ព្រះវិហារៈ គ្រួសារបរទេសមួយដែលបានបង្កើតគម្រោងអភិរក្ស និងតំបន់អេកូទេសចរណ៍នៅដែនជម្រកសត្វព្រៃភ្នំត្នោតកំពុងតែត្រូវអ្នកភូមិនាំគ្នាផ្តិតមេដៃ បង្ខំឲ្យចាកចេញដោយសារតែទំនាស់រឿងព្រៃឈើ និងសត្វព្រៃនៅក្នុងតំបន់អភិរក្សដែលកំពុងប្រឈមនឹងការកាប់ទន្ទ្រានយកដី។
ពលរដ្ឋនៅក្នុងភូមិចំនួន ៤ ក្នុងឃុំ ស្តៅ ស្រុកសង្គមថ្មីបានកំពុងតែនាំគ្នាផ្តិតមេដៃ ដើម្បីដាក់ញ្ញត្តិទៅអាជ្ញាធរស្រុកក្នុងគោលបំណងបណ្តេញលោក បេន ដាវីស ចេញពីតំបន់នោះ ក្រោយពេលមានទំនាស់រឿងការពារព្រៃឈើ។ នេះបើតាមក្រុមអ្នកភូមិកាលពីម្សិលមិញ។
លោក សឿ ចេង ដែលជាអ្នកដើរប្រមូលស្នាមមេដៃម្នាក់បានឲ្យដឹងថា ពលរដ្ឋប្រមាណ ១៥០ គ្រួសារមានដីស្រែចម្ការនៅក្នុងដែនជម្រកសត្វព្រៃភ្នំត្នោត ហើយចង់ធ្វើការពង្រីកផ្ទៃដីស្រែបន្ថែមទៅតាមតម្រូវការ។ ប៉ុន្តែត្រូវបានលោក បេន រួមនឹងមន្ត្រីឧទ្យានុរក្សបរិស្ថាន និងប្រជាសហគមន៍ហាមឃាត់។ ក្រៅពីនោះក្រុមលោក បេន ក៏បានចាប់ដកហូតចំពាម ឬកាំបិតពូថៅពីអ្នកភូមិពេលចូលទៅក្នុងតំបន់អភិរក្សនោះ។
លោកបញ្ជាក់ថា៖ «តាំងពីមុនចូលឆ្នាំមកប្រមូលបានស្នាមមេដៃប្រហែល ១០០ នាក់ហើយ។ ពលរដ្ឋចង់ប្រមូលស្នាមមេដៃឲ្យបាន ៣០០-៤០០ ដើម្បីដាក់ទៅស្រុក និងអង្គការ សុំឲ្យលោក បេន ចេញពីកន្លែងនេះ ព្រោះពលរដ្ឋពិបាកបង្កបង្កើនផល»។ លោកបន្តថាកាលពី ២ សប្តាហ៍មុនពលរដ្ឋរាប់រយនាក់ក៏បាននាំគ្នាទៅតវ៉ានៅផ្ទះលោក បេន នៅក្នុងព្រៃនោះផងដែរដោយសារតែពួកគេខឹងនឹងលោក បេន និងមន្ត្រីបរិស្ថានដែលបានដណ្តើមយកដើមឈើធ្នង់ចំនួន ៤ កំណាត់ពីស្ត្រីអ្នកភូមិឈ្មោះ កែ សម្រស់ រហូតដល់មានការចាប់គាត់ដាក់ខ្នោះ។
អ្នកស្រី កែ សម្រស់ បានឲ្យដឹងថា ដើមធ្នង់នោះដុះនៅក្នុងដីចម្ការរបស់គាត់ ហើយគាត់បានថែរក្សាកុំឲ្យគេលួចកាប់។ តែកាលពីឆ្នាំមុនត្រូវបានគេលួចអារ តែអ្នកស្រីបានឃើញ ហើយជនល្មើសក៏រត់បាត់។ អ្នកស្រីថាលោក បេន បានដឹកឈើអស់ ២ កំណាត់យកទៅស្នាក់ការ ហើយចង់យកឈើដែលនៅសល់ទៀត។ តែអ្នកស្រីមិនព្រម ហើយក៏ទុកឈើនោះនៅស្រែនោះទៅ។ កាលពី ២ សប្តាហ៍មុននោះមន្ត្រីបរិស្ថានបានទៅដឹកឈើនោះបម្រុងយកទៅរក្សាទុកនៅខេត្ត តែអ្នកស្រីបានដឹងក៏ទៅឃាត់ដែលបណ្តាលឲ្យមានការប្រតាយប្រតប់គ្នា ជាមួយមន្ត្រីបរិស្ថានរហូតដល់គេចាប់អ្នកស្រីដាក់ខ្នោះនៅក្នុងឡានទៀតផង។
អ្នកស្រីថា៖ «ហេតុអីបានមកដឹកឈើខ្ញុំ មិនប្រាប់ខ្ញុំ? ដីហ្នឹង ឈើហ្នឹង គឺខ្ញុំគ្រប់គ្រងតាំងពីដូនតា តាំងពីតូចមក។ មិនអាចដឹកចេញកើតទេ។ គេនៅតែដឹកចេញ។ ខ្ញុំស្តាយឈើរត់តាមឡានរ៉េវដឹកឈើនោះ។ ខ្ញុំនៅមុខឡានបរិស្ថាន មិនឲ្យបើកចេញ រហូតដល់គ្នាគេ ២ នាក់ចុះមកចាប់ខ្ញុំផ្តួលទៅដីដាក់ខ្នោះលើកដាក់ឡាន»។ អ្នកស្រីបន្តថាក្រោយពេលចាប់អ្នកស្រីហើយក៏មានពលរដ្ឋបាននាំគ្នាទៅស្ទាក់ផ្លូវ មិនឲ្យក្រុមបរិស្ថានដឹកចេញទើបមន្ត្រីបរិស្ថានដោះខ្នោះអ្នកស្រីហើយឲ្យចេញពីឡានវិញ។ ចុងក្រោយឈើនោះត្រូវបានដឹកយកទៅទុកនៅក្នុងវត្តតាបស។
លោក បេន ដាវីស និងគ្រួសារបានសង់ផ្ទះរស់នៅក្នុងព្រៃអភិរក្សនោះកាលពីឆ្នាំ ២០១៥ ហើយសហការណ៍ជាមួយនឹងសហគមន៍មូលដ្ឋាន ដើម្បីអភិរក្សព្រៃឈើ និងសត្វព្រៃ និងបង្កើតជាតំបន់អេកូទេសចរណ៍មួយដើម្បីទាក់ទាញភ្ញៀវទេសចរណ៍ទៅមើលសត្វ និងធម្មជាតិ។
លោក បេន បានឲ្យដឹងថាលោកមិនទាន់ដឹងពីរឿងផ្តិតមេដៃនោះទេ។ ទោះយ៉ាងណាលោកថា សកម្មភាពរបស់លោក មន្ត្រីបរិស្ថាន និងសហគមន៍ គឺដើម្បីការពារធនធានធម្មជាតិ និងផ្តល់ផលប្រយោជន៍ដល់សហគមន៍។ ប៉ុន្តែមានពលរដ្ឋមួយចំនួន មិនពេញចិត្តដោយសារតែពួកគេមិនបានកាប់ឈើ បាញ់សត្វ និងទន្ទ្រានយកដី។
លោកថា៖ «យើងមិនហាមគេមិនឲ្យចូលព្រៃ និងធ្វើស្រែទេ។ តែបើបាញ់សត្វដាក់អន្ទាក់ និងកាប់ឈើអាហ្នឹងខ្ញុំចាប់គេមែន។ គេចង់ពង្រីកដីស្រែចម្ការរាល់ឆ្នាំគឺមួយឆ្នាំ ២០៣០ ម៉ែត្រ ឬកន្លះហិកតារហូត។ អាហ្នឹងយើងចាប់ ព្រោះយើងធ្វើតាមបរិស្ថាន។ ខ្ញុំមិនធ្វើខុសពីច្បាប់បរិស្ថានទេ»។ លោកបន្តថា ការចាប់ចំពាមធ្វើឡើងតែនៅពេលដែលគេបាញ់សត្វនៅក្បែរផ្ទះរបស់លោក ហើយការចាប់ដកហូតកាំបិតពូថៅ គឺធ្វើឡើងនៅពេលដែលលោក និងក្រុមល្បាតចាប់ម៉ាស៊ីនត្រង់តឺន័រដែរ ព្រោះខ្លាចគេតដៃ និងកាប់ពួកលោកវិញ។
លោក បេន ថ្លែងថាពលរដ្ឋខ្លះចង់ឲ្យលោកចេញ ព្រោះគេចង់មានឱកាសបរបាញ់សត្វ កាប់ឈើ និងកាប់ឆ្ការរានយកដីព្រៃអភិរក្សនោះទៅកាន់កាប់ជាប្រយោជន៍ផ្ទាល់ខ្លួន។ ប៉ុន្តែគេមិនបានគិតដល់ផលប្រយោជន៍រួមដែលបានមកពីគម្រោងអេកូទេសចរណ៍របស់លោកទេ។ លោកថាគម្រោងអេកូទេសចរណ៍របស់លោកបានចែកប្រាក់បានពីទេសចរណ៍ក្នុងម្នាក់ ១៥ ដុល្លារដល់សហគមន៍បន្ថែមទៅលើការជួយធ្វើផ្លូវក្នុងសហគមន៍ទៀត។ លោក បេន ត្អូញត្អែរថា មិនសូវមានទេសចរណ៍ទៅកម្សាន្តនៅទីនោះទេ ដោយសារតែសត្វព្រៃកាន់តែបាត់បង់។ លោកថាការបរបាញ់សត្វនៅតែបន្តកើតមាន។
លោក មាស ញឹម នាយកដែនជម្រកសត្វព្រៃភ្នំត្នោតបានចាត់ទុកការផ្តិតមេដៃបង្ខំឲ្យលោក បេន ចាកចេញនោះថា ជារឿងមិនសមហេតុផលព្រោះថាពួកគេចង់ឲ្យលោក បេន ចេញដើម្បីបានឱកាសទន្ទ្រានយកដីតែប៉ុណ្ណោះ។ លោកបន្តថា៖ «គោលបំណងរបស់គាត់គឺប្តឹង [លោក បេន ] ឲ្យចេញដើម្បីចាប់ទន្ទ្រានយកដីខុសច្បាប់។ គាត់ធ្វើហ្នឹងល្មើសច្បាប់»។ លោកក៏បានឲ្យដឹងផងដែរថា ចំពោះករណីស្ត្រីម្ចាស់ឈើវិញ គឺគាត់បានទៅរារាំង និងវ៉ៃកម្លាំងបរិស្ថានក្នុងពេលអនុវត្តច្បាប់។
កាលពីសប្តាហ៍មុនអង្គការអភិរក្សចំនួន ៨ បានចេញលិខិតរួមមួយដោយសុំឲ្យរដ្ឋាភិបាល ពិសេសគឺក្រសួងបរិស្ថានជួយចាត់វិធានការបន្ទាន់ ដើម្បីទប់ស្កាត់បទល្មើសព្រៃឈើនៅដែនជម្រកសត្វព្រៃភ្នំត្នោតទំហំជាង ៤ ម៉ឺនហិកតានោះ។ លោក បេន ឲ្យដឹងថា មានមន្ត្រីឧទ្យានុរក្សបរិស្ថានចំនួន ៣ នាក់បានប្រចាំការល្បាតជាអចិន្ត្រៃយ៍ជាមួយលោកនៅដែនជម្រកនោះ។ ក្រោយពេលអង្គការស្នើសុំវិធានការបន្ទាន់នោះមកមានការបន្ថែមកម្លាំងបរិស្ថាន ៤ នាក់ទៀត តែពួកគេមិនសូវនៅប្រចាំការរាល់ថ្ងៃទេ។ ម្យ៉ាងវិញទៀតពួកគេក៏មិនទាន់មានអាវុធកាន់នោះដែរ៕