.jpg)
មន្ត្រីចុះពិនិត្យករណីស្លាប់សង្ស័យពុលស្រានៅស្រុកល្វាឯមនាថ្ងៃទី ១៧ ឧសភា។ រូប FB
កណ្តាលៈ សមត្ថកិច្ចខេត្តកណ្តាល បាននិងកំពុងស្រាវជ្រាវករណីពលរដ្ឋស្លាប់ ៨ នាក់ និងកំពុងសម្រាកព្យាបាលម្នាក់នៅមន្ទីរពេទ្យព្រែកព្នៅ ដែលសង្ស័យបណ្តាលមកពីពុលស្រា ស្ថិតក្នុងភូមិស្គរ ឃុំសារិកា ស្រុកល្វាឯម ខេត្តកណ្តាល។
លោក ហេង សុផល អធិការនគរបាលស្រុកល្វាឯម បានប្រាប់ភ្នំពេញប៉ុស្តិ៍នៅថ្ងៃទី ១៧ ឧសភា ថា សមត្ថកិច្ចបានដាក់ការសង្ស័យបឋមថា ការស្លាប់ពលរដ្ឋ ទាំង ៨ នាក់ និងម្នាក់កំពុងត្រូវបានជួយសង្គ្រោះអាចបណ្តាលមកពីការពុលស្រា ព្រោះជនទាំងនេះគឺជាអ្នកញៀនស្រា។
ទោះជាយ៉ាងណា លោក ហេង សុផល មិនទាន់ហ៊ានអះអាងទាំងស្រុងថា ករណីពលរដ្ឋស្លាប់នេះ មកពីការពុលស្រា ឬយ៉ាងណានោះទេ ព្រោះលោកមិនទាន់ទទួលបានលទ្ធផលនៃការពិនិត្យពីមន្ទីរពិសោធន៍នៅឡើយទេ។ រីឯ លោក ឈឿន សុចិត្ត ស្នងការនគរបាលខេត្តកណ្តាលបានចុះទៅពិនិត្យ និងប្រមូលវត្ថុតាងផ្សេងៗយកទៅកាន់មន្ទីរពិសោធន៍អស់ហើយ។
លោក ហេង សុផល ថ្លែងថា៖ «ឥឡូវនេះ យើងកំណត់ថា អ្នកដែលស្លាប់ទាំងអស់ហ្នឹងសុទ្ធតែ អ្នកញៀនស្រា។ ប៉ុន្តែមិនទាន់កំណត់ថា គាត់បានពុលស្រានៅឡើយទេ។ រង់ចាំមើលលទ្ធផលសិន»។
មន្ត្រីនគរបាលរូបនេះបន្តថា បើសិនជាមន្ទីរពិសោធន៍ពិនិត្យឃើញថា ពលរដ្ឋដែលស្លាប់នេះ បណ្តាលមកពីការផឹកស្រាទាំងអ្នកលក់ និងអ្នកផលិតស្រា នឹងត្រូវអនុវត្តទៅតាមច្បាប់ជាធរមាន។ ប៉ុន្តែសម្រាប់កន្លែងដែលមិនជាប់ពាក់ព័ន្ធក៏នឹងត្រូវទទួលការណែនាំ និងឱ្យមានអនាម័យ។
បើតាមលោក ហេង សុផល ទាំងអ្នកស្លាប់ និងអ្នកកំពុងសម្រាកព្យាបាលម្នាក់ បានទៅចូលរួមបុណ្យសពគេនៅក្នុងភូមិ ក៏បានពិសាស្រាជុំគ្នាហើយក៏មានករណីស្លាប់ជាបន្តបន្ទាប់។ បន្ទាប់ពីដឹងរឿងនេះ អាជ្ញាធរក៏បានចុះទៅគ្រប់គ្រង បិទកន្លែងលក់ និងកន្លែងផលិតស្រាជាបណ្តោះអាសន្ន។
លោកបញ្ជាក់ថា អាជ្ញាធរនឹងប្រកាសបិទកន្លែងផលិតស្រាទាំងអស់នៅទូទាំងស្រុក បើពិនិត្យឃើញថា មិនមានច្បាប់អាជីវកម្ម។ លុះត្រាតែមានច្បាប់អាជីវកម្ម ទើបអនុញ្ញាតឱ្យធ្វើអាជីវកម្ម ប៉ុន្តែបច្ចុប្បន្នសមត្ថកិច្ចបានបិទកន្លែងលក់ និងផលិតស្រាបណ្តោះអាសន្នសិន។
ភ្នំពេញប៉ុស្តិ៍មិនអាចទាក់ទង លោក ឈឿន សុចិត្ត ស្នងការនគរបាលខេត្តកណ្តាលសុំធ្វើអត្ថាធិប្បាយបន្ថែមបានទេ ជុំវិញករណីនេះដោយហៅទូរស័ព្ទចូលហើយ លោកបានចុចផ្តាច់វិញ។ ប៉ុន្តែនៅថ្ងៃទី ១៧ ឧសភា លោកបានដឹកនាំកម្លាំងសមត្ថកិច្ចចុះទៅពិនិត្យទីតាំងកន្លែងកើតហេតុដោយផ្ទាល់ ដើម្បីសួរនាំ និងស្រាវជ្រាវ រកមូលហេតុឱ្យបានពិតប្រាកដ។
បើតាមរបាយការណ៍របស់លោក ឈឿន សុចិត្ត ករណីសង្ស័យពុលស្រា បណ្តាលឱ្យពលរដ្ឋស្លាប់ ៨ នាក់ និងសង្គ្រោះបន្ទាន់ ១ នាក់នេះ បានកើតឡើងជាបន្តបន្ទាប់ចាប់តាំងពីថ្ងៃទី ១០ ខែ ឧសភា ឆ្នាំ ២០២១ ស្ថិតក្នុងភូមិស្គរ ឃុំសារិកា ស្រុកល្វាឯម ខេត្តកណ្តាល ដោយពួកគាត់បានទៅចូលរួមកំដរ បុណ្យសពឈ្មោះ ម៉ន ងន អាយុ ៥១ ឆ្នាំ។
ក្រោយពីការចុះត្រួតពិនិត្យលោក ឈឿន សុចិត្រ បានប្រាប់ឱ្យកម្លាំងសមត្ថកិច្ចស្រុកចុះទៅកាន់ទីតាំងលក់ស្រា និងយកស្រាទៅពិនិត្យនៅមន្ទីរពិសោធន៍ ដើម្បីឱ្យដឹងពីមូលហេតុឱ្យបានច្បាស់លាស់ ដើម្បីមានវិធានការ និងទប់ស្កាត់ឱ្យបានទាន់ពេលវេលា។
បើតាមរបាយការណ៍ដដែល អ្នកដែលស្លាប់មានឈ្មោះ ម៉េន ម៉ន ភេទប្រុស អាយុ ៥១ ឆ្នាំ, ឈ្មោះ ម៉ាង បឹង ភេទប្រុសអាយុ ៥៦ ឆ្នាំ, ឈ្មោះ ម៉ន វាសនា ភេទប្រុស អាយុ ៥៣ ឆ្នាំ, ឈ្មោះ ហេង គ័ង ភេទប្រុស អាយុ ២៩ ឆ្នាំ, ឈ្មោះ សុខ ស៊ូ ភេទប្រុស អាយុ ៥៣ ឆ្នាំ, ឈ្មោះ សុខ ស៊ឹម ភេទប្រុសអាយុ ៥៧ ឆ្នាំ, ឈ្មោះ សុខ ចំរើន ភេទប្រុសអាយុ ៤៧ ឆ្នាំ, ឈ្មោះ ហុង ផាន់ណា ភេទប្រុស អាយុ ៣៥ ឆ្នាំ។ ឈ្មោះ មាំង សារុន ភេទប្រុស អាយុ ៤២ ឆ្នាំ កំពុងសង្គ្រោះនៅមន្ទីរពេទ្យព្រែកព្នៅ៕
វីដេអូ៖
