សៀមរាប: អាជ្ញាធរជាតិអប្សរាបានដាក់បម្រាមមិនឲ្យសាធារណជនយកសត្វគ្រប់ប្រភេទទៅលែងចូលក្នុងកសិន្ធុប្រាសាទនានានៃតំបន់រមណីយដ្ឋានអង្គរឡើយ ដើម្បីចៀសវាងគ្រោះថ្នាក់ដល់ភ្ញៀវទេសចរជាអ្វីដែលក្រសួងទេសចរណ៍គាំទ្រចំណាត់ការនេះ ប៉ុន្ដែមគ្គុទ្ទេសក៍ថា គួរហាមលែងតែសត្វសាហាវបានហើយ។
តាមសេចក្តីជូនដំណឹងរបស់អាជ្ញាធរជាតិអប្សរាចុះថ្ងៃទី ៨ ខែវិច្ឆិកា ដែលភ្នំពេញប៉ុស្ដិ៍ទើបទទួលបានពីម្សិលមិញឲ្យដឹងថា ក្នុងន័យសាសនា កសិន្ធុទឹកប្រាសាទត្រូវបានកសាងឡើងប្រដូចជា មហាសមុទ្រព័ទ្ធជុំវិញភ្នំព្រះសុមេរុដែលមានប្រាសាទនានានៅកណ្តាលជាតំណាង។ ម្យ៉ាងទៀត កសិន្ធុ ប្រាសាទដែលបានស្តាររួចត្រូវបានបញ្ចូលទឹកជាប្រចាំដើម្បីរក្សាទឹកទុកក្នុងរដូវប្រាំងក្នុងគោលបំណងទ្រទ្រង់រចនាសម្ព័ន្ធប្រាសាទទាំងមូលឲ្យបានរឹងមាំ។
អាជ្ញាធរជាតិអប្សរាបញ្ជាក់ថា៖ «ទន្ទឹមគ្នានេះប្រាសាទក៏ជាកន្លែងដែលភ្ញៀវទេសចរជាតិ និងអន្តរជាតិផ្តិតយករូបភាពអនុស្សាវរីយ៍ ហើយក្រុមការងារបរិស្ថានរបស់អាជ្ញាធរជាតិអប្សរាតែងតែមកបំពេញការងារសម្អាតវារីជាតិជាប្រចាំ។ ក្នុងន័យនេះសូមសាធារណជនទាំងអស់មេត្តាកុំយកសត្វគ្រប់ប្រភេទទៅលែងចូលក្នុងកសិន្ធុប្រាសាទជាដាច់ខាត»។
លោក ឡុង កុសល អ្នកនាំពាក្យ និងជាប្រធាននាយកដ្ឋានផ្សព្វផ្សាយនៃអាជ្ញាធរជាតិអប្សរាបានថ្លែងពីម្សិលមិញថា តំបន់ទីតាំងនោះជាទីសក្ការបូជា ហើយអ្នកទេសចរភាគច្រើនតែងតែទៅសំពះគោរពបូជាតាមជំនឿសាសនា ឬបួងសួងសុំសេចក្ដីសុខ។ ក្នុងនោះក៏មានអ្នកលួចលែងសត្វជាច្រើនប្រភេទផងដែរដូចជា ត្រី អណ្ដើក និងសត្វមួយចំនួនទៀត ប៉ុន្ដែសកម្មភាពនេះអាជ្ញាធរជាតិអប្សរា មិនគាំទ្រទេ។
លោកបានបញ្ជាក់ថា៖ «យើងហាមនេះ ដើម្បីរក្សាទីតាំងដែលជាកន្លែងគោរពបូជានោះសម្រាប់ភ្ញៀវទេសចរ និងពលរដ្ឋទៅទស្សនាដោយគ្មានការភ័យខ្លាច ឬមិនបង្កគ្រោះថ្នាក់អ្វីដល់អ្នកកម្សាន្ដនៅតំបន់នោះ។ ម្យ៉ាងទៀត គឺយើងចង់រក្សានូវអត្ថន័យដើម ហើយកន្លែងនោះមានសត្វអណ្ដើក សត្វត្រីជាច្រើនប្រភេទរួចមកហើយ យើងមិនចាំបាច់យកសត្វទៅលែងបន្ថែមទៀតទេ»។
លោក តុប សុភ័គ អនុរដ្ឋលេខាធិការក្រសួងទេសចរណ៍បានថ្លែងពីម្សិលមិញថា បញ្ហានេះខាងអាជ្ញាធរជាតិអប្សរាបានចេញសេចក្ដីជូនដំណឹងមួយរួចហើយដើម្បីទប់ស្កាត់ការលែងសត្វគ្រប់ប្រភេទចូលក្នុងកសិន្ធុទឹកប្រាសាទនៃតំបន់រមណីយដ្ឋានអង្គរ។
លោកបន្តថា៖ «ដូចកន្លងមកគឺយើងមានព័ត៌មានថា មានគេលែងក្រពើ ឬសត្វផ្សេងៗទៀតអ៊ីចឹង។ ដោយសារមានករណីនេះកើតឡើង អ៊ីចឹងខាងអាជ្ញាធរជាតិអប្សរា ក៏បានទប់ស្កាត់ក៏ដូចជា ស្នើពលរដ្ឋកុំយកសត្វផ្សេងៗទៅដោះលែងនៅទីនោះទៀត ព្រោះកន្លែងនេះសម្រាប់គោរពបូជា សម្រាប់ភ្ញៀវជាតិ អន្តរជាតិថតរូបអនុស្សាវរីយ៍ ក៏ដូចចង់រក្សាតំបន់នោះជាកន្លែងវប្បធម៌បុរាណដដែល»។
លោកបន្ថែមថា ប្រសិនបើពលរដ្ឋចង់ដោះលែងសត្វតាមជំនឿសាសនានោះ គឺគួរទៅរកកន្លែង ឬទីតាំងដែលត្រូវបានអនុញ្ញាត កន្លែងគោលដៅទេសចរណ៍ដែលគេកំពុងអភិរក្សសត្វ និងស្រះទឹកនៅវត្តអារាមដែលគេអនុញ្ញាត។ ក្រសួងទេសចរណ៍គាំទ្រចំណាត់ការរបស់អាជ្ញាធរជាតិអប្សរាព្រោះចង់ចូលរួមថែរក្សាតំបន់នោះដូចគ្នាដែរ។ ប្រសិនបើលែងសត្វកាចសាហាវចូលទៅកសិន្ធុទឹកប្រាសាទនោះ វាអាចមានគ្រោះថ្នាក់ដល់ភ្ញៀវដែលទៅកម្សាន្ដ។
ទោះយ៉ាងណាលោក ខៀវ ធី មគ្គុទ្ទេសក៍ទេសចរណ៍ផ្នែកភាសាអង់គ្លេស និងជាប្រធានសមាគមមគ្គុទ្ទេសក៍ទេសចរណ៍អង្គរបានថ្លែងពីម្សិលមិញថា អាជ្ញាធរជាតិអប្សរាមិនគួរដាក់កំហិតការលែងសត្វគ្រប់ប្រភេទចូលក្នុងកសិន្ធុទឹកប្រាសាទនោះទេ គួរដាក់កំហិតត្រឹមតែសត្វមានពិស ឬសត្វសាហាវបានហើយប៉ុន្ដែចំពោះសត្វត្រី ឬអណ្ដើក មិនគួរហាមទេ ព្រោះវាជាសត្វដែលមិនបង្កគ្រោះថ្នាក់ដល់មនុស្ស ហើយវាថែមទាំងជួយលម្អតំបន់នោះដែរ។
លោកបន្តថា កន្លងមកនៅតំបន់កសិន្ធុទឹកប្រាសាទនេះតែងត្រូវបានមន្ត្រីរាជការ និងពលរដ្ឋយកសត្វត្រី សត្វអណ្ដើក និងសត្វអន្ទង់ទៅលែងនៅទីនោះដោយពួកគាត់មានជំនឿតៗគ្នាថា ជាការរំដោះគ្រោះ និងបួងសួងសុំសេចក្ដីសុខ។
លោកបញ្ជាក់ថា៖ «ទីតាំងកន្លែងនោះជាកន្លែងគោរពបូជាតាំងពីយូរយារណាស់មកហើយ អ៊ីចឹងក៏មានអ្នកខ្លះ គាត់លែងត្រី លែងអណ្ដើក ប៉ុន្ដែលែងក្រពើ លែងសត្វពស់ ឬសត្វមានពិសដែលកាចសាហាវនានា អាហ្នឹងគួរតែហាម ព្រោះយើងខ្លាចវាបង្កគ្រោះថ្នាក់ដល់មនុស្សមែន»៕