សៀមរាបៈ សហរដ្ឋអាមេរិកបានផ្តល់ជំនួយប្រមាណ ៤២ ម៉ឺនដុល្លារ សម្រាប់អភិរក្ស និងជួសជុលប្រាសាទចំនួន ២ គឺប្រាសាទព្រះវិហារ និងប្រាសាទភ្នំបាខែង ដើម្បីរួមចំណែកក្នុងការជួយអភិរក្សប្រាសាទរបស់កម្ពុជាដែលទីតាំងនេះត្រូវបានទទួលស្គាល់ និងផ្តល់តម្លៃនៅទូទាំងពិភពលោក។
ថ្លែងនៅក្រោយពិធីចុះហត្ថលេខាជាមួយរដ្ឋមន្ត្រីក្រសួងវប្បធម៌នៅលើភ្នំបាខែង ខេត្តសៀមរាបកាលថ្ងៃទី ១៦ មករា លោក W.Patrick Murphy ឯកអគ្គរដ្ឋទូតសហរដ្ឋអាមេរិកប្រចាំកម្ពុជាបានឱ្យដឹងថា ជំនួយទឹកប្រាក់ប្រមាណ ៤២ ម៉ឺនដុល្លារនេះ បែងចែកជា ២។ ក្នុងនោះ ទី ១ ទឹកប្រាក់ ១២ ម៉ឺនដុល្លារសម្រាប់ជូនដល់អាជ្ញាធរជាតិព្រះវិហារដើម្បីអភិរក្សជណ្តើរខាងជើងប្រាសាទព្រះវិហារ និងសម្រាប់ជួសជុលប្រព័ន្ធបង្ហូរទឹកសម័យបុរាណនៅសងខាងនៃជណ្តើរនោះ។
ទី ២ គឺទឹកប្រាក់ ៣០ ម៉ឺនដុល្លារ ផ្តល់ជូនមូលនិធិប្រាសាទពិភពលោក (WMF) សម្រាប់បន្តការងារអភិរក្សប្រាសាទភ្នំបាខែងក្នុងដំណាក់កាលទី ៥ សម្រាប់រយៈពេល ២៤ ខែរហូតដល់ឆ្នាំ ២០២២។ គម្រោងនេះនឹងដំណើរការក្នុងបរិបទនៃទំនាក់ទំនងរយៈពេលយូររបស់អង្គការ WMF ជាមួយអាជ្ញាធរជាតិអប្សរា។
លោក Patrick ថ្លែងថា៖ «ខ្ញុំមានមោទនភាពជាខ្លាំងក្នុងការប្រកាសជំនួយជាថវិកាថ្ងៃនេះក្នុងភាពជាដៃគូជាមួយភាគីពាក់ព័ន្ធនៅកម្ពុជាដោយថវិកានេះនឹងជួយអភិរក្សប្រាសាទទាំងនេះសម្រាប់មនុស្សជំនាន់ក្រោយៗទៀត»។
បើតាមលោក Patrick ទីតាំងប្រវត្តិសាស្ត្រទាំង ២ នេះគឺជាចំណែកដែលនៅស្ថិតស្ថេរយូរអង្វែងនៃបេតិកភណ្ឌវប្បធម៌យ៉ាងពិសេសរបស់កម្ពុជាដែលត្រូវបានទទួលស្គាល់ និងផ្តល់តម្លៃនៅទូទាំងពិភពលោក។
លោករំឭកថា រយៈពេល ២ ទសវត្សរ៍មកនេះ សហរដ្ឋអាមេរិកបានផ្តល់ជំនួយប្រមាណជាង ៥ លានដុល្លាសម្រាប់ការជួយដល់ការអភិរក្សវប្បធម៌នៅកម្ពុជា។ ក្រៅពីជំនួយអភិរក្សវប្បធម៌ សហរដ្ឋអាមេរិកបានជួយដល់វិស័យជាច្រើនទៀត ដូចជា វិស័យសុខភាពសាធារណៈ កសិកម្ម ការជួញដូរកុមារ វិស័យបរិស្ថាន និងការអនុវត្តច្បាប់ជាដើម។
លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈថ្លែងថា ជំនួយរបស់អាមេរិកពេលនេះគឺតំណាងកិច្ចសហប្រតិបត្តិការរវាងប្រទេសទាំង ២ ក្នុងវិស័យវប្បធម៌ ហើយនេះក៏បញ្ជាក់ពីការគាំទ្រយូរអង្វែងរបស់សហរដ្ឋអាមេរិកក្នុងការរួមជាមួយសហគមន៍អន្តរជាតិដើម្បីការពារអភិរក្ស និងជួសជុលបេតិកភណ្ឌវប្បធម៌នៅកម្ពុជា។
លោកស្រីបញ្ជាក់ថា៖ «ខ្ញុំជឿថា ទំនាក់ទំនង និងកិច្ចសហប្រតិបត្តិការដែលឈរលើគុណតម្លៃរួមរវាងប្រទេសកម្ពុជា និងរដ្ឋាភិបាល និងប្រជាជនអាមេរិកនឹងបន្តរឹងមាំបន្ថែមទៀត។
បើតាមលោកស្រី ភឿង សកុណា តាំងពីឆ្នាំ ២០០១ មក អាមេរិកបានផ្តល់នូវមូលនិធិជាច្រើនក្នុងការជួសជុលប្រាសាទនៅកម្ពុជាក៏ដូចជា ការទប់ស្កាត់នូវការជួញដូរវត្ថុបុរាណខុសច្បាប់។ ជាច្រើនឆ្នាំមកនេះកម្ពុជាមានសមត្ថភាពគ្រប់គ្រាន់ក្នុងការធ្វើកិច្ចសហការជាមួយដៃគូបរទេស ហេតុនេះប្រាសាទខ្មែរបុរាណគឺកំពុងត្រូវបានជួសជុលភាគច្រើនដោយអ្នកជំនាញខ្មែរ ដោយទទួលបានថវិកាបន្តបន្ទាប់ពីរដ្ឋាភិបាល និងដៃគូសហការផ្សេងៗទៀត។
លោកស្រីថ្លែងថា៖ «ចំពោះថវិកាយើងទទួលបានថវិកាក្នុងមូលនិធិអង្គរដែលផ្តល់ឱ្យដោយរាជរដ្ឋាភិបាលកម្ពុជា ក៏ដូចជា ថវិកាជាតិ។ ក្រៅពីនោះយើងទទួលបានថវិកាពីមិត្តភក្តិជាច្រើនទៀតមានដូចជា បារាំង ឥណ្ឌា ចិន និងជប៉ុនជាដើម»។
លោកស្រី Bénédicte de Montlaur ជាប្រធាន និងនាយិកាប្រតិបត្តិ WMF បានសម្តែងការរីករាយ និងអរគុណដល់ស្ថានទូតសហរដ្ឋអាមេរិកនៅកម្ពុជាដែលបានផ្តល់ការគាំទ្រក្នុងការអភិរក្សប្រាសាទភ្នំបាខែងដែលយកជាប្រាសាទស្នូលក្នុងការអភិវឌ្ឍនូវសិល្បៈ និងការផ្សព្វផ្សាយនូវទស្សនៈរបស់ខ្មែរ។
លោកស្រីថា៖ «យើងមានចិត្តរំភើបរីករាយក្នុងការបន្តការងារក្នុងការគ្រប់គ្រង និងថែរក្សាតំបន់ឧទ្យានបុរាណអង្គរដើម្បីធ្វើការងារអភិរក្សប្រាសាទទាំងនេះបន្តអប់រំ និងធ្វើឱ្យពិភពលោកបានដឹងឱ្យទូលំទូលាយ»។
លោក ប៉ិច ពិសី ប្រធានអង្គការតម្លាភាពកម្ពុជាបានថ្លែងថា ទាំងជំនួយទ្វេភាគី ក៏ដូចជាជំនួយពហុភាគីជាទូទៅមានយន្តការគណនេយ្យ និងតម្លាភាពខ្ពស់ព្រោះមានភាគីទី ៣ តាមដានការអនុវត្តកិច្ចព្រមព្រៀង។
លោក ពិសី បានថ្លែងថា៖ «ជំនួយទ្វេភាគីក៏ដោយ ពហុភាគីក៏ដោយដែលផ្តល់តាមរយៈដៃគូអភិវឌ្ឍន៍ ខ្ញុំគិតថា ជាទូទៅគេមានយន្តការគណនេយ្យ និងតម្លាភាពខ្ពស់ណាស់ដោយសារគេមានតួអង្គទី ៣ ទី ៤ នៅក្នុងការត្រួតពិនិត្យតាមដានការធ្វើកិច្ចព្រមព្រៀង ហើយការអនុវត្តកិច្ចព្រមព្រៀង និងវាយតម្លៃទៅលើកិច្ចព្រមព្រៀងដែលបានឯកភាពគ្នានោះទៅទៀត»៕