ភ្នំពេញៈ លោក ហ៊ុន សែន បានកត់សម្គាល់ពីភាពសប្បាយរីករាយរបស់ប្រជាពលរដ្ឋខ្មែរនៅក្នុងព្រះរាជពិធីបុណ្យអុំទូក ខណៈដែលលោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងកងយោធពលខេមរភូមិន្ទ បានអំពាវនាវឲ្យប្រជាពលរដ្ឋត្រូវរួមចិត្ត រួមកាយ ការពារឲ្យបានដាច់ខាតនូវសុខសន្តិភាពដែលមានសព្វថ្ងៃនេះដើម្បីអនាគតរបស់ប្រទេសជាតិ និងប្រជាជនខ្មែរ។
លោក ហ៊ុន ម៉ាណែត ដែលក៏ជាមេបញ្ជាការកងទ័ពជើងគោកផងនោះបានសរសេរបង្ហោះលើហ្វេសប៊ុករបស់លោកកាលពីថ្ងៃអង្គារថា បុណ្យអុំទូកឆ្នាំនេះមានប្រជាពលរដ្ឋខ្មែរយ៉ាងច្រើនកុះករចូលរួមអបអរសាទរយ៉ាងសប្បាយរីករាយនៅរាជធានីភ្នំពេញ និងនៅតាមបណ្តាខេត្តនានា ហើយនេះគឺជាអ្វីដែលជាតិ និងប្រជាជនខ្មែរគ្រប់រូប មិនប្រកាន់និន្នាការ ឬសាសនាចង់បានពោលគឺឱកាសរស់នៅជួបជុំគ្រួសារក្នុងភាពសប្បាយរីករាយក្នុងបរិយាកាស សុខសន្តិភាព។
លោកបានបញ្ជាក់ដូច្នេះថា៖ «អ្វីដែលប្រជាពលរដ្ឋមិនចង់បាន គឺភាពវឹកវរ អសន្តិសុខ អស្ថិរភាព និងការបាត់បង់សន្តិភាពដែលនាំឲ្យប្រទេសជាតិ និងប្រជាជនខ្មែរធ្លាក់ក្នុងភាពច្របូកច្របល់ បាត់បង់នូវសេចក្តីសុខ និងភាពកក់ក្តៅ។ ហេតុដូច្នេះយើងត្រូវរួមចិត្ត រួមកាយ ដើម្បីការពារឲ្យបានដាច់ខាតនូវសុខសន្តិភាព ដែលយើងមានសព្វថ្ងៃដើម្បីអនាគតរបស់ជាតិ និងប្រជាជនខ្មែរយើង»។
ទន្ទឹមនឹងនេះលោកនាយករដ្ឋមន្ត្រី ហ៊ុន សែន មានប្រសាសន៍ថានៅតាមបណ្តាខេត្តមួយចំនួនគឺលេចឮពាក្យចចាមអារ៉ាម និងពាក្យប្រឌិតភូតកុហកបោកប្រាស់ដោយជនអគតិដែលមានបំណងបំពុល និងបំប៉ោងបញ្ហាសន្តិសុខសង្គមក្នុងបំណងធ្វើឲ្យពលរដ្ឋភ័យខ្លាច ខណៈពេលដែលពលរដ្ឋបាននិងកំពុងសប្បាយរីករាយក្នុងពិធីបុណ្យអុំទូក។
លោកបញ្ជាក់នៅលើហ្វេសប៊ុករបស់លោកកាលពីថ្ងៃអង្គារថា៖ «ជាធម្មតាទៅហើយជាពិសេសនៅតាមបណ្តាខេត្តមួយចំនួនគឺលេចឮពាក្យចចាមអារ៉ាម និងពាក្យប្រឌិតភូតកុហកបោកប្រាស់ដោយជនអគតិដែលមានបំណងបំពុល និងបំប៉ោងបញ្ហាសន្តិសុខសង្គម បំណងធ្វើឲ្យពលរដ្ឋភ័យខ្លាច»។
លោកបញ្ជាក់ថា៖ «រាជរដ្ឋាភិបាលសូមធានាជូននូវសន្តិសុខដល់បងប្អូនប្រជាពលរដ្ឋមិនឲ្យមានអ្វីកើតឡើងឡើយ ជាពិសេសក្នុងរដូវបុណ្យទាននេះតែម្តង។ សូមកុំជឿពាក្យភូតកុហកដោយក្រុមបំពុលសង្គមមួយចំនួនតូចដែលមិនចង់ឃើញពីការរីកចម្រើនរបស់ប្រទេសជាតិ»។
លោកបន្តថា ប្រជាពលរដ្ឋរាប់ម៉ឺននាក់មកពីគ្រប់ទិសទីបានសម្រុកដើរលេងកម្សាន្ដយ៉ាងសប្បាយរីករាយក្នុងព្រះរាជពិធីបុណ្យអុំទូក បណ្តែតប្រទីប និងសំពះព្រះខែអកអំបុក។ ប្រជាពលរដ្ឋម្នាក់ៗបានបង្ហាញនូវទឹកមុខសប្បាយរីករាយ បន្ទាប់ពីពួកគាត់បានដើរលេងសប្បាយដោយគ្មានការភ័យខ្លាចអ្វីទាំងអស់។
ចំណែកលោក ស ខេង ឧបនាយករដ្ឋមន្ត្រី រដ្ឋមន្ត្រីមហាផ្ទៃក៏បានលើកឡើងនៅលើហ្វេសប៊ុករបស់លោកកាលពីថ្ងៃពុធថាប្រទេសកម្ពុជាបានបន្តរក្សាបាននូវសេចក្ដីសុខ សន្តិភាព និងការអភិវឌ្ឍសម្រាប់ការរស់នៅរបស់ប្រជាពលរដ្ឋប្រកបដោយភាពសុខក្សេមក្សាន្ត និងធ្វើឲ្យជីវភាពប្រជាពលរដ្ឋកាន់តែមានភាពល្អប្រសើរ។ លោកបន្តថា ប្រទេស កម្ពុជា ដែលបានឆ្លងកាត់ការបែកបាក់ជាតិ ការព្រាត់ប្រាស សង្គ្រាមកាប់សម្លាប់នឹងមិនវិលត្រឡប់ទៅជាន់ដានប្រវត្តិសាស្ត្រដ៏ខ្មៅងងឹតនោះវិញឡើយ។
លោក ស ខេង បញ្ជាក់ថា៖ «ខ្ញុំព្រះករុណាខ្ញុំសូមសម្ដែងនូវការកោតសរសើរ និងថ្លែងអំណរគុណយ៉ាងជ្រាលជ្រៅចំពោះអាជ្ញាធរគ្រប់ជាន់ថ្នាក់ កងកម្លាំងប្រដាប់អាវុធ និងសមត្ថកិច្ចពាក់ព័ន្ធគ្រប់លំដាប់ថ្នាក់ទូទាំងប្រទេសដែលបានខិតខំប្រឹងប្រែងអនុវត្តវិធានការណែនាំទាំង ៨ ចំណុចដែលខ្ញុំព្រះករុណាខ្ញុំបានដាក់ចេញ ដើម្បីបង្កើនការថែរក្សាសុខសន្តិភាព សភាពការណ៍ផ្ទៃក្នុងប្រទេស ពង្រឹងការគ្រប់គ្រងសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គមជូនប្រជាពលរដ្ឋបានចូលរួមប្រារព្ធពិធីបុណ្យជាតិ ប្រកបដោយសុខសុវត្ថិភាព និងភាពសប្បាយរីករាយ»។
លោក អ៊ូ ច័ន្ទរ័ត្ន អតីតតំណាងរាស្ត្រអតីតគណបក្សសង្គ្រោះជាតិបានថ្លែងថា មិនមែនត្រឹមតែរាជរដ្ឋាភិបាលប៉ុណ្ណោះទេ ដែលចង់បានសុខសន្តិភាពនោះប្រជាជនកម្ពុជាទាំងមូលក៏សុទ្ធតែចង់បានផងដែរ។ ប៉ុន្តែលោកថា ដោយសារតែតុលារកំពូលរំលាយគណបក្សសង្គ្រោះជាតិទើបធ្វើឲ្យមន្ត្រីអតីតគណបក្សនេះខឹងសម្បា និងធ្វើការតវ៉ា។
លោកបន្តថា ដរាបណារដ្ឋាភិបាលមិនអាចផ្តល់យុត្តិធម៌ដល់អតីតគណបក្សនេះទេ នោះការតវ៉ាអាចនឹងកើតមានឡើង ដែលវាអាចឈានទៅដល់ការធ្វើឲ្យមានអស្ថិរភាព និងអាចបង្កការប្រះឆាដល់សង្គមជាតិ។ «សន្តិភាព និងសេចក្តីសុខនេះកើតមានឡើងលុះត្រាណាតែខ្មែរទាំងមូលអាចរួមរស់ជាមួយគ្នាបាន។ តែបើសុខបានតែមួយក្រុមហើយមួយក្រុមទៀត មិនសុខ វាមិនអាចមានសន្តិភាពបានទេ។ ខ្ញុំឃើញមន្ត្រីបក្សប្រឆាំងមួយចំនួនបានធ្វើនយោបាយប្រជាភិថុតតាមរយៈការលាបពណ៌ បំភ្លៃព័ត៌មានដែលអាចធ្វើឲ្យមានការប្រេះឆាហើយបង្កឲ្យមានបញ្ហាក្នុងសង្គម»៕