.jpg)
លោកស្រី មូរ សុខហួរ អតីតអនុប្រធានអតីតគណបក្សសង្គ្រោះជាតិ នៅអាកាសយានដ្ឋានអន្តរជាតិ Los Angeles សហរដ្ឋអាមេរិក កាលពីថ្ងៃទី ១៦ មករា។ រូបថត Sam Rainsy Page
ភ្នំពេញៈ អតីតអនុប្រធានអតីតគណបក្សសង្គ្រោះជាតិដែលតុលាការកំពូលរំលាយ គឺលោកស្រី មូរ សុខហួរ កាលពីថ្ងៃសៅរ៍ទី ១៦ ខែមករា បានបង្ហាញការព្យាយាមត្រឡប់មកកម្ពុជាវិញដើម្បីចូលរួមក្នុងសវនាការនៅសាលាដំបូងរាជធានីភ្នំពេញ។ ប៉ុន្តែការព្យាយាមរបស់លោកស្រីធ្វើឡើងទាំងគ្មានឯកសារចាំបាច់សម្រាប់ការធ្វើដំណើរ។
នៅថ្ងៃទី ១៦ មករា ពេលវេលានៅសហរដ្ឋអាមេរិក លោកស្រី មូរ សុខហួរ បានសរសេរនៅលើធ្វីតធឺរថា លោកស្រីបានទៅដល់អាកាសយានដ្ឋានអន្តរជាតិ Los Angeles ហើយលោកស្រីនឹងធ្វើដំណើរបន្តទៅប្រទេសសិង្ហបុរី និងទៅដល់កម្ពុជាដែលជាគោលដៅចុងក្រោយ ដើម្បីចូលរួមសវនាការ។
ប៉ុន្តែបន្តិចក្រោយមកលោក សម រង្ស៊ី អតីតប្រធានគណបក្សសង្គ្រោះជាតិក៏បានចេញសារនៅលើធ្វីតធើរថា នៅម៉ោង ៣ ព្រឹក ម៉ោងនៅសហរដ្ឋអាមេរិក លោកស្រី មូរ សុខហួរ ត្រូវបានបដិសេធមិនឱ្យឡើងជិះយន្តហោះនៃក្រុមហ៊ុន Singapore Airlines ដើម្បីធ្វើដំណើរឆ្ពោះទៅប្រទេសកម្ពុជាទេ។ ការបដិសេធនេះដោយសារតែលោកស្រីគ្មានទិដ្ឋាការសម្រាប់ចូលទៅកម្ពុជា។
លោកស្រី មូរ សុខហួរ ក៏បានសរសេរសារនៅលើធ្វីធើរថា៖ «មិនមែនខ្ញុំមិនបានដាក់ពាក្យស្នើសុំទិដ្ឋាការទេ ប៉ុន្តែដោយសារតែរដ្ឋាភិបាលរបស់លោក ហ៊ុន សែន បដិសេធសិទ្ធិរបស់ខ្ញុំដែលមានចែងក្នុងរដ្ឋធម្មនុញ្ញក្នុងការទៅប្រឈមមុខនឹងការកាត់ទោស»។
លោកស្រី មូរ សុខហួរ និងមន្ត្រី អតីត CNRP មួយចំនួនទៀតត្រូវបានសាលាដំបូងរាជធានីភ្នំពេញចោទប្រកាន់ និងចេញដីកាចាប់ខ្លួនពីបទ «រួមគំនិតក្បត់» និង «ញុះញង់» កាលពីឆ្នាំ ២០១៩ ពាក់ព័ន្ធនឹងការរៀបចំការធ្វើមាតុភូមិនិវត្តន៍របស់លោក សម រង្ស៊ី។ ភ្នំពេញ ប៉ុស្តិ៍ មិនអាចសុំការបញ្ជាក់ពីលោកស្រី មូរ សុខហួរ អំពីគម្រោងវិលត្រឡប់មកកម្ពុជាបានទេកាលពីថ្ងៃទី ១៧ មករា។
លោក អ៊ូ ច័ន្ទរ័ត្ន អតីតតំណាងរាស្ត្រ បក្សប្រឆាំងកំពុងរង់ចាំការវិលត្រឡប់របស់លោកស្រី មូរ សុខហួរ មុននឹងលោកសម្រេចចិត្តបង្កើតគណបក្សនយោបាយថ្មីមួយ។ លោកថ្លែងថា លោកមិនគាំទ្រជំហររារាំងលោកស្រី មូរ សុខហួរ ក្នុងការត្រឡប់មកវិញនោះទេ ហើយរដ្ឋាភិបាលគួរតែផ្ដល់ទិដ្ឋាការដល់លោកស្រី ដើម្បីតតាំងនៅតុលាការ។
ចំពោះការព្យាយាមត្រឡប់មកកម្ពុជាវិញទាំងគ្មានឯកសារចាំបាច់សម្រាប់ធ្វើដំណើរលោក អ៊ូ ច័ន្ទរ័ត្ន ថ្លែងថាលោកស្រី មូរ សុខហួរ ពិតជាបានដឹងច្បាស់មុនហើយថា រដ្ឋាភិបាលមិនផ្ដល់លទ្ធភាពក្នុងការត្រឡប់មកវិញ ប៉ុន្តែលោកស្រីចង់បញ្ជាក់ដល់សាធារណជនថា ការខកខាននេះមិនមែនជាកំហុសរបស់គាត់ទេ។
លោកបានថ្លែងថា៖ «ចំណុចនេះបើយើងពិនិត្យមើលទៅក៏ជាចំណុចអវិជ្ជមានមួយសម្រាប់លោកជំទាវ [មូរ សុខហួរ] ដែរ។ បើសិនជាដឹងខ្លួនថាគេមិនឱ្យចូលហើយ គ្រាន់តែធ្វើដើម្បីឱ្យអស់ចិត្តបែបនេះ អាហ្នឹងយើងនិយាយភាសាសាមញ្ញថាប្រជាភិថុត ដើម្បីឱ្យរាស្ត្រជ្រួលច្របល់រង់ចាំមើល។ យើងដឹងច្បាស់ហើយជំហររដ្ឋាភិបាលមិនធ្វើវីសាឱ្យទេ យើងមិនមានលទ្ធភាពចូលទេ។ ដូច្នេះមិនចាំបាច់ទៅទិញសំបុត្រកប៉ាល់ហោះដោយគ្មានវីសាអីជាដើម»។
លោក ជិន ម៉ាលីន អ្នកនាំពាក្យក្រសួងយុត្តិធម៌បានសរសេរលើហ្វេសប៊ុករបស់លោកថា ការព្យាយាមត្រឡប់មកវិញនេះ គឺជាការសម្ដែងដោយលោកសរសេរថា៖ «មីងខ្ញុំសម្តែងលើកនេះដូចជាមិនសូវសមសោះ ហោះពីអាមេរិកមកដល់អាមេរិក ជាប់គាំងនៅអាមេរិក ត្រឡប់ទៅអាមេរិកវិញ សម្រេចសម្រួលនៅផ្ទះដដែល»។
លោក ពេជ្រ ស្រស់ ប្រធានគណបក្សយុវជនកម្ពុជាក៏បានសរសេរលិខិតចំហមួយថា ការព្យាយាមវិលត្រឡប់មកកម្ពុជាទាំងគ្មានទិដ្ឋាការ ឬលិខិតឆ្លងដែនបែបនេះ គឺជាការធ្វើពាណិជ្ជកម្មលើអ្នកគាំទ្រ និងជាការបោកបញ្ឆោតសតិអារម្មណ៍របស់មហាជន៕
