ភ្នំពេញៈ អនុប្រធានគណបក្សកាន់អំណាច និងជារដ្ឋមន្ត្រីក្រសួងមហាផ្ទៃ លោក ស ខេង បានចោទអតីតមន្ត្រីគណបក្សប្រឆាំងថា មានចេតនាបង្កសង្គ្រាម និងអុកឡុកដល់ការបោះឆ្នោត ហើយថាបក្សដឹកនាំរដ្ឋាភិបាលមិនបណ្តែតបណ្តោយឲ្យការប៉ុនប៉ងណាមួយរបស់ក្រុមបង្កបញ្ហានោះអាចរំខានដល់ការបោះឆ្នោតបានឡើយ ប៉ុន្តែអ្នកឃ្លាំមើល និងអតីតតំណាងរាស្ត្រថា អតីតបក្សប្រឆាំងមិនមានកម្លាំងទៅបង្កសង្គ្រាមទេ ដោយសារត្រូវបានរំលាយទៅហើយ។
ថ្លែងទៅកាន់អ្នកគាំទ្ររបស់គណបក្សប្រជាជនកម្ពុជារាប់ពាន់នាក់នៅស្រុកកំចាយមារ ខេត្តព្រៃវែងកាលពីថ្ងៃទី ១៤ ខែកក្កដាលោក ស ខេង អនុប្រធានគណបក្សប្រជាជនកម្ពុជាបានលើកជាសំណួរថា ហេតុអ្វីបានជាមានការលើកឡើងថាប្រទេសកម្ពុជារអិលចេញពីលទ្ធិប្រជាធិបតេយ្យ?
លោកបានថ្លែងថា ការនិយាយបែបនេះគឺជាការចោទរបស់បុគ្គលមួយក្តាប់តូច និងជាបុគ្គលដែលពួកគេមិនដែលគិតពីសុខទុក្ខប្រជាជនទេ។
លោក ស ខេង ដែលជាឧបនាយករដ្ឋមន្ត្រីផងនោះបានថ្លែងថា៖ «គេចេះថា តែគេមិនចេះធ្វើទេ ហើយក៏គេមិនដែលបានធ្វើទៅទៀត។ នៅពេលដែលប្រទេសយើងជួបគ្រោះមហន្តរាយប្រល័យពូជសាសន៍ ពួកនេះមិនដឹងនៅទីណាទេ? ប៉ុន្តែនៅពេលមកសុទ្ធតែថា ខ្លួនឯងពូកែជាងគេហើយមិនបានធ្វើអីទេ។ ខ្ញុំមិនបាច់បញ្ចេញឈ្មោះទេ ប្រហែលអ្នកទាំងអស់គ្នាដឹងហើយ»។
លោកបានបន្ថែមថា៖ «អាពួកមួយចំនួនដែលវារត់ចោលស្រុកហ្នឹង វាចង់ឲ្យតែមានសង្គ្រាមទេ ហើយឲ្យការបោះឆ្នោតហ្នឹងបរាជ័យដើម្បីឲ្យគេជោគជ័យ»។
ជាមួយនឹងការឆ្លើយតបបែបនេះលោកក៏បានថ្លែងការពារកម្ពុជាក្រោមការដឹកនាំរបស់បក្សកាន់អំណាចគឺកំពុងដើរនៅលើផ្លូវប្រជាធិបតេយ្យពិតប្រាកដដែលខុសពីការបកស្រាយយ៉ាងនេះយ៉ាងនោះរបស់បុគ្គលមួយចំនួន។
កាលពីសប្តាហ៍មុនលោក ស ខេង ក៏បានថ្លែងទៅកាន់អ្នកគាំទ្ររាប់ពាន់នាក់ នៅបាត់ដំបងដែរថាមានក្រុមមួយដែលប្រឆាំងនឹងការបោះឆ្នោត និងមិនចង់ឲ្យមានការបោះឆ្នោត និងបន្តអុកឡុក រំខានដល់ការបោះឆ្នោតដែលជាគណបក្សបានចូលរួមការបោះឆ្នោតកាលពីឆ្នាំ ២០១៣ រួចហើយ ប៉ុន្តែបានបដិសេធលទ្ធផលបោះឆ្នោតដោយបានប៉ុនប៉ងប្រើប្រាស់វិធានការផ្សេងៗទៀតដែលមិនតាមរយៈការបោះឆ្នោតដើម្បីឡើងកាន់អំណាច។
លោកថា៖ «យើងប្រឆាំងដាច់ខាតនឹងអ្នករារាំងការបោះឆ្នោត និងបំផ្លាញការបោះឆ្នោត។ យើងត្រូវតែការពារការបោះឆ្នោត»។
បើទោះបីជាលោក ស ខេង ថ្លែងមិនចំឈ្មោះក្រុមណាមួយ ឬ គណបក្សណាមួយក្តី ក៏ប៉ុន្តែការបញ្ចេញសារបែបនេះត្រូវបានគេដឹងថា លោកចង់សំដៅទៅរកអតីតគណបក្សសង្គ្រោះជាតិដែលជាអតីតបក្សប្រឆាំង និងជាគូប្រជែងនយោបាយរបស់គណបក្សកាន់អំណាចរបស់លោកដែលបក្សប្រឆាំងមួយនេះត្រូវបានផាត់ចេញពីសង្វៀននយោបាយ។
ដោយឡែកហ្វេសប៊ុកលោក ហេង សំរិន ប្រធានរដ្ឋសភា និងជាប្រធានកិត្តិយសគណបក្សកាន់អំណាចដែលបានចុះផ្សាយកាលពីម្សិលមិញឲ្យដឹងថា នៅថ្ងៃទី ១៤ កក្កដាលោក ហេង សំរិន បានផ្តល់អនុសាសន៍ដល់មន្ត្រីគណបក្សប្រជាជនកម្ពុជាស្រុកពញាក្រែក ខេត្តត្បូងឃ្មុំ សម្រាប់ឱកាសនៃយុទ្ធនាការឃោសនារកសំឡេងឆ្នោតរបស់គណបក្សនយោបាយដែលកំពុងប្រព្រឹត្តទៅថា គណបក្សប្រជាជនកម្ពុជាគឺជាគណបក្សចាស់ទុំខាងផ្នែកនយោបាយ និងមានប្រវត្តិក្នុងការតស៊ូរំដោះប្រទេសជាតិដឹកនាំកសាងជាតិជាយូរណាស់មកហើយ និងមន្ត្រីសមាជិកទាំងអស់ត្រូវរួមគ្នាក្នុងការថែរក្សាតម្លៃ និងស្នាដៃរបស់គណបក្សឲ្យបានស្ថិតស្ថេរ គង់វង្សតទៅតាមរយៈការស្រឡាញ់ ការគាំទ្រ និងការផ្តល់ទំនុកចិត្តពីពលរដ្ឋម្ចាស់ឆ្នោត។
លោកបញ្ជាក់ថា៖ «សម្តេចប្រធានគណបក្សបានជំរុញមន្ត្រីគណបក្សគ្រប់ថ្នាក់ឲ្យផ្លាស់ប្តូរឥរិយាបថរបស់ខ្លួនលុបបំបាត់ភាពក្រអឺតក្រទមភាពជានាហ្មឺននិយមទៅជាមន្ត្រីអ្នកបម្រើប្រជាពលរដ្ឋដោយសាមញ្ញដាក់ខ្លួនឲ្យទាបជាមួយប្រជាពលរដ្ឋ អ្វីដែលប៉ះទង្គិចផលប្រយោជន៍របស់ប្រជាពលរដ្ឋត្រូវចៀសវាងជាដាច់ខាត»។
លោក សំ គន្ធាមី នាយកប្រតិបត្តិគណៈកម្មាធិការអព្យាក្រឹត និងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវនៅកម្ពុជាហៅកាត់ថា និកហ្វិក ចាត់ទុកការអំពាវនាវកន្លងមករបស់គណបក្សប្រឆាំងមិនមានលក្ខណៈធ្ងន់ធ្ងរប៉ះពាល់ដល់ដំណើរការបោះឆ្នោតទេ ដោយថានេះគឺគ្រាន់តែជាការបញ្ចេញមតិវាមិនអាចមានសង្គ្រាមទេ ដោយសារគណបក្សប្រឆាំងមិនមានកម្លាំង។
លោកបន្ថែមថា៖ «ជាធម្មតាទេនៅប្រទេសគេក៏គេធ្វើដែរ នៅពេលដែលគេជួបស្ថានភាពដូចគណបក្សប្រឆាំង។ កាលណាបក្សរបស់ខ្លួនត្រូវបានរំលាយពីឆាកនយោបាយគេត្រូវតែតស៊ូមតិ ដើម្បីចូលរួមវិស័យនយោបាយឡើងវិញ និងក្នុងការបោះឆ្នោតនេះមិនមែនសង្គ្រាមទេ ដោយគណបក្សប្រឆាំងមានការឈឺចាប់ ដូច្នេះហើយគេត្រូវតស៊ូមតិមិនអាចដេកស្ងៀមបានទេ»។
លោក ជាម ច័ន្ទនី អតីតតំណាងរាស្ត្រគណបក្សប្រឆាំងមានប្រសាសន៍ថា រហូតមកដល់ពេលនេះ គណបក្សសង្គ្រោះជាតិ ត្រូវបានគណបក្សកាន់អំណាចផាត់ចេញពីការបោះឆ្នោត ដូច្នេះ គណបក្សរបស់លោកមិនមានឈ្មោះចូលរួមប្រកួតប្រជែងការបោះឆ្នោតដែលអាចរំខានដូចការចោទប្រកាន់នោះទេ។
លោកបញ្ជាក់ថា៖ «អ្វីទាំងអស់គឺសម្រេចទៅលើប្រជាពលរដ្ឋ ហើយការចោទប្រកាន់នេះមិនមែនជារឿងត្រឹមត្រូវទេពីព្រោះគណបក្សសង្គ្រោះជាតិយើងពុំមានអ្វីទៅអុកឡុកទេដោយសារយើងត្រូវរំលាយហើយ។ ជារឿងមិនត្រឹមត្រូវទេដែលថាគណបក្សប្រឆាំងមិនដែលបានជួយអ្វីសោះ ដោយសារគណបក្សប្រឆាំងធ្វើអ្វីទៅតាមតួនាទីរបស់ខ្លួន។ យើងបានជួយកែសម្រួល និងរកកំហុសឆ្គង និងចំណុចខ្សោយរបស់រដ្ឋាភិបាល ជាពិសេសក្នុងសភាកន្លងទៅ និងបានចូលរួមរៀបចំច្បាប់ជាច្រើនក្នុងរយៈពេលជិត ២០ ឆ្នាំ»៕