.jpg)
អ្នកភូមិអារ៉ែងបូជាសពជនរងគ្រោះដែលត្រូវរន្ទះបាញ់កាលពីសប្តាហ៍មុន។ រូបថត សហការី
កំពង់ស្ពឺ/កោះកុងៈ លោកនាយករដ្ឋមន្ត្រី ហ៊ុន សែន បានលើកឡើងថា អ្នកដែលជេរប្រមាថរូបលោកច្រើនជាងគេគឺពួកខ្មែរក្រហម ហើយចុងក្រោយពួកគេខ្លះបានស្លាប់ដោយរកដីកប់ពុំបាន ខណៈអ្នកជេរលោកខ្លះផ្សេងទៀត «ត្រូវរន្ទះបាញ់ស្លាប់» ដូចជាអ្នកនៅតំបន់អារ៉ែងក្នុងខេត្តកោះកុងជាដើម។
នៅក្នុងពិធីសំណេះសំណាលជាមួយនឹងកម្មករ កម្មការិនី ១៩៩៤៩ នាក់នៅក្នុងក្រុងច្បារមនខេត្តកំពង់ស្ពឺកាលពីម្សិលមិញលោកនាយករដ្ឋមន្ត្រីបានមានប្រសាសន៍ថាអ្នកដែលជេរប្រមាថ លោកច្រើនជាងគេគឺពួកខ្មែរក្រហម តែចុងក្រោយពួកគេខ្លះបានស្លាប់ដោយរកដីកប់មិនបាន ដូចជា ប៉ុល ពត ជាដើមហើយ សុន សេន «ងាប់តាយហោងដោយសារតែការពាលស៊ីពាលពួក ប៉ុល ពត បានបាញ់សម្លាប់ សុន សេន ទាំងពូជតែម្តង»។ លោកបន្តថាថ្នាក់ដឹកនាំក្នុងរបប ប៉ុល ពត ក្រៅពីនោះត្រូវទទួលរងការកាត់ទោស និងខ្លះទៀតបានធ្វើសមាហរណកម្មចូលរួមរស់ជាមួយរដ្ឋាភិបាល។
លោកនាយករដ្ឋមន្ត្រីថ្លែងថា៖ «ដូច្នេះអ្នកដែលប្រទេចផ្តាសាពូ ក៏ពូគិតថានឹងទទួលរងនូវផលដែលពួកគេបានសាង។ ពួក ប៉ុល ពត ដូចគ្នាដែរ។ គ្មានអ្នកណាជេរពូជាងពួក ប៉ុល ពត ទេ ហើយបើនិយាយពី ខៀវ សំផន វិញថ្ងៃចរចាជេរ ហ៊ុន សែន យ៉ាងតិច ២០ ដង។ ឲ្យតែចរចា គឺថាអង្គុយជេរតែម្តង»។ ប៉ុន្តែដល់ទីបញ្ចប់លោក ខៀវ សំផន អតីតប្រមុខរដ្ឋក្នុងសម័យកម្ពុជាប្រជាធិបតេយ្យបាននាំគ្រួសារទៅចុះចូលជាមួយនឹងលោកដល់ផ្ទះតែម្តង។
លោកនាយករដ្ឋមន្ត្រីក៏បានលើកឡើងផងដែរថាមានអ្នកគ្រូពេទ្យម្នាក់បានឆ្ងល់ពីមូលហេតុដែលរន្ទះបាញ់មនុស្សស្លូតត្រង់នៅតំបន់អារ៉ែងក្នុងខេត្តកោះកុង។
លោកមានប្រសាសន៍ថា៖ «អ្នកគ្រូពេទ្យ ខ្ញុំសុំផ្តាំទៅ ខ្ញុំបានស្តាប់ឮហើយក្នុងការនិយាយថា ម៉េចបានរន្ទះបាញ់សម្លាប់អ្នកនៅអារ៉ែង ព្រោះហ្នុងជាសមាជិកបក្សប្រឆាំង រន្ទះបាញ់។ បានខ្ញុំមើលឃើញអាហ្នឹងស្តាប់ឮអាហ្នឹង ខ្ញុំថាមកពីជេរ ហ៊ុន សែន ច្រើនពេក! ជួនកាលរាសីមិនដល់វាអ៊ីចឹងដែរណា! ជួនកាលជេរ ហ៊ុន សែន ស្រាប់តែភ្លូកឡានងាប់បាត់ ជួនកាលរន្ទះបាញ់ ខ្សែភ្លើងឆក់ ភ្លើងឆេះផ្ទះអ៊ីចឹងទៅ»។
កាលពីថ្ងៃព្រហស្បតិ៍សប្តាហ៍មុនរន្ទះបានបាញ់ស្លាប់មនុស្សចំនួន ៥ នាក់ និងឆ្កែ ៣ ក្បាលនៅតំបន់អារ៉ែង។ ក្នុងនោះមានក្មេងម្នាក់អាយុ ៤ ឆ្នាំផងដែរ។
លោក Alejandro Gonzalez Davidson ស្ថាបនិកអង្គការមាតាធម្មជាតិនៅក្នុងតំបន់អារ៉ែងដែលត្រូវបណ្តេញចេញពីកម្ពុជាបានយល់ឃើញថាលោកនាយករដ្ឋមន្ត្រីបានយល់ខុស ចំពោះឧប្បត្តិហេតុរន្ទះបាញ់នៅអារ៉ែងនោះព្រោះថា អ្នកដែលត្រូវរន្ទះបាញ់នោះមិនមែនមានតែមនុស្សចាស់ទេគឺមានទាំងកូនក្មេង និងឆ្កែជាដើម។
លោក Alejandro ដែលចេះនិយាយភាសាខ្មែរយ៉ាងច្បាស់បានចោទសួរថា៖ «ក្នុងករណីរន្ទះបាញ់ហ្នឹង មានក្មេងស្លាប់ដែរ និងឆ្កែងាប់ដែរ។ អ៊ីចឹងសួរថាក្មេង និងឆ្កែដែលស្លាប់ហ្នឹងជាសមាជិកគណបក្សសង្គ្រោះជាតិដែរឬយ៉ាងម៉េច? វាជារឿងគួរឲ្យអស់សំណើច»។
លោក Alejandro បានថ្លែងដូច្នេះទៀតថា៖ «ខុសទាំងស្រុងព្រោះថាប្រជាជននៅអារ៉ែងហ្នឹងមិនដែលជេរនាយករដ្ឋមន្ត្រី ហ៊ុន សែន ទេគឺគេមានទម្លាប់ប្រពៃណីគោរពអ្នកដទៃ។ គេមិនដែលជេរគេផ្តេសផ្តាសទេ ពិសេសគឺនាយករដ្ឋមន្ត្រីគឺគេមានតែគោរព និងខ្លាចហ្នឹង»។
លោក Alejandro ក៏បានថ្លែងផងដែរថា អ្នកដែលស្លាប់មិនមែនជាសមាជិកនៃអតីតគណបក្សសង្គ្រោះជាតិទេហើយថាតាំងតែពីមុនមកនៅអារ៉ែងប្រជាពលរដ្ឋមានតែគោរព និងស្រឡាញ់លោកនាយករដ្ឋមន្ត្រី ប៉ុន្តែនាពេលបច្ចុប្បន្ននេះលោកមិនដឹងនោះទេ។ លោកបានបញ្ជាក់ថាការថ្លែងរបស់លោកនាយករដ្ឋមន្ត្រីគឺជាការមិនគោរពដល់សពរបស់ជនរងគ្រោះ៕
