ភ្នំពេញៈ នគរបាលខណ្ឌកំបូលកំពុងបន្តស្រាវជ្រាវរកអត្តសញ្ញាណជនសង្ស័យពាក់ព័ន្ធនឹងករណីសម្លាប់បុរសម្នាក់ ហើយអូសទម្លាក់ទឹកត្រពាំង ដែលសាកសពត្រូវបានប្រជាពលរដ្ឋប្រទះឃើញដេកស្លាប់ក្នុងទឹកត្រពាំង ១ កន្លែង កាលពីថ្ងៃទី ២៥ ខែកុម្ភៈ ក្នុងភូមិទួលតាឡាត់ សង្កាត់-ខណ្ឌកំបូល រាជធានីភ្នំពេញ។
លោក ផាន់ ភឿន នាយនគរបាលប៉ុស្តិ៍សង្កាត់កំបូលបានឲ្យដឹងកាលពីថ្ងៃទី ២៦ កុម្ភៈ ថាពាក់ព័ន្ធសំណុំរឿងឧក្រិដ្ឋនេះសមត្ថកិច្ចខណ្ឌកំបូល កំពុងស្វះស្វែងរកជនសង្ស័យ ដើម្បីកំណត់អត្តសញ្ញាណ។ ប៉ុន្តែរហូតដល់ថ្ងៃទី ២៦ កុម្ភៈនេះការស្វែងរកជនសង្ស័យនៅមិនទាន់ទទួលបានតម្រុយណាមួយនៅឡើយទេ។ រីឯជនរងគ្រោះក៏សមត្ថកិច្ចកំពុងធ្វើការផ្សព្វផ្សាយដែរដើម្បីរកសាច់ញាតិឈានទៅរកការកំណត់អត្តសញ្ញាណ។
លោកថ្លែងថា៖ «បើទោះជាពេលនេះយើងមិនទាន់កំណត់បានអត្តសញ្ញាណរបស់ជនល្មើសក្តី តែសមត្ថកិច្ចយើងខំដុតដៃដុតជើងរកជនល្មើសយ៉ាងយកចិត្តទុកដាក់បំផុត»។
លោកប្រាប់ថា មុនមានការភ្ញាក់ផ្អើលពីមនុស្សស្លាប់នេះមានប្រជាពលរដ្ឋចំនួន ៤ នាក់ បានទៅដកក្រឳឈូក និងបាចត្រីនៅក្នុងត្រពាំងដាំឈូក។ ពេលនោះពួកគាត់បានប្រទះឃើញបុរសម្នាក់ដេកស្លាប់នៅក្នុងទឹក ហើយឃើញមានចំណងចងដៃចងជើងផង។ ភ្លាមៗនោះពួកគាត់បានរាយការណ៍ប្រាប់នគរបាលប៉ុស្តិ៍កំបូលរបស់លោក ហើយលោកក៏បានជូនដំណឹងទៅខណ្ឌកំបូលដើម្បីមានការចុះពិនិត្យដល់កន្លែងកើតហេតុ។
លោកបន្តថា នៅកន្លែងកើតហេតុក្បែរទឹកត្រពាំងនោះមានគម្ពោតព្រៃគុម្ពរពាក់នៅលើទួលមួយ និងមានព្រៃបន្លាស្អិតផងដែរ។ តាមជំនាញនគរបាលកោសល្យវិច័យសន្និដ្ឋានថា ជនរងគ្រោះត្រូវបានជនល្មើសសម្លាប់នៅក្បែរគម្ពោតព្រៃនោះហើយជនល្មើសចងដៃចងជើងជនរងគ្រោះអូសទម្លាក់ក្នុងទឹកដែលមានជម្រៅត្រឹមស្មងជើងមនុស្សចាស់ប៉ុណ្ណោះ។ អំណះអំណាងពីការធ្វើកោសល្យវិច័យនោះបង្ហាញថាជនរងគ្រោះអាចត្រូវគេសម្លាប់នៅយប់ថ្ងៃទី ២៤ កុម្ភៈ។
លោកឲ្យដឹងថា ជនរងគ្រោះមានអាយុប្រហែលជិត ៣០ ឆ្នាំ ហើយពាក់អាវពណ៌ប្រផេះ ដៃវែងក្រឡាតូចៗ និងស្លៀកខោជើងវែងដែលមានពណ៌ដូចអាវដែរ។ ចំពោះការសន្និដ្ឋានអំពីចំនួនជនសង្ស័យវិញលោក ផាន់ ភឿន បញ្ជាក់ថា បើម្នាក់ទល់ម្នាក់គឺគេមិនអាចសម្លាប់ជនរងគ្រោះបានទេ តែអាចមនុស្សពី ២ នាក់ ទៅ ៣ នាក់ទើបអាចសម្លាប់ជនរងគ្រោះបាន។
ក្រោយពីសមត្ថកិច្ចធ្វើកោសល្យវិច័យរួចហើយ សមត្ថកិច្ចបានដឹកសពយកទៅតម្កល់នៅវត្តអង្គបឹងចកក្នុងភូមិអង្គបឹងចក សង្កាត់-ខណ្ឌកំបូល រាជធានីភ្នំពេញ។
លោកវេជ្ជបណ្ឌិត នង សុវណ្ណរ័ត្ន គ្រូពេទ្យឯកទេសខាងកោសល្យវិច័យលើសាកសពប្រាប់ភ្នំពេញប៉ុស្តិ៍កាលពីថ្ងៃទី ២៦ កុម្ភៈថា សាកសពត្រូវបានជនសង្ស័យចាក់សម្លាប់នឹងអាវុធមុខស្រួចចំនួន ៧ កន្លែង។ ស្នាមចាក់មួយៗមានជម្រៅលិចកប់សាច់ជ្រៅ និងមានចងដៃចងជើងផង។ រហូតមកដល់ថ្ងៃទី ២៦ កុម្ភៈ សមត្ថកិច្ចមិនទាន់កំណត់សម្គាល់អត្តសញ្ញាណជនរងគ្រោះបាននៅឡើយទេ។
លោកប្រាប់ថា៖ «អ្វីដែលខ្ញុំពិនិត្យឃើញស្លាកស្នាមចាក់នៅលើដើមទ្រូង និងខ្លួនដែលខ្ញុំបានមើលឃើញ»។
លោកវេជ្ជបណ្ឌិតបញ្ជាក់ថា តាមរយៈការធ្វើកោសល្យវិច័យគឺជនរងគ្រោះត្រូវបានជនល្មើសសម្លាប់ក្នុងយប់ថ្ងៃទី ២៤ ម៉ោងខ្ទង់ចន្លោះពីម៉ោង ១១-១២ យប់។ ព្រោះស្ថានភាពសាកសពបង្ហាញថានៅមិនទាន់ហើម ឬធុំក្លិននៅឡើយទេ។
លោកប្រាប់បន្ថែមថានៅក្បែរកន្លែងកើតហេតុនោះលោកឃើញមានគម្ពោតព្រៃរបោះមួយ ហើយមានស្នាមជក់គ្រឿងញៀនដូចជាមានទុយោជ័រផងហើយមានស្នាមឈាមពីទួលរហូតដល់មាត់ទឹក។ មានន័យថា ជនល្មើសបានសម្លាប់ជនរងគ្រោះហើយយកទៅទម្លាក់ចោលក្នុងទឹក៕