ភ្នំពេញៈ រដ្ឋាភិបាលចិននឹងផ្តល់ជំនួយវ៉ាក់សាំងបង្ការជំងឺកូវីដ ១៩ ជំហានទី២ ចំនួន ៤០ ម៉ឺនដូសបន្ថែមទៀត ដែលនឹងត្រូវមកដល់កម្ពុជាមុនចូលឆ្នាំប្រពៃណីខ្មែរ ខណៈក្រសួងសុខាភិបាលបានប្រកាសរកឃើញអ្នកឆ្លងថ្មីចំនួន ១៥ នាក់ ដែលនាំឱ្យតួលេខអ្នកឆ្លងសរុបនៅក្នុងប្រទេសមានជាង ៨០០ នាក់ គិតត្រឹមថ្ងៃទី ១ ខែមីនា។
កាលពីថ្ងៃទី ៧ កុម្ភៈ វ៉ាក់សាំងបង្ការជំងឺកូវីដ ១៩ Sinopharm ជំហានទី១ ចំនួន ៦០ ម៉ឺនដូសនៃចំនួនវ៉ាក់សាំង ១ លានដូស ដែលជាជំនួយរបស់ចិនត្រូវបានបញ្ជូនមកដល់កម្ពុជា។ បន្ទាប់មក រដ្ឋាភិបាលក៏បានបើកយុទ្ធនាការចាក់វ៉ាក់សាំងបង្ការជំងឺកូវីដ ១៩ នេះជាលើកដំបូងចាប់តាំងពីថ្ងៃទី ១០ ខែកុម្ភៈ មក។
ស្ថានទូតចិនប្រចាំនៅកម្ពុជាបានសរសេរនៅលើហ្វេសប៊ុកផ្លូវការរបស់ខ្លួន នៅថ្ងៃទី ១ ខែ មីនាថា រដ្ឋាភិបាលចិនបានសម្រេចផ្តល់ជំនួយវ៉ាក់សាំងបង្ការជំងឺកូវីដ ជំហានទី២ ចំនួន ៤០ ម៉ឺនដូសទៀតដល់កម្ពុជា។
ស្ថានទូតនេះបានបញ្ជាក់ថា៖ «ដើម្បីជួយដល់ប្រជាពលរដ្ឋកម្ពុជាដែលជាបងប្អូនរបស់ចិនក្នុងការទប់ស្កាត់នឹងវីរុសកូវីដ ១៩ រដ្ឋាភិបាលចិនសម្រេចផ្តល់ជំនួយឥតសំណងជំហានទី២ ជាវ៉ាក់សាំងកូវីដ ១៩ ចំនួន ៤០ ម៉ឺនដូស ជូនដល់ភាគីកម្ពុជា»។
ពាក់ព័ន្ធនឹងការប្រកាសនេះលោក ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជាបានប្រាប់កាសែតក្នុងស្រុកកាលពីម្សិលមិញថា ជំនួយរបស់ចិនក្នុងជំហានទី២ តាមរយៈក្រសួងការពារជាតិនេះនឹងមកដល់កម្ពុជានៅមុនបុណ្យចូលឆ្នាំប្រពៃណីខ្មែរ ដើម្បីបន្តការចាក់ជូនដល់ពលរដ្ឋខ្មែរបន្ថែមទៀត។
លោកបានបញ្ជាក់ថា៖ «វ៉ាក់សាំងដែលចិនផ្តល់ជំនួយមកកម្ពុជានេះគឺជាវ៉ាក់សាំងបង្ការជំងឺកូវីដ ១៩ ប្រភេទស៊ីណូហ្វាម»។
លោកស្រី លី អាយលែន (Li Ailan) តំណាងអង្គការសុខភាពពិភពលោកប្រចាំកម្ពុជាបានលើកឡើងនៅលើបណ្តាញ Twitter កាលពីម្សិលមិញថា វ៉ាក់សាំងបង្ការជំងឺកូវីដ ១៩ គឺជាផ្នែកដ៏មានសារៈសំខាន់ក្នុងការទប់ស្កាត់ការរីករាលដាល ខណៈដែលបច្ចុប្បន្នប្រទេសកម្ពុជា កំពុងឆ្លើយតបនឹងជំងឺកូវីដ ១៩ ជាមួយនឹងគ្រប់វិធានការសុខភាពសាធារណៈដែលមានប្រសិទ្ធភាព។
លោកស្រីបញ្ជាក់ថា៖ «វ៉ាក់សាំងកូវីដ ១៩ ដែលមានសុវត្ថិភាព និងប្រសិទ្ធភាព ផ្តល់ជាឧបករណ៍ដ៏មានសារៈសំខាន់ក្នុងការឆ្លើយតបនឹងជំងឺកូវីដ ១៩។ វ៉ាក់សាំងទាំងនេះជួយកាត់បន្ថយការឆ្លងរីករាលដាលជួយព្យាបាល និងជួយសង្គ្រោះអាយុជីវិតមនុស្ស»។
ក្រៅពីទទួលវ៉ាក់សាំងពីប្រទេសចិន កម្ពុជាក៏នឹងត្រៀមខ្លួនទទួលវ៉ាក់សាំងអាស្ត្រាហ្សឺណិកា (AstraZeneca/SII) ចំនួន ៣២៤ ០០០ ដូស តាមយន្តការកូវ៉ាក់នៅល្ងាចថ្ងៃទី ២ ខែមីនា ដើម្បីតៀមចាក់ជូនប្រជាពលរដ្ឋនៅថ្ងៃទី ៤ ខែមីនា ក្នុងនោះក៏មានលោកនាយករដ្ឋមន្ត្រី ហ៊ុន សែន ផងដែរ ប្រសិនបើពុំមានការប្រែប្រួល។
យោងតាមសេចក្ដីប្រកាសព័ត៌មានចេញផ្សាយដោយនាយកដ្ឋានប្រយុទ្ធនឹងជំងឺឆ្លងបានឱ្យដឹងថា មានបុគ្គលវិជ្ជមានកូវីដ ១៩ ម្នាក់ធ្លាប់បានចូលផ្សារម៉ាក្រូភ្នំពេញវេលាម៉ោង ៥ និង ៤១ នាទី ដល់ម៉ោង ៦ និង ៤៨ នាទី ថ្ងៃទី ២០ ខែ កុម្ភៈ ឆ្នាំ ២០២១ ដូច្នេះអ្នកដែលមានរោគសញ្ញា ដូចជាគ្រុនក្តៅ ក្អក កណ្តាស់ ឈឺបំពង់ក ឬពិបាកដកដង្ហើម និងធ្លាប់ចេញចូលទៅផ្សារម៉ាក្រូនៅថ្ងៃទី ២០ ខែកុម្ភ: ក្នុងចន្លោះម៉ោងនេះត្រូវទៅធ្វើតេស្តនៅទីតាំងដែលបានកំណត់ដោយអាជ្ញាធរសុខាភិបាល រាជធានី-ខេត្ត ដែលមានស្រាប់។ ចំពោះបុគ្គលដែលមិនមានរោគសញ្ញាត្រូវតាមដានសុខភាពរបស់ខ្លួនចំនួន ១៤ ថ្ងៃ រាប់ចាប់ពីថ្ងៃទី ២០ ខែកុម្ភ: ឆ្នាំ ២០២១ តទៅ។
សេចក្តីជូនព័ត៌មានរបស់ក្រសួងសុខាភិបាលចេញផ្សាយថ្ងៃទី ១ ខែមីនា បានឱ្យដឹងថា ថ្ងៃទី ២៨ ខែ កុម្ភ: ឆ្នាំ ២០២១ មានករណីរកឃើញវិជ្ជមានវីរុសកូវីដ ១៩ ថ្មីចំនួន ១៥ នាក់ ខណៈនៅថ្ងៃដដែលនេះមិនមានអ្នកជាសះស្បើយពីជំងឺនេះទេ។
សម្រាប់អ្នកឆ្លងជំងឺកូវីដ ១៩ ថ្មី ១៥ នាក់ នៅថ្ងៃទី ២៨ កុម្ភៈ ក្រសួងសុខាភិបាលបានឱ្យដឹងថា មាន ១ ករណី ជាអ្នកដំណើរចូលមកកម្ពុជា ហើយចំនួន ១៤ ករណីទៀត គឺជាអ្នកពាក់ព័ន្ធទៅនឹងព្រឹត្តិការណ៍សហគមន៍ ២០ កុម្ភៈដែលមានជនជាតិចិនចំនួន ១៣ នាក់ និងខ្មែរម្នាក់។
ក្រសួងបានបញ្ជាក់ថា ពួកគេទាំង ១៥ នាក់ ត្រូវបានបញ្ជូនទៅមណ្ឌលសម្រាកព្យាបាលជំងឺកូវីដ ១៩ នៅមណ្ឌលមួយចំនួននៅខេត្តព្រះសីហនុ និងរាជធានីភ្នំពេញ ខណៈអ្នកពាក់ព័ន្ធនឹងអ្នកជំងឺផ្សេងៗទៀតត្រូវបានតម្រូវឱ្យធ្វើចត្តាឡីស័ករយៈពេល ១៤ ថ្ងៃ។
ក្រសួងសុខាភិបាលបានបញ្ជាក់ថា៖ «គិតត្រឹមម៉ោង ៧ ព្រឹក ថ្ងៃទី ១ ខែមីនា ឆ្នាំ ២០២១ នេះ កម្ពុជាបានរកឃើញអ្នកឆ្លងជំងឺកូវីដ ១៩ សរុបចំនួន ៨២០ នាក់ ក្នុងនោះអ្នកជាសះស្បើយមានចំនួន ៤៧៧ នាក់ និងអ្នកជំងឺកំពុងសម្រាកព្យាបាលនៅមន្ទីរពេទ្យចំនួន ៣៤៣ នាក់»។
ចំណែកនៅខេត្តបាត់ដំបងឯណោះវិញលោក ងួន រតនៈ អភិបាលខេត្តបាត់ដំបងបានប្រាប់ភ្នំពេញប៉ុស្តិ៍កាលពីម្សិលមិញថា ចំនួនពលករដែលឆ្លងដែនពីប្រទេសថៃកំពុងធ្វើចត្តាឡីស័កនៅតាមព្រំដែននៃខេត្តនេះមានជាង ៣ ០០០ នាក់។
លោកបន្តថា សមត្ថកិច្ចកំពុងពង្រឹងកិច្ចការពារនៅតាមគោលដៅឆ្ងាយៗបន្ថែមទៀត ព្រោះគ្រាន់តែស្រុកមោងឫស្សីមួយ អាជ្ញាធរ បានរកឃើញពលករលួចឆ្លងដែនខុសច្បាប់ចាប់ពីពាក់កណ្តាលឆ្នាំ ២០២០ មកជាង ១០០ នាក់ដែលបានគេចវេះមិនធ្វើចត្តាឡីស័កនៅតាមព្រំដែន។
លោកបញ្ជាក់ថា៖ «យើងរកឃើញច្រើន បើសរុបមកនៅតាមស្រុក តែក្នុងស្រុក ១ មាន ១ ថ្ងៃ ៤ ទៅ ៥ នាក់ដែលគាត់ មិនដឹង ហើយមកតាមគេ តាមច្រករបៀង តែមាននៅក្នុងស្រុកមួយចំនួនទេ មិនទាំងអស់។ យើងបានបន្ថែមកម្លាំងចូលជាង ២ ពាន់នាក់ហើយ នៅតាមច្រកព្រំដែន និងនៅកន្លែងគោលដៅឆ្ងាយៗទៀត»។
ចាប់ពីមានការផ្ទុះឆ្លងរីករាលដាលក្នុងសហគមន៍នៃជំងឺកូវីដ ១៩ ក្នុងខេត្តសាមុទសាខន ប្រទេសថៃ មានពលករឆ្លងដែនពីថៃតាមច្រកនានាតាមព្រំប្រទល់ជាប់ខេត្តបាត់ដំបងកើនដល់ជិត ១ ម៉ឺននាក់ បានបញ្ចប់ការធ្វើចត្តាឡីស័ក និងអនុញ្ញាតឱ្យត្រឡប់ទៅផ្ទះជាង ៦ ០០០ នាក់ កំពុងនៅក្នុងមណ្ឌលចត្តាឡីស័កជាង ៣ ៥០០ នាក់ ខណៈកំណើនពលករឆ្លងដែនពីថៃ កាន់តែច្រើនឡើងនោះ អាជ្ញាធរខេត្តបាត់ដំបងកំពុងរៀបចំមណ្ឌលចត្តាឡីស័កបន្ថែមទៀតផងដែរ៕