.jpg)
កសិករក្នុងស្រុកគងពិសីកំពុងស្ទូងស្រូវក្នុងស្រែគ្មានទឹកនាពេលកន្លងមក។ ហេង ជីវ័ន
ភ្នំពេញៈ ស្រូវចំនួន ៣៩ ៩៦៦ ហិកតា ស្ថិតក្នុងខេត្តចំនួន ៧ កំពុងជួបគ្រោះរាំងស្ងួតខ្វះទឹក ហើយក្រសួងធនធានទឹកនិងអាជ្ញាធរ កំពុងចាប់ផ្ដើមប្រើម៉ាស៊ីនបូមទឹកដាក់ ដើម្បីជួយសង្គ្រោះស្រូវពលរដ្ឋនៅតាមតំបន់ខ្លះ ដែលជិតប្រភពទឹក ខណៈដែលមន្ត្រីនិយាយថា គ្រោះរាំងស្ងួតក្នុងតំបន់ទាំងនោះនឹងអាចបន្តរយៈពេលជាង ១ ខែទៀត។
លោក កែវ វី អ្នកនាំពាក្យគណៈកម្មាធិការជាតិ គ្រប់គ្រងគ្រោះមហន្តរាយបានប្រាប់ភ្នំពេញប៉ុស្ដិ៍ កាលពីម្សិលមិញថាដីស្រែដែលកំពុងជួបគ្រោះរាំងស្ងួតទាំងនេះគឺនៅខេត្តបន្ទាយមានជ័យមាន ១៧ ៦៤៧ ហិកតា បាត់ដំបង ៧ ៧២៣ ហិកតា កំពង់ធំ ៧ ៥៦៣ ហិកតា កំពង់ចាម ៥ ៣៩៨ ហិកតា ឧត្តរមានជ័យ ៥១៥ ហិកតា ព្រៃវែង ៦២០ ហិកតា និងពោធិ៍សាត់មានចំនួន ៥០០ ហិកតា។
លោកថា៖ «នៅក្នុងហ្នឹង ស្រែខ្លះយើងកំពុងអន្តរាគមន៍បូមទឹកទៅជួយសង្គ្រោះហើយស្រែខ្លះទៀត យើងកំពុងពិនិត្យរកប្រភពទឹក ហើយតំបន់មួយចំនួនទៀតយើងអត់មានប្រភពទឹកគឺត្រូវរង់ចាំទឹកភ្លៀង។ ស្ថានភាពនេះដោយសារភាគច្រើននៅតំបន់ភាគពាយព្យនិងតំបន់ភាគខាងជើងហ្នឹង ទឹកភ្លៀងមានធ្លាក់ដែរ ប៉ុន្តែវាមានតិចធ្វើឱ្យទឹកសម្រាប់ដំណាំស្រូវហ្នឹងវាអត់គ្រប់គ្រាន់»។
បើតាមលោក វី ក្នុងចំណោមស្រូវរងគ្រោះរាំងស្ងួតទាំងនេះ គឺជាប្រភេទស្រូវស្រាល ដែលកសិករបានដាំដោយការពង្រោះខ្លះនិងស្ទូងខ្លះតាំងពីដើមឆ្នាំ ហើយក្រៅពីស្រូវ ខេត្តទាំងនេះ ក៏មានដំណាំរួមផ្សំដូចជាពោត និងដំឡូង ក៏ត្រូវរងការខូចខាតដោយសារខ្វះទឹកនេះដែរ ក្នុងនោះក៏មានដំណាំពោតជាច្រើនពាន់ហិកតាស្ថិតក្នុងខេត្តប៉ៃលិន បានក្រៀមស្វិតដើមងាប់ជាបន្តបន្ទាប់។
លោកបន្តថា គ្រោះរាំងស្ងួតនេះនឹងធ្វើឱ្យប៉ះពាល់ស្រូវ និងដំណាំរួមផ្សំនេះកាន់តែច្រើនថែមទៀត ព្រោះបើតាមក្រសួងធនធានទឹកបានព្យាករថា នៅក្នុងខែសីហាខាងមុខនេះនឹងកើតមានកូនរដូវប្រាំង។
លោកថា៖ «កាលណាមានកូនរដូវប្រាំងកើតឡើង វាអាចមានប៉ះពាល់បន្ថែមទៀត អ៊ីចឹងយើងបានចាប់ផ្ដើមបូមទឹកសង្គ្រោះចាប់ពីឥឡូវនេះទៅ»។
ភ្នំពេញប៉ុស្ដិ៍ មិនអាចទាក់ទងសុំការអធិប្បាយពីលោក ចាន់ យុត្ថា អ្នកនាំពាក្យក្រសួងធនធានទឹកនិងឧតុនិយមបានទេកពីថ្ងៃម្សិលមិញ ដោយទូរស័ព្ទចូល តែលោកចុចបិទ។
ទោះជាយ៉ាងណា យោងតាមសេចក្ដីជូនដំណឹងមួយរបស់ក្រសួងធនធានទឹកកាលពីថ្ងៃទី ១៦ ខែកក្កដាបញ្ជាក់ថា ចាប់ពីថ្ងៃទី ១៦ ដល់ថ្ងៃទី ២២ ខែ កក្កដា ខេត្តនៅតាមបណ្ដាមាត់សមុទ្រ គឺមានភ្លៀងធ្លាក់ពីមធ្យមទៅច្រើន ខេត្តនិងរាជធានីនៅតំបន់ទំនាបខាងត្បូងភាគកណ្ដាល និងខាងកើត ដែលមានព្រំប្រទល់ជាប់វៀតណាម មានភ្លៀងធ្លាក់ពីមធ្យមទៅបង្គួរ ខណៈខេត្តនៅភាគពាយព្យ និងខ្ពង់រាបមានភ្លៀវធ្លាក់ពីកម្រិតតិចទៅបង្គួរ។
លោក សាយ សុផាត ប្រធានមន្ទីរកសិកម្ម រុក្ខាប្រមាញ់ និងនេសាទខេត្តប៉ៃលិន បានប្រាប់ភ្នំពេញប៉ុស្ដិ៍ម្សិលមិញថា នៅក្នុងខេត្តប៉ៃលិនគឺមានដំណាំពោតសរុបជាង ៧ ពាន់ហិកតា ប៉ុន្តែតាំងពីខែឧសភាមក គ្រោះរាំងស្ងួត បានបំផ្លាញដំណាំពោតទាំងនោះអស់ប្រហែល ៦ ពាន់ហិកតា ហើយក៏មានដំណាំដំឡូងមីជាង ១ ពាន់ហិកតារងប៉ះពាល់ដូចគ្នាដែរ។
លោកបានបញ្ជាក់ថា៖ «ឥឡូវហ្នឹងពលរដ្ឋចាប់ផ្ដើមដាំពោតវិញបណ្ដើរៗហើយ ប៉ុន្តែដោយសារសត្វល្អិតច្រើន និងរង់ចាំទឹកភ្លៀងធ្លាក់ផងនោះ ពួកគាត់មិនទាន់ហ៊ានដាំដុះច្រើននៅឡើយទេ»៕
