.jpg)
ពលរដ្ឋនៅបុរីកីឡាតវ៉ានៅខាងមុខផ្ទះអ្នកស្រី ស៊ុយ សុផាន កន្លងមក។ ហេង ជីវ័ន
ភ្នំពេញៈ ពលរដ្ឋក្នុងសហគមន៍បុរីកីឡា ដែលបដិសេធទទួលយកសំណងតាមគោលនយោបាយផ្ទះល្វែងទំហំ ២០ ម៉ែត្រការ៉េ និងថវិកា ២០០០ ដុល្លារពីសាលារាជធានីភ្នំពេញកន្លងមកនេះបានប្រមូលផ្ដុំគ្នាតវ៉ាសាជាថ្មីនៅមុខសាលាខណ្ឌ ៧ មករា កាលពីព្រឹកម្សិលមិញដើម្បីទាមទាររកដំណោះស្រាយសមរម្យ និងសុំឲ្យអាជ្ញាធរឈប់ប្រើហិង្សាមកលើពួកគាត់ ក្រោយពីឃើញសាលារាជធានីបានចេញសេចក្ដីជូនដំណឹងដោយដាក់ឱសានវាទឲ្យចាកចេញ។
អ្នកស្រី តូច ចន្ថា អាយុ ៥៦ ឆ្នាំដែលរស់នៅផ្ទះប្រក់សង្កសីភាគខាងជើងអគារបុរីកីឡាចាស់បានប្រាប់ភ្នំពេញប៉ុស្តិ៍ថា ការតវ៉ានេះគឺដោយសារកាលពីថ្ងៃអង្គារ អាជ្ញាធរបានបិទផ្សាយលិខិតជូនដំណឹងស្ដីពីថ្ងៃឱសានវាទចុងក្រោយសម្រាប់ឲ្យពួកគាត់ចាកចេញពីអគារចាស់ និងផ្ទះខៀវក្នុងតំបន់បុរីកីឡាឲ្យអស់ក្នុងរយៈពេល ២ សប្ដាហ៍គិតចាប់ពីថ្ងៃជូនដំណឹងដែលចេញកាលពីថ្ងៃទៅ ១៥ ខែសីហា តទៅ។
អ្នកស្រីបានថ្លែងថា៖ «ក្នុងលិខិតជូនដំណឹងនោះ អាជ្ញាធរបានព្រមានថានឹងចាត់វិធានការរុះរើ និងឈូសឆាយអគារចាស់ និងសំណង់ផ្ទះខៀវនោះក្រោយពេលផុតឱសានវាទ ១ ថ្ងៃ និងមិនទទួលខុសត្រូវចំពោះការខូចខាត ឬបាត់បង់ទ្រព្យសម្បត្តិរបស់ពួកយើងខ្ញុំ»។
ចំណែកអ្នកស្រី អួន កងវិសាគរ ដែលធ្លាប់បានបដិសេធទទួលសំណងពីសាលារាជធានីភ្នំពេញដែលតម្រូវឲ្យគាត់ចាកចេញពីបុរីកីឡាទៅរស់នៅភូមិអណ្ដូងជាមួយនឹងទឹកប្រាក់ ២៥០០ ដុល្លារ និងផ្ទះមួយខ្នងទំហំ ៤ មx៥ ម កាលពីអំឡុងឆ្នាំ ២០១៦-២០១៧ នោះបានចាត់ទុកសេចក្ដីជូនដំណឹងនេះថា ជាការដាក់សម្ពាធថ្មីមួយទៀត ដើម្បីបង្ខំឲ្យពួកគាត់ប្រញាប់ទទួលយកសំណងដែលពួកគាត់ធ្លាប់បដិសេធរួចមកហើយនោះ ដើម្បីយកដីទៅឲ្យក្រុមហ៊ុនចិន។
អ្នកស្រីថ្លែងថា៖ «យើងមកប្រមូលផ្ដុំគ្នានៅមុខសាលាខណ្ឌ៧មករានាពេលនេះគឺដើម្បីសំណូមពរឲ្យមន្ត្រីអាជ្ញាធរបញ្ឈប់ការគំរាមកំហែងបំភិតបំភ័យ និងប្រើហិង្សាមកលើយើងខ្ញុំតទៅទៀត ខណៈក្រុមហ៊ុនមិនបានអនុវត្តតាមកិច្ចព្រមព្រៀងដែលបានកំណត់ដោយប្រមុខរាជរដ្ឋាភិបាលគឺសម្ដេចតេជោ ហ៊ុន សែន»។
ជាមួយគ្នានេះអ្នកស្រី តាំង គីមស្រ៊ូយ អតីតប្រធានសហគមន៍រង្វង់មូល និងជាម្ចាស់ហត្ថលេខីនៃកិច្ចព្រមព្រៀងសាងសង់អគារផ្ទះល្វែងបុរីកីឡាមួយរូបដែរនោះបានថ្លែងថានៅក្នុងកិច្ចព្រមព្រៀងគឺក្រុមហ៊ុនរបស់អ្នកស្រី ស៊ុយ សុផាន បានឯកភាពថានឹងសង់អគារផ្ទះល្វែងចំនួន ១០ អគារមិនមែន ៨ អគារនោះទេ។
អ្នកស្រីបានបន្តថាការសាងសង់អគារមិនគ្រប់តាមគម្រោងផែនការដែលបានកំណត់ក្នុងកិច្ចព្រមព្រៀងនេះហើយដែលធ្វើឲ្យពលរដ្ឋក្នុងសហគមន៍បុរីកីឡាជាច្រើនរយគ្រួសារបានចេញមុខតវ៉ាជាបន្តបន្ទាប់។
អ្នកស្រីបានបញ្ជាក់ថា៖ «អាជ្ញាធររដ្ឋាភិបាលគួរតែជំរុញឲ្យភាគីក្រុមហ៊ុនគោរព និងអនុវត្តតាមកិច្ចព្រមព្រៀងឆ្នាំ ២០០៣ និងផ្ដល់សំណងឲ្យបានសមរម្យជូនប្រជាពលរដ្ឋដែលនៅសេសសល់ទាំងនេះ»។
បើតាមអ្នកស្រី គីមស្រ៊ូយ អាជ្ញាធរចង់ឈូសឆាយអគារបុរីកីឡាចាស់ៗទាំងនោះចោលដើម្បីយកដីឲ្យក្រុមហ៊ុនរបស់ចិនមួយឈ្មោះ CEO KT Pacific ដែលវិនិយោគទៅលើសំណង់អគារពាណិជ្ជកម្មដ៏ធំមួយដែលមានកម្ពស់ ៣៣ ជាន់។
ជុំវិញករណីនេះលោក លឹម សុភា អភិបាលខណ្ឌ៧មករា និង លោក មាន ចាន់យ៉ាដា អភិបាលរងរាជធានីភ្នំពេញ និងប្រធានគណៈកម្មការដោះស្រាយវិវាទដីធ្លីក្នុងតំបន់បុរីកីឡាព្រមទាំង លោក ម៉េត មាសភក្ដី អ្នកនាំពាក្យសាលារាជធានីភ្នំពេញមិនអាចទាក់ទងសុំការពន្យល់បានទេកាលពីម្សិលមិញ៕
