.jpg)
រដ្ឋមន្ត្រីក្រសួងមហាផ្ទៃ លោក ស ខេង។ ហេង ជីវ័ន
ភ្នំពេញៈ អ្នកជំនាញដែលធ្វើការលើកកម្ពស់អភិបាលកិច្ចល្អនៃអង្គការសង្គមស៊ីវិលកាលពីម្សិលមិញបានថ្លែងសាទរ និងបានជំរុញឲ្យរដ្ឋាភិបាលតាមដានឲ្យបានម៉ឺងម៉ាត់ដាក់ទោសទណ្ឌមន្ត្រីខិលខូចដើម្បីឲ្យការអនុវត្តទទួលបានប្រសិទ្ធភាពខ្ពស់ក្នុងការបំបាត់អំពើពុករលួយ បក្ខពួកនិយម គ្រួសារនិយម និងការរំលោភអំណាចដែលកំពុងមានការរិះគន់ខ្លាំង។
ការថ្លែងរបស់អង្គការសង្គមស៊ីវិលធ្វើឡើង ១ ថ្ងៃក្រោយពេលរដ្ឋមន្ត្រីក្រសួងមហាផ្ទៃ លោក ស ខេង ប្រាប់ឲ្យថ្នាក់ដឹកនាំ មន្ត្រីរាជការស៊ីវិល និងនគរបាលជាតិគ្រប់លំដាប់ថ្នាក់ធ្វើអំពើល្អ កុំប្រព្រឹត្តអំពើបក្ខពួកនិយម គ្រួសារនិយម ពុករលួយ និងការរំលោភអំណាច។
លោក ព្រាប កុល នាយកប្រតិបត្តិនៃអង្គការតម្លាភាពកម្ពុជាប្រាប់ភ្នំពេញប៉ុស្តិ៍តាមសារអេឡិចត្រូនិកកាលពីម្សិលមិញថា៖ «ខ្ញុំគិតថាការអំពាវនាវ ឬការចែករំលែកចំណេះដឹងពីមេដឹកនាំគឺជាកាយវិការដ៏ល្អមួយ ប៉ុន្តែវាមិនដែលគ្រប់គ្រាន់ទេ ហើយជាទូទៅគឺមិនបាននាំទៅរកសកម្មភាពទេ ជាពិសេសនៅក្នុងបរិបទរបស់ប្រទេសកម្ពុជាជាកន្លែងដែលមានបញ្ហាបែបនេះរីករាលដាលយ៉ាងខ្លាំង និងចាក់ឫសយ៉ាងជ្រៅនោះ»។
លោកបន្ថែមថា៖ «ដូច្នេះហើយសារទាំងនោះត្រូវមានយន្តការអនុវត្តច្បាស់លាស់ និងមានការផ្តន្ទាទោសប្រសិនបើមន្ត្រីណាមិនគោរពតាម។ ដើម្បីបង្កើនប្រសិទ្ធភាព វាគួរតែមានឧបករណ៍ត្រួតពិនិត្យ និងវាយតម្លៃដែលប្រជាជនសាមញ្ញទូទៅអាចចូលរួមបាន»។
លោកឧបនាយករដ្ឋមន្ត្រី ស ខេង បានសរសរសារនៅលើទំព័រហ្វេសប៊ុកផ្លូវការរបស់លោកកាលពីថ្ងៃអាទិត្យដោយប្រាប់មន្ត្រីថ្នាក់ដឹកនាំគ្រប់ថ្នាក់ និងមន្ត្រីរាជការស៊ីវិល នគរបាលជាតិនៃក្រសួងមហាផ្ទៃដោយបានកោតសរសើរការខិតខំប្រឹងប្រែងបំពេញភារកិច្ចទទួលបានជោគជ័យយ៉ាងធំធេងជូនប្រទេសជាតិ និងប្រជាជនយើងតាមតួនាទីភារកិច្ចរៀងៗខ្លួន ជាពិសេសកិច្ចការទាំងឡាយដែលទាក់ទងដល់ការបម្រើការបោះឆ្នោតជាតិថ្ងៃទី ២៩ ខែកក្កដា ឆ្នាំ ២០១៨ កន្លងទៅថ្មីៗនេះ។
លោកសរសេរថា៖ «សមិទ្ធផល និងស្នាដៃទាំងអស់ខាងលើនេះពិតជាបានរួមចំណែកយ៉ាងសំខាន់មិនអាចខ្វះបានដែលធ្វើឲ្យរាជរដ្ឋាភិបាលនីតិកាលទី ៥ នៃរដ្ឋសភា ២០១៣-២០១៨ ទទួលបានជោគជ័យយ៉ាងធំធេងជាប្រវតិ្តសាស្ត្រ ពិសេសសុខសន្តិភាព ស្ថិរភាព សន្តិសុខសណ្តាប់ធ្នាប់សារធារណ: ការពារបាននូវបូរណភាពទឹកដី អធិបតេយ្យជាតិ ការអភិវឌ្ឍសេដ្ឋកិច្ច សង្គម និងជីវភាពរស់នៅរបស់ប្រជាពលរដ្ឋ»។
លោកបន្តថាត្រូវមើលឃើញថាបញ្ហាប្រឈមនៅចំពោះមុខយើងនៅមានជាច្រើនទៀតដែលរាជរដ្ឋាភិបាលអាណត្តិទី ៦ (២០១៨-២០២៣) ត្រូវដោះស្រាយ ពិសេសការបន្តពង្រឹង សុខសន្តិភាព ស្ថិរភាព និងការអភិវឌ្ឍជនបទ បម្រើដល់ជីវភាពរស់នៅប្រចាំថ្ងៃរបស់ប្រជាពលរដ្ឋ ពិសេសផ្លូវ ភ្លើង ទឹកស្រោចស្រព ទឹកស្អាត និងអនាម័យជនបទ។
លោកបានសង្កត់ធ្ងន់ក្នុងន័យដើមថា៖ «ក្នុងន័យនេះខ្ញុំមានជំនឿយ៉ាងមុតមាំថា ឯកឧត្តម លោកជំទាវ អស់លោក លោកស្រី បានត្រៀមខ្លួនជាស្រេចដើម្បីចូលប្រឡូកក្នុងកិច្ចការប្រកបដោយការទទួលខុសត្រូវ និងប្រកបដោយឆន្ទ:យ៉ាងមោះមុតបំផុតលើកតម្កើងផលប្រយោជន៍ជាតិធំជាងអ្វីៗទាំងអស់ ធ្វើអ្វីៗដែលជាអំពើល្អ មិនបែងចែក មិនបក្ខពួកនិយម មិនគ្រួសារនិយម ប្រឆាំងអំពើពុករលួយ មិនប្រើអំណាចដោយរំលោភ»។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជាថ្លែងថា ប្រជាពលរដ្ឋកម្ពុជាមានកាតព្វកិច្ចក្នុងការបង់ពន្ធដារដែលគ្មាននរណាម្នាក់រួចពីកាតព្វកិច្ចនេះ ដែលអ្នកផ្តល់សេវាសាធាណៈ មិនត្រូវភ្ជាប់លក្ខខណ្ឌនយោបាយទេ ទាំងអ្នកស្រប និងអ្នកប្រឆាំងត្រូវទទួលបានសេវាដូចៗគ្នា។
លោកបន្តថាដើម្បីសម្រេចបានទស្សនវិស័យវែងឆ្ងាយត្រូវដាក់ចេញនូវគោលនយោបាយជាក់លាក់មួយ ដើម្បីឲ្យមន្ត្រីថ្នាក់ក្រោមអនុវត្តឲ្យវាបានកម្រិតខ្ពស់គួបផ្សំនឹងការដាក់វិន័យតឹងរ៉ឹង។
លោកថ្លែងថា៖ «រឿងសំខាន់ក្រៅតែពីការបង្ហាញខ្ញុំយល់ថាសម្ដេចក្រឡាហោម ស ខេង គាត់លើកឡើងគឺជាគំនិតអ្នកដឹកនាំ ហើយក៏ជាទស្សនៈផ្ទាល់របស់គាត់ក្នុងនាមជាអ្នកដឹកនាំ។ អ៊ីចឹងគំនិតរបស់អ្នកដឹកនាំគ្រាន់តែជារូបភាពមួយ ប៉ុន្តែដើម្បីសម្រេចឲ្យបានទស្សនវិស័យវែងឆ្ងាយរបស់អ្នកដឹកនាំទៅលើករណីហ្នឹង ការដាក់ចេញនូវគោលនយោបាយដ៏ជាក់លាក់មួយ។ ជាពិសេសគោលនយោបាយដែលមានស្រាប់ធ្វើម៉េចឲ្យបានអនុវត្តដោយមន្ត្រីថ្នាក់ក្រោមឲ្យវាបានកម្រិតខ្ពស់ក្នុងនោះដែរកុំភ្លេចក្នុងការដាក់ពិន័យទៅមន្ត្រីណាដែលខិលខូច ដែលមិនធ្វើតាមគោលនយោបាយ ឬគោលការណ៍ផ្សេងៗ»៕
