.jpg)
ដីនិងផ្ទះដែលគេផ្ដល់ជាសំណងដល់ពលរដ្ឋនៅខេត្ត កោះកុង កាលពីឆ្នាំ ២០១៤ ។ រូបថតៈ ផាក់ ស៊ាងលី
កោះកុងៈ អាជ្ញាធរស្រុកបទុមសាគរកំពុងចុះស្រង់ស្ថិតិពីសំណងដែលពលរដ្ឋទទួលបានពីផលប៉ះពាល់ពីក្រុមហ៊ុនចិន UDG ក្រោយពីពលរដ្ឋ៩៣គ្រួសារបានប្តឹងអភិបាលរងខេត្តម្នាក់ និង មន្ត្រីជាច្រើនទៀតទៅខុទ្ទកាល័យលោកនាយករដ្ឋមន្ត្រីពីរឿងបាត់ដី និងប្រាក់សំណងរាប់ម៉ឺនដុល្លារ។
ការប្តឹងសុំអន្តរាគមន៍នេះបានធ្វើឡើងកាលពីថ្ងៃទី ៥ ខែមករា ឆ្នាំនេះ។ ក្នុងនោះពលរដ្ឋទាំង ៩៣ គ្រួសាររស់នៅឃុំ តានូន ស្រុកបទុមសាគបានប្តឹងលោក អន ភារៈ អភិបាលរងខេត្ត និងជាអតីតអភិបាលស្រុកបទុមសាគរ, លោក វាំង វីរៈ មេឃុំតានូន និងមន្ត្រីសុរិយោដីស្រុកលោក ពៅ ចាន់ថន ដោយចោទថា បានឃុបឃិតគ្នារំលោភលើសេចក្តីទុកចិត្តរបស់ពលរដ្ឋក្នុងគោលនយោបាយដោះដូរដីស្រែចម្ការ ផ្ទះជាមួយក្រុមហ៊ុន ចិន Union Development Group (UDG) ។ នេះបើតាមពាក្យបណ្តឹងដែល ភ្នំពេញ ប៉ុស្តិ៍ ទទួលបានកាលពីព្រឹកមិញ។
ពាក្យបណ្តឹងនិងពលរដ្ឋបានឲ្យដឹងថា តាមគោលនយោបាយសំណង គឺក្រុមហ៊ុន និងអាជ្ញាធរបានសន្យាផ្ដល់ឲ្យ ៨ ពាន់ដុល្លារអាមេរិក ក្នុង ១ ហិកតា កាលពីឆ្នាំ ២០០៩។ ប៉ុន្តែជាក់ស្តែងពួកគាត់ខ្លះបានតែ ៣០០ ដុល្លារក្នុង ១ ហិកតា ខណៈខ្លះបានច្រើន និង តិចជាងនេះ។
ពាក្យបណ្តឹងបានសរសេរបន្តថា៖ «តែអ្នកណាតវ៉ាគឺអត់បានប្រាក់ទាំងអស់ នេះមិនខុសពីអំពើប្លន់យកដីផ្ទះស្រែចម្ការរបស់ពួកខ្ញុំទេ»។
ពលរដ្ឋបានសំណូមពរសុំឲ្យលោកនាយករដ្ឋមន្ត្រី ហ៊ុន សែន ជួយរកយុត្តិធម៌ដោះស្រាយជាប្រាក់ឬដីកសិកម្មតាមគោលនយោបាយក្នុង១ហិកតាដោះដូរស្មើនឹង៨ពាន់ដុល្លារ ព្រោះថា «លោក អន ភារៈ និងបក្ខពួកមិនគោរពតាមថ្នាក់លើក្នុងការដោះស្រាយឲ្យសមស្របតាមលិខិតដោះដូរក្នុង១ហិកតា៨ពាន់ដុល្លារទេ»។
ក្រោយពីទទួលបានពាក្យបណ្តឹងនោះ លោក ហូ សិទ្ធី នាយកខុទ្ទកាល័យបានចេញដីកាបញ្ជូនមួយចុះថ្ងៃទី ១៥ ខែមករា ជូនលោកជំទាវអភិបាលខេត្តកោះកុង ដើម្បីពិនិត្យសំណើរបស់ពលរដ្ឋនេះ។
ក្នុងលិខិតដាក់ទៅខុទ្ទកាល័យ ក៏មានភ្ជាប់ស្នាមមេដៃ ចំនួនផ្ទៃដីដែលប៉ះពាល់និងទឹកប្រាក់ដែលបានទទួលផងដែរ។
អ្នកស្រី គុណ សៅ អាយុ ៥៧ ឆ្នាំ ជាពលរដ្ឋម្នាក់ក្នុងចំណោម ៩៣ គ្រួសារបានអះអាងបន្ថែមថា គ្រួសារអ្នកស្រី បានបាត់បង់ដីស្រែនិងចម្ការមានទាំងដំណាំសរុប ៩ ហិកតាកន្លះ។ ប៉ុន្តែ អ្នកស្រីទទួលបានប្រាក់សំណងជាង ១ ៧៥០ ដុល្លារប៉ុណ្ណោះពី លោក អន ភារៈ និង មន្ត្រីពាក់ព័ន្ធ ។
អ្នកស្រីថា៖ «ដី ១ ហិកតា ៨ ពាន់ដុល្លារ ហ្នឹង លក់ដីឲ្យក្រុមហ៊ុន។ លក់ ឬ មិនលក់ក៏គេយកដែរ... ពលរដ្ឋឲ្យវាស់ដីហើយដល់ទៅផ្តិតមេដៃហើយទៅទទួលលុយបានតែជាង១៧៥០ដុល្លារ។ខ្ញុំម៉េចបានប៉ុណ្ណឹង? [អតីត] មេឃុំឈ្មោះ អ៊ុន សុភាព ប្រាប់ថា បើមិនយកមានតែអត់។ អ្នកណាខ្លះយកទទេ»។
លោកស្រី មិថុនា ភូថង អភិបាលខេត្តកោះកុងសុំមិនធ្វើអត្ថាធិប្បាយទេ កាលពីព្រឹកមិញ ដោយសុំឲ្យសួរទៅលោក អ៊ូច ទូច នាយករដ្ឋបាលសាលាខេត្តវិញ។
លោក អ៊ូច ទូច បានថ្លែងថា លោកមិនបានចាំពីករណីនេះទេ ដោយសារឯកសារច្រើនពេក។ ទោះយ៉ាងណាលោកប្រាប់ថា លោកធ្លាប់បានឃើញឯកសារពីទំនាស់នេះ តែលោកមិនចាំព័ត៌មានច្បាស់ទេ ហើយសុំពេលមើលឯកសារនោះឡើងវិញសិន មុននឹងធ្វើអត្ថាធិប្បាយ។
លោក គា តេ មេភូមិតាបាក់រនាស់ បានឲ្យដឹងថា លោកបានទទួលការណែនាំពីអាជ្ញាធរថ្នាក់លើឲ្យចុះស្រង់ស្ថិតិពីសំណងដែលពលរដ្ឋទទួលបាន ហើយចាប់តាំងពីដើមខែមេសានេះរហូតមកទល់ពេលនេះ លោកស្រង់បានជាង ២០ គ្រួសារ ហើយពេលស្រង់ចប់លោកនឹងធ្វើរបាយការណ៍ជូនថ្នាក់លើ។
លោកថា៖ «យើងស្រង់ព្រោះចង់ដឹងថា ផ្ទៃដីដែលពលដ្ឋទទួលបានហ្នឹងបានប៉ុន្មាន ទៅតាមស្រុក។ ទើបតែស្រង់បានប៉ុន្មានភាគរយហ្នឹង ព្រោះពលរដ្ឋខ្លះបានលក់ផ្ទេរសិទ្ធិខ្លះ»។
លោកបានអះអាងថា លោកមិនបានដឹងពីរឿងពីទំនាស់អតីតកាលទេ ព្រោះលោកទើបតែធ្វើជាមេភូមិបានជិត ១ ឆ្នាំប៉ុណ្ណោះ។
លោក វាំង វីរៈ មេឃុំតានូន បានឲ្យដឹងថា ការស្រង់នេះគឺដើម្បីចង់ដឹងពីទិន្នន័យសំណងដែលពលរដ្ឋទទួលបាន ដើម្បីផ្ទៀងផ្ទាត់ជាមួយឯកសារដែលតម្កល់ទុក ព្រោះថា ពលរដ្ឋខ្លះបានទទួលសំណងរួចហើយ តែគាត់ថាមិនទាន់បានទទួល។
លោក មេឃុំ បានសុំមិនធ្វើអត្ថាធិប្បាយបន្តនៅពេលសួរនាំរឿងការចោទប្រកាន់ផ្តល់សំណងមិនគ្រប់ដោយលោកថា កាលនោះលោកមិនទាន់បានធ្វើជាមេឃុំទេ។
លោក អន ភារៈ អភិបាលរងខេត្តមិនអាចទាក់ទងសុំអត្ថាធិប្បាយបានទេនៅថ្ងៃនេះ។
លោក ញៀប សំអឿន អ្នកសម្របសម្រួលអង្គការអាដហុកខេត្តកោះកុងបានឲ្យដឹងថា ការសន្យារបស់អាជ្ញាធរថាផ្តល់សំណង៨ពាន់ដុល្លារក្នុង ១ ហិកតានោះបានធ្វើឡើងតែពីដំបូងឲ្យគ្រួសារប្រហែល៨គ្រួសារប៉ុណ្ណោះ ដើម្បីបញ្ចុះបញ្ចូលឲ្យពលរដ្ឋរងផលប៉ះពាល់ព្រមចាកចេញ។ ប៉ុន្តែពលរដ្ឋក្រោយៗទៀត មិនទទួលបានដូចការសន្យាទេ ដែលនេះលោកចាត់ទុកថា វាជាការ «និយាយកុហក» ហើយពលរដ្ឋបានចាញ់បោកអាជ្ញាធរខ្លះ ព្រោះពលរដ្ឋមិនទទួលបានព័ត៌មានច្បាស់លាស់៕
