កោះកុងៈ រាជរដ្ឋាភិបាលបានយល់ព្រមតាមសំណើររបស់ក្រសួងបរិស្ថាន ដើម្បីសិក្សាកាត់ឆ្វៀលដី ចេញពីតំបន់វិនិយោគអភិវឌ្ឍន៍របស់ក្រុមហ៊ុន Union Development Group Co., Ltd (UGD) នៅក្នុងខេត្ត កោះកុង សម្រាប់ផ្ដល់ជូនប្រជាពលរដ្ឋរាប់រយគ្រួសារដែលរងផលប៉ះពាល់ពីសកម្មភាពឈូសឆាយរបស់ក្រុមហ៊ុននេះដែលបានក្លាយទៅជាជម្លោះរ៉ាំរ៉ៃដោយគ្មានដំណោះស្រាយ។
យោងតាមលិខិតដែលចុះ ហត្ថលេខាដោយលោក លោក តឹករ៉េត សំរេច រដ្ឋលេខាធិការទីស្តីការគណៈ រដ្ឋមន្ត្រីកាលពីថ្ងៃទី ២៩ ខែមិនា ឆ្នាំ ២០១៨ ដែលផ្ងើរជូនរដ្ឋមន្ត្រីក្រសួងបរិស្ថាន ហើយនិង សាលារខេត្តកោះកុង ទទួលបានកាល ពីថ្ងៃទី ១៦ ខែឧសភា ឆ្នាំ ២០១៨ ដែល ភ្នំពេញប៉ុស្តិ៍ទើបបានទទួលកាលពីម្សិលមិញបានឲ្យដឹងថា រាជរដ្ឋាភិបាលបានផ្ដល់អំណាចដល់ ក្រសួងបរិស្ថាន ដើម្បីសិក្សាកាត់ឆ្លៀលដី នៅទីតាំងឃុំ ព្រែកខ្សាច់ ស្រុកគីរីសាគរ និង ទីតាំងកៀនទឹក នៃ ឃុំថ្មស ស្រុក បុទុមសាគរ នៃខេត្តកោះកុង ចេញពីតំបន់វិនិយោគអភិវឌ្ឍន៍របស់ក្រុមហ៊ុន Unions Development Group សម្រាប់ ផ្តល់ជូនប្រជាពលរដ្ឋដែលកំពុងរស់នៅនិងអាស្រ័យផលជាក់ស្តែងដោយ សហការជាមួយ ក្រសួង ស្ថាប័ន និងរដ្ឋបាលថ្នាក់ក្រោមជាតិពាក់ព័ន្ធ។
លិខិតដដែលនេះបានឲ្យដឹងថាក្រុមហ៊ុន Unions Development Group ត្រូវរក្សាទុកព្រៃកោងកាង ព្រៃលិចទឹក តំបន់ព្រៃ ស្រោង តំបន់ទីជម្រាលភ្នំ ជាតំបន់អភិរក្សនៅក្នុងប្លង់មេ និងកម្មវិធីអភិវឌ្ឍរបស់ខ្លួន។
មន្ត្រីអ្នកនាំពាក្រក្រសួងបរិស្ថាន លោក សៅ សុភាព មិនអាចទាក់បានដើម្បីសុំការធ្វើអត្ថាធិ ប្បាយបានទេនៅថ្ងៃព្រហស្បតិ៍នេះ។
ប្រជាពលរដ្ឋបានប្ដឹងដល់ក្រុមហ៊ុន UDG បន្ទាប់ពីក្រុមហ៊ុននេះចាប់ផ្ដើមឈូសឆាយបំផ្លាញដើមដូង ដើមស្វាយចន្ទីរបស់ពួកគេដែលស្ថិតនៅក្នុងគម្រោងអភិវឌ្ឍន៍រមណីយដ្ឋានឆ្នេររបស់ក្រុមហ៊ុនដែលមានតម្លៃ៣,៨ពាន់លានដុល្លារនៅលើដីសម្បទានចំនួន ៤៥ ០០០ ហិកតា។
លោក ហ៊ួរ អ៊ីន មន្ត្រីប្រឹក្សាច្បាប់គម្រោងពន្ធនាគារ នៃអង្គការសិទ្ធិមនុស្ស លីកាដូ (LICADHO) ជាអង្គការសង្គមស៊ីវិល ដែលបានធ្វើការតាមដាននឹងឃ្លាំមើល ករណី ដីធ្លីក្រុមហ៊ុន UDG មានការសារទរនឹងរីករាយចំពោះដំណោះស្រាយរបស់រដ្ឋាភិបាល ព្រោះជម្លោះនេះជាង ១០ ឆ្នាំគួរតែបញ្ចប់ដើម្បីឲ្យប្រជាពលរដ្ឋរស់នៅរីករាយទាំងផ្លូវការនិងផ្លូវចិត្ត។
ដោយឡែក កាលពីថ្ងៃទី ២២ ឧសភា តំណាងអយ្យការអមតុលាការខេត្តកោះកុងបានកោះហៅពលរដ្ឋ ២នាក់ នៅក្នុងភូមិព្រែកស្មាច់ ឃុំកោះស្ដេច ស្រុកគិរីសាគរ ខេត្តកោះកុង ឱ្យទៅបំភ្លឺជុំវិញ រឿងវិវាទដីធ្លី តាមបណ្ដឹងរបស់ក្រុមហ៊ុន UDG ដោយចោទពួកគេថារស់នៅលើដី ក្រុមហ៊ុន និងទាមទារឱ្យមានការរុះរើផ្ទះ។
លោកស្រី លីវ ភួង អះអាងថា ពួកគាត់មានការព្រួយបារម្ភយ៉ាងខ្លាំងអំពីការបណ្ដេញចេញដោយបង្ខំនៅពេលខាងមុខ ក្រោយពេលតំណាងអយ្យការប្រាប់ពួកគាត់ថា ពួកគាត់គ្មានសិទ្ធិទាមទារសំណង។
លោកស្រី លីវ ភួង ជាជនរងគ្រោះអះអាងថា៖ «យើងមានការព្រួយរបារម្មណ៍ខ្លាំងតុលាការបានបញ្ជាឲ្យ ខ្ញុំដើរចេញពីដីរបស់ខ្ញុំដែលបានរស់នៅ តាំងពីឆ្នាំ ១៩៨៩។ យើងមានការព្រួយបារម្មណ៍ និង ភ័យខ្លាចនៅពេលគេដាក់គ្រឿងចក្រឈូសឆាយ យើងមិនអាចធ្វើអ្វីគេកើតទេ។យើងមិនដឹងទៅរក ខាងណាដើម្បីជួយយើងទេ»។
លោកស្រីបន្ថែមថា៖ «យើងសុំតែដីកន្លះហិតា និងដីចំការ៥ហិតា និងលុយ ១០ ម៉ឺនដុល្លារ ខ្ញុំចេញហើយ។ យើងចង់បានលុយដើម្បីយកទៅធ្វើផ្ទះនៅនិងដីចំការ៥ហិតាដើម្បីធ្វើចំការ… ប្រជាពលរដ្ឋមួយចំនួនធំបានចេញអស់ បន្ទាប់ពីបានសំណងតែនៅសល់តែ៤គ្រួរសារទេ ដោយសារពួកយើងមិនទាន់ទទួលបានសំណងសមស្រប់នៅឡើយ»។
លោក អ៊ុន សុវណ្ណធានី អ្នកនាំពាក្យសាលាដំបូងខេត្តកោះកុងថាលោកពុំ ទាន់បានទទួលរបាយការទាក់ទងនឹងករណីនេះនៅឡើយទេ៕