ឧត្តរមានជ័យៈ អាជ្ញាធរក្រុងសំរោង ខេត្តឧត្ដរមានជ័យបានស្នើឱ្យពលរដ្ឋដែលបានសាងសង់ ខ្ទម ផ្ទះ តូប និងកំពុងរស់នៅខុសច្បាប់លើដីក្នុងតំបន់ទេសចរណ៍ធម្មជាតិរលួសធំ ត្រូវប្រញាប់រុះរើជាបន្ទាន់ និងបានព្រមានចាត់វិធានការរដ្ឋបាលប្រសិនបើមិនធ្វើតាមការកំណត់ទេនោះ។
នៅក្នុងលិខិតចេញដោយអភិបាលក្រុងសំរោងចុះថ្ងៃទី ២២ ខែឧសភាឆ្នាំនេះបានចាត់ទុកការសង់កូនផ្ទះ ខ្ទម និងតូប ខុសច្បាប់នៅក្នុងតំបន់ទេសចរណ៍ធម្មជាតិដែលមានអាយុកាលរាប់រយឆ្នាំមកហើយនោះថាអាចបង្កការប៉ះពាល់ដល់ភ្ញៀវទេសចរជាតិ និងអន្តរជាតិដែលទៅទស្សនាតំបន់នោះ។
លិខិតនេះក៏បានស្នើឱ្យពលរដ្ឋរុះរើខ្លួនឯងក្នុងរយៈពេល ១៥ ថ្ងៃចាប់ពីថ្ងៃជូនដំណឹងនេះទៅ និងបានតម្រូវឱ្យចូលរួមសហការជាមួយអាជ្ញាធរផងដែរ។
បើហួសពីការកំណត់នេះអាជ្ញាធរនឹងជួលគ្រឿងចក្ររុះរើ និងមិនទទួលខុសត្រូវចំពោះការខូចខាត និងផលប្រយោជន៍ផ្សេងៗទៀតឡើយ។
ឆ្លើយតបទៅនឹងលិខិតបង្គាប់ឲ្យរុះរើរបស់អាជ្ញាធរក្រុងសំរោងនេះលោកស្រី ណារ៉េន អ្នកសម្របសម្រួលរបស់អង្គការអាដហុកខេត្តឧត្តរមានជ័យបានយល់ស្របទៅនឹងការអនុវត្តរបស់អាជ្ញាធរដែលតម្រូវឲ្យពលរដ្ឋរុះរើសំណង់ខុសច្បាប់នេះ ប៉ុន្តែលោកស្នើដល់អាជ្ញាធរគួរគិតគូរផ្តល់ដីនៅតំបន់ផ្សេងដែលជាដីសម្បទានសង្គមកិច្ចឱ្យពួកគាត់ដើម្បីរកចំណូលមកផ្គត់ផ្គង់ជីវភាពប្រចាំថ្ងៃ។
លោកបានលើកឡើងថា៖ «ប្រជាពលរដ្ឋគាត់ក្រីក្រ និងមានជីវភាពខ្វះខាត ហេតុនេះគាត់ចូលមករស់នៅ និងកាន់កាប់ដីរដ្ឋដោយខុសច្បាប់ ដូច្នេះរដ្ឋាភិបាលគួរគិតគូរជួយផ្តល់ដីសង្គមកិច្ចដល់ពួកគាត់ក្នុងការអាស្រ័យផលដើម្បីរកចំណូលផ្គត់ផ្គង់ជីវភាព។ រដ្ឋាភិបាលក៏ធ្លាប់បានលើកឡើងដែរថា មិនឲ្យពលរដ្ឋស្លាប់ដោយអត់បាយទេ ហើយយើងបានដឹងថានៅមានដីទីតាំងផ្សេងទៀតក្នុងក្រុងសំរោងដែលអាចផ្តល់ឱ្យពលរដ្ឋជំនួសជាដីសម្បទានសង្គមកិច្ចបាន»។
អភិបាលក្រុង សំរោង លោក អ៊ុន សុភ័ក្រ បានបញ្ជាក់ប្រាប់ភ្នំពេញប៉ុស្ដិ៍តាមទូរស័ព្ទកាលពីម្សិលមិញថា ពលរដ្ឋដែលទៅរស់នៅលើដីតំបន់នោះមានប្រមាណ ១១ គ្រួសារដែលពួកគេភាគច្រើនជាពលរដ្ឋរស់នៅតំបន់ក្បែរៗនោះ ក្នុងនោះក៏មានគ្រួសារទាហានផងដែរ។ ប៉ុន្តែលោកថាពួកគេមានបំណងចង់យកដីនៅទីនោះធ្វើជាកម្មសិទ្ធិផ្ទាល់ខ្លួន និងបានដាំដុះដំណាំផ្សេងនៅទីនោះ។
យ៉ាងណាក្ដីលោក សុភ័ក្រ ក៏បានថ្លែងដែរថានឹងពិនិត្យពីស្ថានភាពគ្រួសារនីមួយៗជាក់ស្ដែងថា តើពួកគាត់ពិតជាគ្មានដីមែន ឬមួយយ៉ាងណា?
លោកបញ្ជាក់ថា៖ «យើងនឹងត្រួតពិនិត្យមើលថា ពលរដ្ឋទាំងនោះពិតជាអត់មានដីបង្កបង្កើនផលឬយ៉ាងណា បើពួកគាត់អត់មែន អាជ្ញាធរនឹងធ្វើរបាយការណ៍ទៅថ្នាក់ខេត្តដើម្បីសុំដីសម្បទានសង្គមកិច្ចជូនពួកគាត់ តែបើពួកគាត់មានដីហើយនៅតែចង់ទន្ទ្រានដីរដ្ឋយកទៀតគឺយើងមិនអាចផ្តល់ឱ្យបានទេ»៕