.jpg)
ម្តាយពរកូន ដើរលុយទឹក នៅក្នុងភូមិមួយ នាខេត្តស្ទឹងត្រែង កាលពីឆ្នាំ ២០១៧។ រូបថត សហការី
ភ្នំពេញៈ រដ្ឋាភិបាលបានត្រៀមបម្រុងអង្ករស្រូវពូជ និងគ្រាប់ពូជសរុបជាង ១២ ០០០ តោនសម្រាប់ផ្គត់ផ្គង់ដល់ប្រជាពលរដ្ឋនៅតាមបណ្ដាតំបន់មួយចំនួនដែលជួបប្រឈមនឹងគ្រោះមហន្តរាយនៃធម្មជាតិដែលរួមមាន គ្រោះរាំងស្ងួត ទឹកជំនន់ ខ្យល់ព្យុះ និងផ្គររន្ទះ។ នេះបើយោងតាមលោក កែវ វី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ។
លោក កែវ វី ថ្លែងថាគ្រោះមហន្តរាយពីធម្មជាតិដែលរួមមាន ភាពរាំងស្ងួត ទឹកជំនន់ ខ្យល់ព្យុះ និងផ្គររន្ទះត្រូវបានគេកត់សម្គាល់ថាបានបង្កឡើង ដោយសារការប្រែប្រួលអាកាសធាតុ ឬការកើនឡើងកម្ដៅនៃភពផែនដីនោះ បានបង្កជាក្ដីបារម្ភជាទូទៅដល់ដំណើរការអភិវឌ្ឍសេដ្ឋកិច្ច និងសង្គមដែលទាមទារឲ្យប្រមុខរដ្ឋាភិបាល គ្រប់បណ្ដាប្រទេសលើពិភពលោករួមគ្នាបង្កើតផែនការយុទ្ធសាស្ត្រ សម្រាប់ត្រៀមបង្ការទប់ស្កាត់ និងឆ្លើយតបជាបន្ទាន់ ទៅនឹងគ្រោះមហន្តរាយទាំងនេះ ។
លោកថ្លែងថា៖ «សម្រាប់កម្ពុជា គ្រោះរាំងស្ងួត ទឹកជំនន់ និងខ្យល់ព្យុះបានបង្កការខាតបង់ថវិកាជាតិរាប់សិបលានដុល្លារក្នុង ១ ឆ្នាំៗទៅលើការជួសជុលស្ដារឡើងវិញនូវហេដ្ឋារចនាសម្ព័ន្ធមួយចំនួនដែលរងការខូចខាតដោយគ្រោះធម្មជាតិទាំងនេះ»។
លោកថា៖ «សម្រាប់ឆ្នាំ ២០១៨ រដ្ឋាភិបាលបានត្រៀមបម្រុងជាស្រេចនូវអង្ករចំនួន ១០ ០០០ តោន ស្រូវពូជ ២០០០ តោន និងគ្រាប់បន្លែចម្រុះប្រភេទ ៥០ តោន សម្រាប់ផ្គត់ផ្គង់ដល់គ្រួសាររងគ្រោះដោយគ្រោះធម្មជាតិខាងលើនេះ»។
យោងតាមទិន្នន័យពីគណៈកម្មាធិការជាតិគ្រប់គ្រងគ្រោះមហន្តរាយ ខេត្តដែលជួបប្រឈមនឹងគ្រោះធម្មជាតិ ទឹកជំនន់ ភាពរាំងស្ងួត និងខ្យល់ព្យុះ ញឹកញាប់ជាងគេនាពេលកន្លងមករួមមានខេត្តបន្ទាយមានជ័យ បាត់ដំបង សៀមរាប កំពង់ធំ ព្រៃវែង កណ្ដាល តាកែវ កំពង់ស្ពឺ និងខេត្តកោះកុង។
នៅខេត្តបន្ទាយមានជ័យ ជំនន់ទឹកភ្លៀងកាលពីពេលថ្មីៗនេះបានបំផ្លាញស្រូវពង្រោះប្រជាកសិករក្នុងស្រុកមង្គលបុរីអស់ជាង ២៣០០ ហិកតា ខណៈផ្ទះប្រជាពលរដ្ឋជាង ២០០ ខ្នងត្រូវបានរងការខូចខាតយ៉ាងដំណំដោយសារភ្លៀងលាយឡំ និងខ្យល់កន្ត្រាក់។ នេះបើយោងតាមលោក លី សារី អភិបាលរងខេត្តបន្ទាយមានជ័យកាលពីម្សិលមិញ។
លោក សារី បានបញ្ជាក់ថា៖ «ផលប៉ះពាល់ដោយគ្រោះជំនន់ទឹកភ្លៀង និងខ្យល់កន្ត្រាក់នៅទូទាំងខេត្តបន្ទាយមានជ័យនាពេលថ្មីៗកន្លងមកនេះគិតជាទឹកប្រាក់អស់ជាង ១០ ម៉ឺនដុល្លារ»។
ក្នុងជំនួបជាមួយកម្មករ-កម្មការិនីរោងចក្រកាត់ដេរជិត ២ ម៉ឺននាក់នៅខេត្តកំពង់ស្ពឺកាលពីម្សិលមិញនេះលោកនាយករដ្ឋមន្ត្រី ហ៊ុន សែន បានក្រើនរំឭកដល់គ្រប់ស្ថាប័នពាក់ព័ន្ធទាំងអស់ឲ្យផ្ដោតការចាប់អារម្មណ៍អំពីបញ្ហាគ្រោះទឹកជំនន់ ខណៈក្រសួងធនធានទឹក និងឧតុនិយមបានព្យាករថាចាប់ពីដើមរដូវវស្សានេះទៅភ្លៀងនឹងធ្លាក់រាយប៉ាយយ៉ាងជោកជាំពេញផ្ទៃប្រទេសដែលអាចបង្កជាជំនន់ទឹកភ្លៀងបាន៕
