.jpg)
អ្នកជំនាញស៊ីម៉ាក់កំពុងកកាយយកគ្រាប់មិនទាន់ផ្ទុះ ចេញពីដី នៅក្នុងបន្ទាយទាហានជើងទឹកទួលចេកកាលពីថ្ងៃទី ២០ ខែមិថុនា។ រូបថត សហការី
កំពង់ឆ្នាំងៈ គ្រាប់យុទ្ធភណ្ឌមិនទាន់ផ្ទុះចម្រុះជាច្រើនប្រភេទសរុប ជិត ១០០០ គ្រាប់ ត្រូវបានក្រុមមន្ត្រីជំនាញ នៃមជ្ឈមណ្ឌលកំចាត់មីនកម្ពុជា រកឃើញកាលពីរសៀលថ្ងៃទី ២០ ខែមិថុនា នៅក្នុងរណ្ដៅដ៏ធំមួយ ដែលមានទីតាំងស្ថិតក្នុងបន្ទាយទាហានជើងទឹកទួលចេក ស្ថិតនៅភូមិកោះថ្កូវ ឃុំកោះថ្កូវ ស្រុកជលគិរី ខេត្តកំពង់ឆ្នាំង។
លោក ឃឹម យ៉ុង អធិការស្រុកជលគិរី បានប្រាប់ ភ្នំពេញ ប៉ុស្តិ៍ នៅថ្ងៃទី ២១ ខែមិថុនាថា គ្រាប់យុទ្ធភណ្ឌចម្រុះជាច្រើនប្រភេទដែល ក្រុមមន្ត្រី CMAC បានជីកកាយរកឃើញ នៅក្នុងទីតាំងខាងលើនេះ រួមមានគ្រាប់បែកដៃមួយគ្រាប់ B-41 ចំនួន ១៣៣ គ្រាប់ B-40 ចំនួន ២៦ គ្រាប់ B-60 ចំនួន ២ គ្រាប់ Dk-82 ចំនួន ២ គ្រាប់ និង គ្រាប់ ១២,៧ មីលីម៉ែត្រ ចំនួន ៧៣១ គ្រាប់។
លោក យ៉ុង បានថ្លែងថា៖«គ្រាប់យុទ្ធភណ្ឌមិនទាន់ផ្ទុះទាំងនោះ ទំនងត្រូវបានគេលាក់ទុក តាំងពីសម័យសង្គ្រាម ក្នុងទសវត្សរិ៍ឆ្នាំ ១៩៧០ មកម្ល៉េះ ព្រោះទីនេះ ជាបន្ទាយទាហានជើងទឹក»។
បើតាមរបស់លោក យ៉ុង នៅពេលនេះ ក្រុមមន្ត្រី CMAC កំពុងបន្តស្រាវជ្រាវ និងរុករកគ្រាប់យុទ្ធភណ្ឌមិនទាន់ផ្ទុះនៅក្នុងបរិវេណទីតាំងបន្ទាយយោធាខាងលើនេះ ខណៈគ្រាប់យុទ្ធភណ្ឌ ដែលបានជីកកាយរកឃើញ កាលពីរសៀលពុធនោះ ត្រូវ បាននាំយកទៅរក្សាទុកជាបណ្ដោះអាសន្ន នៅក្នុងឃ្លាំងសុវត្ថិភាពរបស់ CMAC ដើម្បីរង់ចាំពេលវេលារៀបចំពិធីដុតកម្ទិចចោលនៅពេលក្រោយ។
ប្រធានក្រុមការងារដោះមីនចល័តរបស់ CMAC លោក សុខ ចិន្តា ដែលកំពុងបំពេញបេសកកម្មការងារ រុករកនិងជីកកាយដោះយកគ្រាប់យុទ្ធភណ្ឌមិនទាន់ផ្ទុះ នៅក្នុងទីបន្ទាយយោធាខាងលើនេះ បានប្រាប់ភ្នំពេញប៉ុស្តិ៍ថា នៅថ្ងៃទី ២១ ខែមិថុនា ក្រុមការងាររបស់លោក បានជីកកាយរកឃើញគ្រាប់កាំភ្លើងធំប្រភេទ ៨០ មីលីម៉ែត្រមួយគ្រាប់ថែមទៀត។
លោកចិន្តា បានបញ្ជាក់ថា៖«ប្រតិបត្តិការស្រាវជ្រាវ និងរុករកគ្រាប់យុទ្ធភណ្ឌមិនទាន់ផ្ទុះ នៅក្នុងទីបន្ទាយយោធាទួលចេកនេះ នៅមិនទាន់ចប់សព្វគ្រប់នៅឡើយទេ ហើយយើងគិតថា អាចនឹងនៅមានគ្រាប់យុទ្ធភណ្ឌមួយចំនួនទៀត ដែលត្រូវបានគេកប់លាក់ទុក នៅក្នុងទីតាំងនេះ»៕
