ភ្នំពេញៈ លោកនាយករដ្ឋមន្ត្រី ហ៊ុន សែន នឹងបំពេញទស្សនកិច្ចនៅប្រទេសជប៉ុនចាប់ពីថ្ងៃទី ២៩-៣១ ឧសភា ដើម្បីចូលរួមសន្និសីទអន្តរជាតិលើកទី២៥ ស្ដីពីអនាគតរបស់អាស៊ី ដែលត្រូវរៀបចំឡើងនៅថ្ងៃទី ៣០-៣១។ ក្រៅពីនេះ លោកក៏នឹងត្រូវជួបទ្វេភាគីជាមួយនាយករដ្ឋមន្ត្រីជប៉ុនលោក ស៊ីនហ្សូ អាបេ ធ្វើជាសាក្សីក្នុងការចុះហត្ថលេខាលើឯកសារព្រមព្រៀងមួយចំនួនរវាងកម្ពុជា-ជប៉ុន។
សេចក្ដីប្រកាសព័ត៌មានរបស់ក្រសួងការបរទេសកម្ពុជាថ្ងៃទី ២៤ ឧសភា បញ្ជាក់ថា ដំណើរបំពេញទស្សនកិច្ចរបស់លោក ហ៊ុន សែន នៅប្រទេស ជប៉ុន នឹងអមដំណើរដោយលោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម រួមទាំងមន្ត្រីជាន់ខ្ពស់ និងថ្នាក់ដឹកនាំធុរកិច្ចកម្ពុជាមួយចំនួនទៀត។
ក្នុងសន្និសីទអន្តរជាតិលើកទី២៥ ស្ដីពីអនាគតអាស៊ីឆ្នាំ ២០១៩ ក្នុងទីក្រុងតូក្យូនេះលោក ហ៊ុន សែន នឹងថ្លែងសុន្ទរកថាអំពីការស្វែងរកសណ្ដាប់ធ្នាប់ពិភពលោកថ្មី ការជម្នះភាពវឹកវរ បរិបទសកលលោកបច្ចុប្បន្ន ចក្ខុវិស័យនាពេលអនាគត និងការប្ដេជ្ញាចិត្តរបស់កម្ពុជាក្នុងការរួមចំណែកលើកកម្ពស់សុខដុម សន្ដិភាព និងវិបុលភាពក្នុងតំបន់អាស៊ីប៉ាស៊ីហ្វិក និងក្នុងពិភពលោក។
សន្និសីទអន្តរជាតិស្ដីពីអនាគតរបស់អាស៊ី ត្រូវបានគេចាត់ទុកថា ជាសន្និសីទពិភពលោកដ៏សំខាន់មួយ ដែលបានរៀបចំឡើងជារៀងរាល់ឆ្នាំក្នុងប្រទេស ជប៉ុន ដោយទស្សនាវដ្ដីសេដ្ឋកិច្ចជប៉ុនឈ្មោះ NIKKEI ចាប់ពីឆ្នាំ ១៩៩៥ ដើម្បីឱ្យក្រុមមេដឹកនាំខាងសិក្សាស្រាវជ្រាវ សេដ្ឋកិច្ច និងនយោបាយ ជួបប្រជុំគ្នាដើម្បីផ្ដល់គំនិតដោយស្មោះត្រង់ និងសេរីជុំវិញបញ្ហាកំពុងកើតឡើងក្នុងតំបន់អាស៊ីប៉ាស៊ីហ្វិក និងតួនាទីរបស់អាស៊ីនៅក្នុងពិភពលោក។
លោក ហ៊ុន សែន ក្រោយពីមានភារកិច្ចក្នុងសន្និសីទអន្តរជាតិនេះ លោកនឹងត្រូវឆ្លៀតជួបជាមួយលោក ស៊ីនហ្សូ អាបេ ដើម្បីពិភាក្សាអំពីបញ្ហាទ្វេភាគី តំបន់ និងអន្តរជាតិ មុនមេដឹកនាំទាំង ២ នេះ ត្រូវអញ្ជើញធ្វើជាសាក្សីចុះហត្ថលេខាលើលិខិតផ្លាស់ប្ដូរសារព្រមព្រៀងស្ដីពីការផ្ដល់ជំនួយឥតសំណងរបស់ជប៉ុនសម្រាប់ការអភិវឌ្ឍប្រទេសកម្ពុជាចំនួន ២។
ការអនុវត្តកម្មវិធីអភិវឌ្ឍន៍សេដ្ឋកិច្ច និងសង្គម។ សាងសង់ស្ថានីយកុងតឺន័រក្នុងទំហំទឹកប្រាក់ ២០០ លានយ៉េនជប៉ុន និងការអនុវត្តគម្រោងអាហារូបករណ៍អភិវឌ្ឍធនធានមនុស្សដែលទំហំទឹកប្រាក់ ៣៣៩ លានយ៉េនជប៉ុន។
ក្រៅពីនេះ លោក ហ៊ុន សែន ក៏នឹងត្រូវថ្លែងសុន្ទរកថាដាច់ដោយឡែកក្នុងសិក្ខាសាលាស្ដីពីការវិនិយោគនៅកម្ពុជា ដែលសហការរៀបចំដោយក្រុមប្រឹក្សាអភិវឌ្ឍន៍កម្ពុជា (CDC) អង្គការពាណិជ្ជកម្មក្រៅប្រទេសជប៉ុន (JETRO) និងធនាគារ (Mizuho)។
ទោះជាយ៉ាងណា សកម្មជនអតីតគណបក្សសង្គ្រោះជាតិប្រចាំប្រទេសជប៉ុន ក៏កំពុងត្រៀមប្រមូលផ្ដុំដើម្បីប្រឆាំងវត្តមានរបស់លោក ហ៊ុន សែន ក្នុងពេលបំពេញទស្សនកិច្ចការងារនេះដែរ។
លោក ហៃ វណ្ណា ប្រធានចលនាយុវជនអតីតបក្សសង្គ្រោះជាតិប្រាប់ភ្នំពេញប៉ុស្ដិ៍ថា ការតវ៉ានេះ ដោយសារលោក ហ៊ុន សែន មិនមែនជានាយករដ្ឋមន្ត្រីស្របច្បាប់ ដែលកើតចេញពីការបោះឆ្នោតដោយសេរី ត្រឹមត្រូវនិងយុត្តិធម៌។
លោកថា៖ «យើងចង់ប្រាប់ទៅមហាជន ពិសេសពលរដ្ឋជប៉ុន និងកាសែតនីកេជប៉ុនថា ជនផ្ដាច់ការដូចលោក ហ៊ុន សែន មិនគួរណាអញ្ជើញមកជប៉ុនជាលើកទី២ ទៀតទេ ហើយយើងនៅតែប្រកាន់ជំហរ យើងជាពលរដ្ឋខ្មែរនៅប្រទេស ជប៉ុន មិនទទួលស្គាល់ការបោះឆ្នោតថ្ងៃទី ២៩ ខែ កក្កដា ឆ្នាំ ២០១៨ ដាច់ខាត»។
លោក ផៃ ស៊ីផាន មន្ត្រីនាំពាក្យរដ្ឋាភិបាលលើកឡើងថា វាជារឿងធម្មតាសម្រាប់ប្រទេសប្រជាធិបតេយ្យ គឺសិទ្ធិសម្ដែងមតិយោបល់អាចធ្វើឡើងគ្រប់ទីកន្លែង។ ការត្រៀមធ្វើបាតុកម្មប្រឆាំងលោក ហ៊ុន សែន បង្ហាញថា ប្រទេសកម្ពុជាកំពុងស្ថិតក្នុងលទ្ធិប្រជាធិបតេយ្យ។
លោកបញ្ជាក់ថា៖ «ការលើកឡើងរបស់ [ហៃ វណ្ណា] គឺចង់ក្លាយទៅជាឧទ្ទាមហើយ ដែលប្រឆាំងតាំងពីការ បោះឆ្នោត ហើយអាហ្នឹងដែលបង្ហាញអំពីការពុតត្បុតរបស់ក្រុមហ្នឹងឯង ហើយអ្វីដែលគេចង់ធ្វើ គឺបំបាក់មុខនាយករដ្ឋមន្ត្រី ដែលកើតឡើងចេញពីការបោះឆ្នោតនេះឯង»។
លោក ឡៅ ម៉ុងហៃ អ្នកវិភាគនយោបាយយល់ឃើញថា ថ្វីដ្បិតលោក ផៃ ស៊ីផាន ថា ការតវ៉ាក្នុងប្រទេស ជប៉ុន បង្ហាញថាកម្ពុជាកំពុងស្ថិតក្នុងរបបលទ្ធិប្រជាធិបតេយ្យ ប៉ុន្តែលោកបញ្ជាក់ថា ប្រសិនបើកម្ពុជាមានការតវ៉ាស្រដៀងគ្នានេះ គឺតែងត្រូវអាជ្ញាធរហាមឃាត់។
លោកថ្លែងថា៖ «ក្រុមអ្នកតវ៉ាទាំងនោះ គឺកំពុងរស់នៅក្នុងប្រទេស ជប៉ុន ដែលជាប្រទេសលទ្ធិប្រជាធិបតេយ្យ។ ការតវ៉ារបស់ពួកគេនឹងមិនអត់ឱនឡើយ ប្រសិនបើធ្វើឡើងនៅកម្ពុជា»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាយល់ថាការត្រៀមតវ៉ានេះនឹងមិនធ្វើឱ្យប៉ះពាល់ដំណើរទស្សនកិច្ចរបស់លោក ហ៊ុន សែន ឡើយ ដោយលោកថា ជប៉ុនមិនដែលមានទស្សនៈអវិជ្ជមានចំពោះស្ថានការណ៍នយោបាយរបស់កម្ពុជានោះទេ។
លោកថា៖ «ជាទូទៅ គឺជប៉ុនចង់ឱ្យកម្ពុជាមានការរីកចម្រើន ចង់ឱ្យកម្ពុជាមានឯកភាពជាតិ អ៊ីចឹងទេ គំនិតនាំឱ្យបែកបាក់ជាតិ ខ្ញុំយល់ថា រដ្ឋាភិបាលជប៉ុនមិនសាទរទេ»៕