ភ្នំពេញៈ សមត្ថកិច្ចខេត្តកំពង់ចាម កាលពីរសៀលថ្ងៃទី ១៩ ខែមេសា ម្សិលមិញ បានឃាត់ខ្លួនស្ត្រីម្នាក់នៅតាមផ្លូវជាតិលេខ ៧ ក្នុងភូមិ ត្រពាំងធំ ឃុំស្រងែ ស្រុកព្រៃឈរ ខេត្តកំពង់ចាម និង បានបញ្ជូនទៅសាលាដំបូងខេត្ត ក្រោយពីស្ត្រីរូបនេះបានជះទឹកអាស៊ីតលើប្តី កាលពីយប់ថ្ងៃទី ១៧ ខែមេសា នៅផ្ទះខ្លួនក្នុងភូមិអូរជ្រក ឃុំក្រួច ស្រុកព្រៃឈរ និងបានស្លាប់តាមផ្លូវពេលបញ្ជូនទៅមន្ទីរពេទ្យ។
សមត្ថកិច្ចខេត្តកំពង់ចាមបានឲ្យដឹងថា កាលពីយប់ថ្ងៃទី១៦ ខែមេសា ដែលជាថ្ងៃចូលឆ្នាំចុងក្រោយ បុរសឈ្មោះ មិន នួន អាយុ ៤១ ឆ្នាំ កំពុងដេកលង់លក់នៅផ្ទះគាត់ ។ ពេលនោះស្ត្រីជនសង្ស័យឈ្មោះ ពិន ជា អាយុ ៤៤ ឆ្នាំ ត្រូវជាប្រពន្ធបានយកទឹកអាស៊ីតទៅស្រោចលើគាត់រួចក៏គេចខ្លួនបាត់។ ចំណែកជនរងគ្រោះត្រូវបានសាច់ញាតិដឹកយកទៅមន្ទីរពេទ្យ ប៉ុន្តែបានស្លាប់នៅតាមផ្លូវ។
លោក តក់ សុខេង មេប៉ុស្តិ៍នគរបាលឃុំក្រួចបានប្រាប់ឲ្យដឹងថា ករណីនេះដោយសារស្ត្រីជាជនសង្ស័យខឹងប្តីមានស្រី។
លោកបានបញ្ជាក់ថា៖ «ផ្ទះគាត់រស់នៅឆ្ងាយដាច់ពីអ្នកដទៃ។ ពេលកើតហេតុភ្លាមបងប្អូនជនរងគ្រោះបានយកគាត់ទៅមន្ទីរពេទ្យ ដោយមិនបានតេមកប៉ុស្តិ៍យើងភ្លាមទេ។ ពេលទៅដល់ពេទ្យទើបគាត់តេមកយើង ហើយវាជាឱកាសសម្រាប់ជនល្មើសរត់គេចខ្លួន។ បើយើងមើលជាក់ស្តែងគឺគាត់ជះលើមុខ តែជាក់ស្តែងអាស្រ័យលើចម្លើយរបស់ជនសង្ស័យ»។
លោក សុខេង បានបន្តថា គ្រួសារនេះមានកូន២នាក់ ប្រុសម្នាក់ស្រីម្នាក់។
លោក ម៉ន ម៉ៃ មេឃុំក្រួច បានឲ្យដឹងថា ជនរងគ្រោះជាអ្នកបើកបររថយន្តឡើងចុះភ្នំពេញ ហើយមានប្រពន្ធចុងម្នាក់នៅខេត្តកំពង់ស្ពឺ។ លោកថា គ្រួសារនេះកាលពីឆ្នាំមុន ធ្លាប់បានមកជួបអាជ្ញាធរឃុំដើម្បីសុំលែងដោយប្រពន្ធជាអ្នកសុំលែង តែប្តីមិនព្រម។
លោកថា៖«គាត់មកលែងលះតែក្រោយសម្របសម្រួលក៏ត្រូវគ្នាវិញ។ គាត់មកសុំលែងដោយសាររស់នៅមិនត្រូវគ្នាជាមួយប្រពន្ធ។ ប្រពន្ធវាយទៅរត់ទៅនៅបើកឡានឲ្យគេហើយមានប្រពន្ធមួយទៀត។ តែក្រោយមកគាត់មករស់នៅត្រូវគ្នាវិញ។ ផ្ទះគាត់នៅឆ្ងាយពីគេប្រហែល៥០០ម៉ែត្រពីផ្លូវ»។
ឧត្តមសេនីយ៍ត្រី ហេង វុទ្ធី ស្នងការរងផែនព្រហ្មទណ្ឌបានឱ្យដឹងថា ស្ត្រីសង្ស័យបានសារភាពហើយថាមានមូលហេតុ២យ៉ាងដែលគាត់សម្រេចជះទឹកអាស៊ីត។
លោកថ្លែងថា៖ «គាត់បញ្ជាក់មូលហេតុ២យ៉ាង ទី១គឺប្តីគាត់មានស្រី ហើយទី២គាត់ខ្ចីលុយគេហើយឲ្យគាត់ (ប្រពន្ធ)អ្នកសង»។ ប្តីក៏ធ្លាប់ជាប់ពន្ធនាគារករណីគ្រឿងញៀន។ ប្រពន្ធគឺជាកម្មការីរោងចក្រកាត់ដែរ ហើយប្តីជាកម្មករសំណង់»។
លោក វុទ្ធី បន្តថា៖ «គាត់ថាគាត់ទិញទឹកអាស៊ីតពីភ្នំពេញមួយដប់ទឹកសុទ្ធតូច តែយើងមិនដឹងប្រភេទអីទេ ហើយចំណុះប៉ុន្មានទេ។ យើងរកមិនឃើញដបនោះទេ។ គាត់ថាប្តីកំពុងដេក គាត់ជះពីលើចំមុខតែម្តង»។
លោកបានបញ្ជាក់ថា ជនសង្ស័យត្រូវបានកសាងសំណុំរឿងបញ្ជូនទៅតុលាការហើយ តែតុលាការមិនទាន់ចោទប្រកាន់ពីបទអ្វីនៅឡើយទេ៕