.jpg)
ចាប់មុខសញ្ញាពាក់ព័ន្ធគ្រឿងញៀន ដែលត្រូវបានសមត្ថកិច្ច ចាប់វាយខ្នោះទៅក្រោយ ព្រមទាំងប្រើប្រាស់ហិង្សាយកជង្គង់ទៅសង្កត់ក និងប្រើជើងទាត់ កាលពីពេលថ្មីៗនេះ។ រូបថត ហ្វេសប៊ុក
ភ្នំពេញ: មន្ត្រីនគរបាលនៅសង្កាត់ក្បាលកោះ ខណ្ឌច្បារអំពៅចំនួន ៣ នាក់ ត្រូវបានលោក ស ថេត អគ្គស្នងការរងនគរបាលជាតិនិងជាស្នងការនគរបាលរាជធានីភ្នំពេញបញ្ជាឲ្យសមត្ថកិច្ចជំនាញអប់រំ និងដាក់ពិន័យតាមច្បាប់កងកម្លាំងនគរបាលជាតិ បន្ទាប់ពីពួកគេបានអនុវត្តច្បាប់និងប្រើសិទ្ធិហួសព្រំដែនទៅលើជនសង្ស័យម្នាក់ កាលពីថ្ងៃទី ២៩ ខែមិថុនា ថ្មីៗនេះ។
តាមគេហទំព័រស្នងការដ្ឋាននគរបាលរាជធានីភ្នំពេញកាលពីថ្ងៃទី ១ ខែកក្កដា ឲ្យដឹងថា សមត្ថកិច្ចជំនាញបានដាក់ពិន័យទៅលើមន្ត្រីនគរបាលទាំង ៣ នាក់នោះ នៅការិយាល័យបុគ្គលិកនៃស្នងការដ្ឋាននគរបាលរាជធានីភ្នំពេញតាមច្បាប់កាលពីថ្ងៃទី ១ ខែកក្កដា ប៉ុន្ដែមន្ត្រីមិនទាន់បានបញ្ជាក់ពីកម្រិតទោសទណ្ឌនោះទេ។
គេហទំព័រដដែលបន្តថា មន្ត្រីនគរបាលមូលដ្ឋានសង្កាត់ក្បាលកោះខណ្ឌច្បារអំពៅកាលពីថ្ងៃទី ២៩ ខែមិថុនា បានចុះល្បាត និងពួនស្ទាក់តាមគោលដៅធ្លាប់មានករណីជួញដូរគ្រឿងញៀន។ ភ្លាមៗនោះបានឃើញជនសង្ស័យឈ្មោះ វ៉េ ឡុងរាជ ហៅ ខ្នាក់ ជិះម៉ូតូម៉ាក Suzuki មួយគ្រឿងបានឈប់ ដើម្បីទទួលគ្រឿងញៀនពីជនសង្ស័យម្នាក់ទៀតមិនស្គាល់ឈ្មោះ តែជននោះបានរត់គេចខ្លួនចូលដីឡូត៍ក្បែរនោះបាត់ទៅ។ រីឯជនឈ្មោះ វ៉េ ឡុងរាជ ក៏បានជិះម៉ូតូចេញដើម្បីគេចខ្លួនពីសមត្ថកិច្ចដែរ។
គេហទំព័រស្នងការដ្ឋាននគរបាលរាជធានីភ្នំពេញបានបន្ថែមថា ជនសង្ស័យរូបនេះជាមុខសញ្ញាជួញដូរគ្រឿងញៀនចាស់ដែលនគរបាលប៉ុស្តិ៍កំពុងស៊ើបអង្កេតតាមរកចាប់ខ្លួនរួមជាមួយបក្ខពួកមួយចំនួនទៀត។ អំឡុងពេលប្រតិបត្តិការឃាត់ខ្លួននេះ សមត្ថកិច្ចពិនិត្យឃើញជនសង្ស័យស្ថិតក្នុងស្ថានភាពញៀនគ្រឿងញៀនខ្លាំង និងស្រវឹងស្រាជោកជាំនិងមានចេតនាប្រើដំបងប្រព្រឹត្តអំពើហិង្សាលើមន្ត្រីអនុវត្តច្បាប់ទើបសមត្ថកិច្ចប្រើសិទ្ធិការពារខ្លួនឈានដល់ចាប់ខ្លួនជនសង្ស័យវាយខ្នោះនិងប្រមូលវត្ថុតាងបញ្ជូនមកអធិការដ្ឋាននគរបាលខណ្ឌច្បារអំពៅ ដើម្បីកសាងសំណុំរឿងតាមនីតិវិធីច្បាប់។
ស្នងការដ្ឋាននគរបាលរាជធានីភ្នំពេញបានបញ្ជាក់ក្នុងគេហទំព័រនោះថា៖ «យើងខ្ញុំទទួលស្គាល់ថាសកម្មភាពប្រតិបត្តិការរបស់មន្ត្រីអនុវត្តច្បាប់បានប្រើប្រាស់សិទ្ធិហួសព្រំដែននៃវិជ្ជាជីវៈមែន ប៉ុន្ដែយើងខ្ញុំនឹងធ្វើការអប់រំណែនាំ និងពិនិត្យដាក់វិន័យតាមបែបកងកម្លាំងនគរបាលជាតិ»។
លោក ស ថេត អគ្គស្នងការរងនគរបាលជាតិនិងជាស្នងការនគរបាលរាជធានីភ្នំពេញនៅថ្ងៃទី ២ កក្កដា នេះ មិនអាចសុំការបញ្ជាក់បន្ថែមជុំវិញករណីនេះបានទេ ដោយទូរស័ព្ទលោកគ្មានអ្នកទទួល។
ប៉ុន្ដែ Fresh News បានដកស្រង់សម្ដីលោក ស ថេត កាលពីថ្ងៃទី ១ ខែកក្កដា ថា លោកបានព្រមានលាយលក្ខណ៍ជាអក្សរនិងពិន័យតាមច្បាប់កងកម្លាំងនគរបាលជាតិទៅលើមន្ដ្រីនគរបាលទាំង ៣ នាក់នេះ ដែលបានប្រើប្រាស់សិទ្ធិហួសព្រំដែន វិជ្ជាជីវៈទៅលើការចាប់ខ្លួនមុខសញ្ញាជនសង្ស័យ។
លោកបញ្ជាក់ថា៖ «នេះជាបទពិសោធសម្រាប់មន្ដ្រីនគរបាលរបស់យើងទាំងនៅតាមមូលដ្ឋាននិងនៅតាមការិយាល័យ អង្គភាពនានា ត្រូវគោរព និងអនុវត្តតាមបទបញ្ជានិងវិន័យរបស់កងកម្លាំងដែលនាយឧត្តមសេនីយ៍ នេត សាវឿន អគ្គស្នងការនគរបាលជាតិតែងតែធ្វើការណែនាំ។ ករណីនេះខ្ញុំនឹងបន្ដធ្វើការអប់រំដល់កងកម្លាំងទាំងអស់មិនឲ្យមានរូបភាពបែបនេះកើតឡើងទៀតនោះទេ»។
លោក ម៉ៅ សឿត អធិការនគរបាលខណ្ឌច្បារអំពៅបានថ្លែងនៅថ្ងៃទី ២ កក្កដា នេះថា សមត្ថកិច្ចជំនាញរបស់លោកបានបញ្ជូនមន្ត្រីនគរបាល ៣ នាក់នោះទៅកាន់ការិយាល័យបុគ្គលិកនៃស្នងការដ្ឋាននគរបាលរាជធានីភ្នំពេញដើម្បីពិន័យតាមច្បាប់កងកម្លាំងនគរបាលជាតិ ប៉ុន្ដែលោកមិនទាន់ដឹងពីកម្រិតទោសទណ្ឌដែលដាក់ពិន័យនេះទេ។
លោកបន្តថា ចំពោះជនសង្ស័យឈ្មោះ វ៉េ ឡុងរាជ ហៅ ខ្នាក់ រស់នៅសង្កាត់ក្បាលកោះខណ្ឌច្បារអំពៅជាមួយនឹងគ្រឿងញៀន ១ កញ្ចប់តូច ត្រូវបានសមត្ថកិច្ចជំនាញកសាងសំណុំរឿងបញ្ជូនទៅតុលាការហើយកាលពីថ្ងៃទី ១ ខែកក្កដា។
គួររំឭកថា កាលពីថ្ងៃទី ២៩ ខែមិថុនា នៅមូលដ្ឋានសង្កាត់ក្បាលកោះ មានមន្ដ្រីនគរបាល ៣ នាក់បានបើកម៉ូតូចុះចាប់មុខសញ្ញាពាក់ព័ន្ធគ្រឿងញៀនម្នាក់ដោយចាប់វាយខ្នោះទៅក្រោយ និងលើកដាក់ម៉ូតូ ព្រមទាំងប្រើប្រាស់ហិង្សាយកជង្គង់ទៅសង្កត់ក និងប្រើជើងទាត់ តែត្រូវបានពលរដ្ឋនៅក្បែរកន្លែងប្រតិបត្តិការថតវីដេអូយកមកបង្ហោះលើ Facebook ហើយត្រូវបានគេចែកចាយជាបន្តបន្ទាប់ ដែលធ្វើឲ្យមានការរិះគន់ជាច្រើនទៅលើសមត្ថកិច្ចអនុវត្តច្បាប់៕
