប៉ុន្មានខែនេះ ព្រោះពួកគាត់តែងតែដឹកនាំពលរដ្ឋទៅចាប់ដីកន្លែងនេះ កន្លែងនោះជាច្រើនកន្លែងទៀត។ ឥឡូវយើងប្រាប់ឲ្យពលរដ្ឋទាំង ៣១ គ្រួសារនេះ ត្រូវរុះរើចេញពីតំបន់ការពារ»។ភ្នំពេញប៉ុស្ដិ៍ពីម្សិលមិញមិនទាន់អាចស្វែងរកប្រភពទាក់ទងទៅប្រជាពលរដ្ឋដែលរងការចោទប្រកាន់ថាមករស់នៅខុសច្បាប់នៅតំបន់នេះបានទេ។
លោក សំ ចាន់គា មន្ត្រីសម្របសម្រួលផ្នែកសិទ្ធិមនុស្សប្រចាំខេត្តពោធិ៍សាត់ និងខេត្តកំពង់ឆ្នាំងបានថ្លែងពីម្សិលមិញថា លោកគាំទ្រចំណាត់ការរបស់អាជ្ញាធរ ប្រសិនបើពួកគាត់ពិតជាមករស់នៅក្នុងតំបន់ការពារមែន ប៉ុន្ដែលោកជំរុញឲ្យអាជ្ញាធរត្រូវតែដោះស្រាយ និងស្រាវជ្រាវឲ្យបានច្បាស់លាស់ថា តើពួកគាត់ពិតជាពលរដ្ឋក្រីក្រគ្មានទីពឹងមែន ឬយ៉ាងណា?។
លោកបន្តថា បើពួកគាត់ពិតជាអ្នកក្រីក្រមែន អាជ្ញាធរត្រូវតែចែកដី ឬរកទីតាំងណាដែលមិនប៉ះពាល់តំបន់ការពារ ដោយបង្វែរជាដីសង្គមកិច្ច ហើយកាត់ចែកពួកគាត់ ព្រោះបើបណ្ដេញពួកគាត់ចេញទាំងបង្ខំដោយគ្មានកន្លែងរស់នៅនោះនឹងធ្វើឲ្យប៉ះពាល់ដល់ជីវភាពធ្ងន់ធ្ងរ និងអាចជាការរំលោភសិទ្ធិមនុស្សទៀតផង។
លោក នេត្រ ភក្ដ្រា អ្នកនាំពាក្យក្រសួងបរិស្ថានធ្លាប់បានឲ្យដឹងថា ដើម្បីទប់ស្កាត់នូវរូបភាពការទន្ទ្រានកាន់កាប់ដីធ្លីក្នុងតំបន់ការពារធម្មជាតិ ក្រសួងបរិស្ថានដោយសហការជាមួយក្រសួងស្ថាប័នមានសមត្ថកិច្ច និងរដ្ឋបាលថ្នាក់ក្រោមជាតិពាក់ព័ន្ធ ចាត់វិធានការយ៉ាងម៉ឺងម៉ាត់ ដើម្បីទប់ស្កាត់ និងបង្ក្រាបរាល់សកម្មភាពល្មើសដូចបានរៀបរាប់ខាងលើដោយផ្អែកលើនីតិវិធីច្បាប់ជាធរមាន៕
