.jpg)
ក្មេងស្រីម្នាក់កំពុងអង្គុយអានសៀវភៅ។ Save the Children
ភ្នំពេញៈ អង្គការសង្គ្រោះកុមារ (Save the Children) ប្រចាំប្រទេសកម្ពុជា នៅថ្ងៃទី ២៤ ខែ ឧសភា ស្អែកនេះ នឹងប្រារព្ធខួបទី ១០០ ឆ្នាំ របស់អង្គការនេះជាមួយនឹងអ្វីដែលអង្គការនេះបានរួមចំណែកជួយជំរុញកុមារនៅកម្ពុជាឲ្យសម្រេចបាននូវក្តីស្រមៃរបស់ពួកគេ នៅថ្ងៃអនាគត។
លោកស្រី Elizabeth Pearce នាយិកានៃអង្គការសង្គ្រោះកុមារប្រចាំប្រទេសកម្ពុជា បានថ្លែងនៅក្នុងសេចក្តីប្រកាសព័ត៌មានមួយដែលទទួលបានដោយភ្នំពេញប៉ុស្តិ៍កាលពីថ្ងៃទី ២១ ឧសភា ថា៖ «យើងដឹងថា កុមារទាំងអស់មានគំនិតខ្លះៗ អំពីថា តើពួកគេចង់ក្លាយជានរណានាពេលអនាគតប៉ុន្តែជាអកុសលមិនមែនកុមារទាំងអស់សុទ្ធតែមានមធ្យោយធ្វើឲ្យក្តីស្រមៃរបស់ខ្លួន ក្លាយជាការពិតនោះទេ»។ «យើងចង់ឲ្យកុមារទាំងអស់ មិនថាពួកគេរស់នៅកន្លែងណាទេ ឬពួកគេមានប្រវត្តិអ្វីនោះទេ ពួកគេគួរតែអាចសម្រេចក្តីស្រមៃរបស់ខ្លួនសម្រាប់អនាគត»។
លោកស្រីបន្តថា៖ «យើងជឿថា ទិដ្ឋភាពសំខាន់មួយ ដើម្បីសម្រេចចក្ខុវិស័យនេះ គឺតាមរយៈគោលនយោបាយជាតិស្តីពីការគាំពារ និងការអភិវឌ្ឍកុមារតូច (ECCD)»។
ក្នុងឆ្នាំ ២០១០ រដ្ឋាភិបាល បានអនុម័តគោលនយោបាយជាតិស្តីពីការគាំពារ និងការអភិវឌ្ឍកុមារតូច ECCD ជាមួយនឹងចក្ខុវិស័យដែលចែងថា កុមារទាំងអស់តាំងពីពេលចាប់កំណើតដល់អាយុក្រោម ៦ ឆ្នាំត្រូវទទួលបានការការពារនិងសេវាអភិវឌ្ឍន៍ ជាពិសេសកុមារ ដែលងាយរងគ្រោះ កុមាររងគ្រោះ និងកុមារក្រីក្រ។ ក្នុងឆ្នាំ ២០១៤ ផែនការសកម្មភាពជាតិរបស់ ECCD ២០១៤‑២០១៨ ត្រូវបានរៀបចំឡើង។
ទោះយ៉ាងណាលោកស្រីថ្លែងថា ជាក់ស្តែងមិនមែនកុមារទាំងអស់សុទ្ធតែមានឱកាសស្មើគ្នានោះទេ។ មិនមានអ្វីភ្ញាក់ផ្អើលទេ វារឹតតែលំបាកខ្លាំង សម្រាប់កុមារគ្រួសារក្រីក្រនៅតំបន់ជនបទក្នុងការទទួលបានអត្ថប្រយោជន៍នៃ ECCD ជាងកុមារគ្រួសារវណ្ណៈកណ្តាល និងវណ្ណៈខ្ពស់នៅក្នុងទីក្រុងធំៗ ដែលមានធនធានច្រើនជាងនិងសេវាច្រើនជាង»។
លោកស្រី Elizabeth Pearce ថ្លែងថា៖ «នៅអង្គការសង្គ្រោះកុមារប្រចាំកម្ពុជា រួមជាមួយក្រសួងអប់រំ យុវជន និងកីឡា យើងផ្តោតទៅលើកិច្ចខិតខំប្រឹងប្រែង ECCD របស់យើង នៅតាមសហគមន៍មួយចំនួនក្នុងចំណោមសហគមន៍ក្រីក្រ និងដាច់ស្រយាលបំផុត ដូចជានៅតាមភូមិនៅក្នុង និងនៅជុំវិញបឹងទន្លេសាប ដើម្បីឲ្យកុមារទាំងអស់អាចទទួលបានអត្ថប្រយោជន៍ពី ECCD»។
លោក ហ៊ុយ ឃី អ្នកនាំពាក្យនិងជាទីប្រឹក្សាជាន់ខ្ពស់ផ្នែកតស៊ូមតិ និងគោលនយោបាយរបស់អង្គការសង្គ្រោះកុមារ បានប្រាប់ភ្នំពេញប៉ុស្តិ៍ថា អង្គការរបស់លោកបានអំពាវនាវឲ្យក្រសួងនានា សង្គមស៊ីវិល វិស័យឯកជន និងសាធារណជនផ្តល់អាទិភាពដល់ ECCD។
លោក ឃី បន្តថា៖ «យើងជឿថា នេះជាការវិនិយោគមួយក្នុងចំណោមការវិនិយោគឆ្លាតវៃបំផុត ដែលប្រទេសមួយអាចធ្វើដើម្បីដោះស្រាយបញ្ហាវិសមភាព បំបែកវដ្តនៃភាពក្រីក្រ និងកែលម្អជីវភាពរស់នៅរបស់កុមារ និងអនាគតរបស់ពួកគេ»។
លោក ឃី បន្ថែមថា កុមារតូចៗទទួលបានការការពារនិងគុណភាពនៃការអភិវឌ្ឍ។ នៅក្នុងឆ្នាំសិក្សា ២០១៨‑២០១៩ មានតែ ៣៩,៩% នៃកុមារអាយុ ៣‑៥ ឆ្នាំ និង១៨,៥% នៃកុមារអាយុ ៣ ឆ្នាំប៉ុណ្ណោះដែលទទួលបានសេវាអប់រំ។ កម្មវិធីអប់រំកុមារតូច ដែលបំពេញបានតាមស្តង់ដារ គឺមានតែ ៣២,២៤% ប៉ុណ្ណោះ។
លោក ឃី ថ្លែងថា៖ «កុមារពិការទ្វេដងគឺទំនងជាមិនបានចូលរៀនធៀបនឹងកុមារមិនពិការក្នុងប្រទេសកម្ពុជា»។ «មានតែ ៤ % ប៉ុណ្ណោះនៃកុមារពិការវ័យជំទង់បានបញ្ចប់ថ្នាក់អនុវិទ្យាល័យ បើធៀបនឹងកុមារមិនពិការវ័យដូចគ្នា។ វេទិកាសេដ្ឋកិច្ចពិភពលោក បានដាក់ពិន្ទុគុណភាពនៃការអប់រំបឋមសិក្សារបស់កម្ពុជាចំនួន ២,៩ នៃពិន្ទុសរុប ៧ (ប្រទេសទី ១១៤ ក្នុងចំណោម ១៤០ ប្រទេស)។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា បានប្រាប់ភ្នំពេញប៉ុស្តិ៍ថា ការងារអប់រំកុមារតូច ស្ថិតនៅក្នុងការងារអាទិភាពមួយ របស់ក្រសួងអប់រំ ហើយគឺជាអនុវិស័យមួយ ក្នុងចំណោមអនុវិស័យទាំង ៧ របស់ក្រសួងអប់រំ នៅក្នុងកំណែទម្រង់រួម។
លោកថា៖ «ហើយនៅក្នុងនោះ គឺផ្តោតលើការងារផ្សេងៗពីគ្នា។ ប៉ុន្តែ ជាក់ស្តែងដែលជាអាទិភាពនោះគឺ យើងផ្តោតទៅលើអាហារូបត្ថម្ភរបស់កុមារតូច ក៏ដូចជាការងារបច្ចេកទេសរបស់ក្រសួងទាក់ទងទៅនឹងការងាររៀន និងបង្រៀនរបស់កុមារតូចផងដែរ»។
លោក សុវាចា បញ្ជាក់ថា ក្រសួងអប់រំកំពុងធ្វើបច្ចុប្បន្នភាព គោលនយោបាយជាតិ ស្តីពីការគាំពារ និងការអភិវឌ្ឍកុមារតូច ហើយឯកសារនេះ ជិតនឹងបញ្ចប់ហើយ ដោយរង់ចាំការពិនិត្យ និងសម្រេចចុងក្រោយ។ «២០១៤-២០១៨ គឺការងារហ្នឹង យើងទទួលបានទៅតាមការគ្រោងទុក។ ប៉ុន្តែ ទោះជាយ៉ាងនេះក្តី ក៏ក្រុមការងារបច្ចេកទេសកំពុងតែបន្ត ខិតខំធ្វើឱ្យរឹតតែល្អជាងនេះ។ យើងសិក្សាទៅលើបញ្ហាប្រឈម ក៏ដូចជាបទពិសោធកន្លងមកហ្នឹងពង្រឹងបន្ថែមទៅលើការងារសហប្រតិបត្តិការជាមួយនឹងគ្រប់ភាគីពាក់ព័ន្ធ ជាពិសេសគឺយើងធ្វើការជាមួយនឹងដៃគូអភិវឌ្ឍន៍ ដែលរួមមានអង្គការសហប្រជាជាតិពាក់ព័ន្ធទៅនឹងរឿងកុមារតូច ក៏ដូចជាអង្គការសង្គមស៊ីវិល ហើយនិងមាតាបិតាផ្ទាល់ដែលនៅតាមសហគមន៍ដែរ»៕
