.jpg)
សាលាស្រុកបារាយណ៍ដែលត្រូវដកឃុំខ្លះទៅស្រុកថ្មី។ ហ្វេសប៊ុក
កំពង់ធំ: រាជរដ្ឋាភិបាលកម្ពុជាបានសម្រេចបង្កើតស្រុកថ្មីមួយក្នុងខេត្តកំពង់ធំដែលមានឈ្មោះថា «ស្រុកតាំងគោក» ដោយកាត់យកឃុំចំនួន ៨ ចេញពីស្រុកបារាយណ៍ជាអ្វីដែលមន្ត្រីអះអាងថា ដើម្បីសម្រួលដល់ការគ្រប់គ្រងប្រព័ន្ធរដ្ឋបាល ប៉ុន្ដែសង្គមស៊ីវិលយល់ថា គួរពង្រឹងការផ្ដល់សេវាសាធារណៈវិញ ល្អជាងបង្កើតស្រុកថ្មី។
តាមអនុក្រឹត្យដែលចុះហត្ថលេខាដោយលោកនាយករដ្ឋមន្ត្រី ហ៊ុន សែន កាលពីថ្ងៃទី ៨ មករា ឆ្នាំ ២០១៩ ដែលភ្នំពេញប៉ុស្ដិ៍ទើបទទួលបានពីម្សិលមិញបានបង្ហាញថា៖ ត្រូវបង្កើត «ស្រុកតាំងគោក» នៃខេត្តកំពង់ធំ ដោយកាត់យកឃុំចំនួន ៨ ពីស្រុកបារាយណ៍រួមមាន ឃុំពង្រ ឃុំច្រនាង ឃុំជ្រលង ឃុំទ្រៀល ឃុំសូយោង ឃុំស្រឡៅ ឃុំស្វាយភ្លើង និងឃុំអណ្តូងពោធិ៍។ ព្រំប្រទល់រដ្ឋបាល ស្រុកតាំងគោក ត្រូវបានកំណត់ដូចមានក្នុងផែនទីជាឧបសម្ព័ន្ធនៃអនុក្រឹត្យនេះ។
អនុក្រឹត្យបន្តថា ស្រុកតាំងគោក ដែលមានឃុំចំនួន៨ ដូចបានរៀបរាប់ខាងលើនឹងត្រូវបានជ្រើសយកឃុំសូយោង ធ្វើជាទីតាំងសាលាស្រុក។ ការរៀបចំរចនាសម្ព័ន្ធ និងប្រព័ន្ធគ្រប់គ្រងរដ្ឋបាលស្រុកតាំងគោកត្រូវអនុលោមតាមច្បាប់ស្ដីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក និងខណ្ឌ។
លោក សុខ លូ អភិបាលខេត្តកំពង់ធំបានថ្លែងកាលពីម្សិលមិញថា ការបង្កើតស្រុកថ្មីនេះ គឺជាតម្រូវការថ្នាក់មូលដ្ឋាន ព្រោះប្រព័ន្ធរដ្ឋបាលក្នុងស្រុកបារាយណ៍កន្លងមកមានទំហំធំជាហេតុធ្វើឲ្យពិបាកដល់ពលរដ្ឋដែលនៅឆ្ងាយពីសាលាស្រុកសព្វថ្ងៃ ហើយត្រូវការសេវាសាធារណៈផ្សេងៗពីមន្ត្រីសាលាស្រុក។
លោកបញ្ជាក់ថា៖ «ខ្ញុំថា ល្អមែនទែន ព្រោះស្រុកបារាយណ៍យើងសព្វថ្ងៃនេះ វាមានទំហំធំណាស់ បារាយណ៍មួយហ្នឹងស្ទើរតែធំជាងខេត្តខ្លះផង។ស្រុកបារាយណ៍ហ្នឹងវាមាន ១៨ ឃុំ បើយើងកាត់មកស្រុកតាំងគោក ៨ ឃុំ អ៊ីចឹងនៅស្រុកបារាយណ៍សល់ ១០ ឃុំ អ៊ីចឹងវាសមល្មមក្នុងការគ្រប់គ្រងរដ្ឋបាល និងងាយស្រួលដល់ពលរដ្ឋមកទទួលសេវាសាធារណៈដែរ»។
លោកបន្ថែមថា ទីតាំងសាលាស្រុកបារាយណ៍រក្សានៅដដែល ហើយទីតាំងសាលាឃុំសូយោង នឹងយកមកជាកន្លែងសាលាស្រុកតាំងគោក។
ចំពោះអ្នករិះគន់ការបង្កើតស្រុកថ្មីនេះ លោកថា វាជាការគិតបែបអវិជ្ជមាន និងមិនយល់ពីការលំបាករបស់ពលរដ្ឋឬមិនយល់ពីការលំបាកក្នុងការគ្រប់គ្រងរដ្ឋបាលសាធារណៈ។
យ៉ាងណាក្ដី លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជា (ANSA) យល់ឃើញថា ការបង្កើតខេត្តឬស្រុកថ្មីៗនេះ គេតែងឃើញមន្ត្រីអះអាងថាដើម្បីផ្ដល់ភាពងាយស្រួលដល់ពលរដ្ឋក្នុងការទទួលសេវាសាធារណៈនិងងាយស្រួលគ្រប់គ្រងរដ្ឋបាល ប៉ុន្ដែហេតុផលទាំងនេះ មិនចាំបាច់ទៅបំបែកស្រុកទេ ដោយគ្រាន់តែពង្រឹងភាពជាអ្នកដឹកនាំរបស់មន្ត្រី និងជំរុញមន្ត្រីធ្វើការឲ្យសកម្មជាមួយពលរដ្ឋជាការស្រេច។
លោកបញ្ជាក់ថា៖ «សម្រាប់ខ្ញុំ ខ្ញុំថា វាមិនចាំបាច់បង្កើតថ្មីអ្វីទេ បើយើងចង់ឲ្យការគ្រប់គ្រងមានប្រសិទ្ធភាពគឺយើងត្រូវពង្រឹងសមត្ថភាពមន្ត្រីពាក់ព័ន្ធឬធនធានមនុស្ស ហើយបែងចែកថវិកាតាមតម្រូវការជំរុញរដ្ឋបាលស្រុកបង្កើនភាពម្ចាស់ការ និងលើកផែនការតាមតម្រូវការចាំបាច់ទៅបានហើយ»។
លោកបន្តថា ការបង្កើតនេះ គេមើលឃើញថាជាការចែកកៅអីឬតួនាទីគ្នា និងចំណាយថវិកាជាតិខ្ជះខ្ជាយប៉ុណ្ណោះ។ ម្យ៉ាងទៀតក៏ត្រូវចំណាយពេលរៀបចំផ្នែករដ្ឋបាលគ្រប់លំដាប់ថ្នាក់ផងដែរ បើគេពង្រឹងនូវអ្វីដែលមានស្រាប់ វាអាចនឹងមិនសូវចំណាយថវិកាជាតិច្រើន។
លោកនាយករដ្ឋមន្ត្រី ហ៊ុន សែន នៅថ្ងៃទី ៥ តុលា ឆ្នាំមុន ធ្លាប់បានបញ្ជាឱ្យក្រសួងមហាផ្ទៃបញ្ឈប់ការសិក្សាបង្កើតខេត្តថ្មីដែលគ្រោងបំបែកចេញពីខេត្តកណ្ដាល និងខេត្តមណ្ឌលគិរីក្រោយពេលដំណឹងនេះត្រូវបានផ្សព្វផ្សាយសាធារណៈ។
លោកបានថ្លែងថា៖ «ថ្ងៃនេះ ខ្ញុំសុំបញ្ចប់ការសិក្សាអំពីការបែងចែកខេត្តកណ្ដាល និងខេត្តមណ្ឌលគិរីឲ្យបញ្ចប់ការសិក្សាទាំងអស់ គ្មានបង្កើតខេត្តថ្មីអីបន្ថែមទេ ហេតុអី កាលពីយើងធ្វើខេត្តត្បូងឃ្មុំវាស្ងាត់ឈឹង រហូតដល់ចេញព្រះរាជក្រឹត្យបង្កើតខេត្ត ទើបបានយើងផ្សាយចេញមកក្រៅ ប៉ុន្ដែលើកនេះ ចំណារចេញពីនាយករដ្ឋមន្ត្រីមកបែកធ្លាយចេញអស់អាលីង...»។
គួររំឭកថា បច្ចុប្បន្នខេត្តកំពង់ធំស្ថិតនៅចំកណ្តាលផ្ទៃប្រទេស កម្ពុជា មានផ្ទៃដីសរុប ១៣ ៨១៤ គីឡូម៉ែត្រការ៉េ ដោយបែងចែកជា ៨ ស្រុក-ក្រុង, ៨១ ឃុំ-សង្កាត់ និង ៧៣៤ ភូមិ។ដោយបូកបន្ថែមស្រុកទើបបង្កើតថ្មីនេះ ដូច្នេះស្រុក-ក្រុង ខេត្តកំពង់ធំបានកើនដល់ ៩ រួមមាន៖ ក្រុងស្ទឹងសែន, ស្រុកបារាយណ៍, ស្រុកកំពង់ស្វាយ, ស្រុកប្រាសាទបល្ល័ង្ក, ស្រុកប្រាសាទសំបូរ, ស្រុកសណ្ដាន់, ស្រុកសន្ទុក, ស្រុកស្ទោង និងស្រុកតាំងគោក៕
(កែសម្រួល ព្រុំ ភ័ក្ត្រ)
