.jpg)
លោក សោ ចាន់ដេត អតីតសមាជិកព្រឹទ្ធសភា នៃអតីតគណបក្ស សម រង្ស៊ី។ សហការី
ភ្នំពេញៈ មេធាវីតំណាងលោកនាយករដ្ឋមន្ត្រី ហ៊ុន សែន បានដាក់ពាក្យបណ្តឹងទៅសាលាដំបូងរាជធានីភ្នំពេញកាលពីថ្ងៃចន្ទដោយទាមទារសំណងចំនួន ៤ ពាន់លានរៀលពីលោក សោ ចាន់ដេត អតីតសមាជិកព្រឹទ្ធសភានៃគណបក្សប្រឆាំង។
លោកមេធាវី គី តិច បានប្រាប់ភ្នំពេញប៉ុស្តិ៍កាលពីថ្ងៃចន្ទថា៖ «នៅក្នុងបណ្តឹងនេះ យើងស្នើសុំព្រះរាជអាជ្ញាចោទប្រកាន់និងផ្តន្ទាទោសធ្ងន់ធ្ងរចំពោះលោក សោ ចាន់ដេត ទៅតាមក្រមព្រហ្មទណ្ឌកម្ពុជា។ ទី២ យើងទាមទារសំណងចំពោះទង្វើរបស់គាត់ដែលប៉ះពាល់ដល់កិត្តិយស និងកេរ្តិ៍ឈ្មោះ និងសេចក្តីថ្លៃថ្នូរបស់សម្តេចតេជោ។ សម្តេចតេជោបានទាមទារសំណង ៤ ពាន់លានរៀល (ប្រហែល ១ លានដុល្លារអាមេរិក)»។
លោកមេធាវី អះអាងថា លោក សោ ចាន់ដេត បានផ្សព្វផ្សាយ «ការប្រមាថ» សម្តេចនាយករដ្ឋមន្ត្រី ហ៊ុន សែន នៅលើប្រព័ន្ធផ្សព្វផ្សាយសង្គមក្នុងគោលបំណង «ញុះញង់ឲ្យប្រព្រឹត្តបទឧក្រិដ្ឋជាអាទិ៍ តាមមាត្រា ៣០៧ និង ៤៩៥ នៃក្រមព្រហ្មទណ្ឌ ហើយមានភ័ស្តុតាងចំនួន ៣២ ទំព័រប្រឆាំងនឹងលោក ចាន់ដេត ដែលកូពីចេញពីទំព័រហ្វេសប៊ុករបស់លោក ចាន់ដេត ទាំងអស់នេះត្រូវបានដាក់ទៅតុលាការជាមួយនឹងបណ្តឹង។
លោក សោ ចាន់ដេត ជាអតីតសមាជិកព្រឹទ្ធសភានៃអតីតគណបក្សសម រង្ស៊ី ជាសមាជិកម្នាក់ក្នុងចំណោមសមាជិក ១១៨ នាក់របស់អតីតគណបក្សសង្គ្រោះជាតិដែលត្រូវបានហាមប្រាមមិនឲ្យធ្វើនយោបាយរយៈពេល ៥ ឆ្នាំ ទៅតាមសាលដីការបស់តុលាការកំពូលដែលបានរំលាយគណបក្សប្រឆាំងកាលពីខែវិច្ឆិកា ឆ្នាំ ២០១៧។
កាលពីម្សិលមិញ លោក ចាន់ដេត បានថ្លែងថា៖ «ខ្ញុំនៅតែប្រកាន់ភាពមុតមាំថា ខ្ញុំមិនខ្វល់។ ឥឡូវនេះ លោក ហ៊ុន សែន អាចធ្វើអ្វីៗក៏បាន។ របបរបស់លោកនឹងរលាយ។ ដូច្នេះ គាត់កំពុងតែបត់ខ្លួនរបស់គាត់ដូច្នេះ ខ្ញុំមិនខ្វល់ មិនថា គាត់ប្តឹងខ្ញុំជាមួយនឹងបណ្តឹងជាច្រើនបន្ថែមទៀតក៏ដោយ»។
លោកបានថ្លែងថា៖ «គាត់កំពុងដាក់ពាក្យបណ្តឹងប្រឆាំងនឹងខ្យល់ដោយសារខ្ញុំមិនបានធ្វើអ្វីខុស។ ខ្ញុំនៅបរទេស ខ្ញុំមានសេរីភាព ហើយខ្ញុំនឹងបន្តបេសកកម្មរបស់ខ្ញុំ»។
យោងតាមក្រមព្រហ្មទណ្ឌ ការប្រមាថជាសាធារណៈត្រូវផ្តន្ទាទោសពិន័យពី ១០ ម៉ឺនរៀលដល់ ១០ លានរៀល ខណៈអ្នកប្រព្រឹត្តការញុះញង់ប្រឈមមុខនឹងការជាប់ពន្ធនាគារចន្លោះពី ៦ ខែទៅ ២ ឆ្នាំ និងពិន័យពី ១ លានរៀលទៅ ៤ លានរៀល៕
