ព្រះសីហនុៈ ដោយសារតែស្ថានភាពរបួសធ្ងន់ធ្ងរពេក អ្នកម្នាង អ៊ុក ផល្លា បានទទួលមរណភាពនៅមន្ទីរពេទ្យខេត្តព្រះសីហនុនៅវេលាម៉ោងជាង ១២ ថ្ងៃទី ១៧ ខែមិថុនាម្សិលមិញគឺប្រមាណជា ៣ ម៉ោង បន្ទាប់ពីជួបគ្រោះថ្នាក់ចរាចរណ៍ដ៏រន្ធត់នៅស្រុកព្រៃនប់ ខណៈដែលព្រះអង្គម្ចាស់ នរោត្តម រណឫទ្ធិ ប្រធានគណបក្សហ៊្វុនស៊ិនប៉ិច និងមនុស្ស ៦ នាក់ផ្សេងទៀតដែលរងរបួសធ្ងន់ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យខេត្តព្រះសីហនុ និងមន្ទីរពេទ្យនៅរាជធានីភ្នំពេញ។
លោក កេត សុភ័ក្រ អនុប្រធានការិយាល័យនគរបាលចរាចរណ៍ខេត្តព្រះសីហនុបានឲ្យដឹងថាតាមព័ត៌មានដែលលោកបានទទួលអ្នកម្នាង អ៊ុក ផល្លា អាយុ ៣៩ ឆ្នាំបានស្លាប់ហើយ បន្ទាប់ពីត្រូវបានដឹកតាមឧទ្ធម្ភាគចក្រជាមួយព្រះអង្គម្ចាស់នរោត្តម រណឫទ្ធិ ទៅសង្គ្រោះនៅមន្ទីរពេទ្យ។
លោក យន្ត មីន អភិបាលខេត្តព្រះសីហនុបានឲ្យដឹងថាគ្រោះថ្នាក់ចរាចរណ៍នេះបានកើតឡើងនៅប្រហែលជាម៉ោង ជិត ៩ ព្រឹកនៅពេលដែលក្បួនរថយន្តរបស់ព្រះអង្គម្ចាស់ នរោត្តម រណឫទ្ធិ ធ្វើដំណើរតាមផ្លូវជាតិលេខ ៤ ក៏បានជួបគ្រោះថ្នាក់ចរាចរណ៍ដោយឡានតាក់ស៊ី ១ គ្រឿងបានបើកចូលទៅបុកឡានរបស់ព្រះអង្គនៅខាងស្តាំដៃពេញទំហឹង។
លោកអភិបាលខេត្តថ្លែងថាលោកឃើញមានការបុកខ្លាំងនៅខាងមុខហើយឃើញម៉ាស៊ីនរថយន្តរបូតចេញហើយខ្ទេចខ្លាំងនៅចំហៀងខាងមុខ។
បើតាមលោក យន្ត មីន ដែលបានចុះទៅពិនិត្យផ្ទាល់នៅកន្លែងកើតហេតុឡានរបស់ព្រះអង្គម្ចាស់ រណឫទ្ធិ គឺបើកប្រកាន់ស្តាំបានត្រឹមត្រូវ ហើយឡានអ្នកបើកតាក់ស៊ី highlander បានបើកចូលទៅបុកឡានរបស់ព្រះអង្គ។
លោក យន្ត មីន ដែលក៏បានទៅកាន់មន្ទីរពេទ្យបង្អែកខេត្តព្រះសីហនុដែរនោះថ្លែងថា៖ «បើតាមអ្នកបច្ចេកទេសពេទ្យ អ្នកម្នាង ផល្លា បានស្លាប់ហើយតាំងពីម៉ោងជាង ១២ បន្តិច។ ពេលដែលខ្ញុំទៅមើលគាត់ គាត់អត់ដឹងខ្លួនទេ ហើយពេទ្យបានប្រាប់ថាគាត់មិនដកដង្ហើមខ្លួនឯងទេគឺដកដោយម៉ាស៊ីន...។ សម្តេចក្រុមព្រះត្រូវយន្តហោះដឹកយកទៅភ្នំពេញនៅម៉ោង ១ និង ១៥ នាទី។ សម្តេចក្រុមព្រះក៏ប្រើអុកស៊ីហ្ស៊ែនដែរ ហើយគាត់ត្រូវគួរសមដែរ»។
លោកបញ្ជាក់ទៀតថា៖ «ឡាន highlander ដែលមានគ្នាពី ៤ ទៅ ៥ នាក់ត្រូវរបួសទាំងអស់ផងដែរ ប៉ុន្តែខាងសម្តេចក្រុមព្រះរងរបួសធ្ងន់ជាង...សម្តេចក្រុមព្រះ និងអ្នកម្នាងជិះនៅខាងក្រោយ»។
លោក អភិបាលខេត្តក៏មានចម្ងល់ផងដែរ ខណៈដែលព្រះអង្គម្ចាស់ រណឫទ្ធិ និងអ្នកម្នាងដែលជិះនៅខាងក្រោយបែរជាត្រូវស្លាប់ និងរងរបួសធ្ងន់ ខណៈអ្នកបើកបរនៅខាងមុខបែរជារួចផុតជីវិតទៅវិញ។
លោកបន្ថែមថា៖ «ក្រោយហេតុការណ៍ពេលដែលខ្ញុំទៅដល់ពេលឃើញឡាននៅផ្នែកខាងក្រោយ (មិនឃើញបុកដូចខាងមុខ) មិនគួរអ្នកនៅខាងក្រោយរងរបួសខ្លាំងដល់ថ្នាក់ហ្នឹង ដោយសារមិនមានប៉ះអីនៅពីក្រោយ ប៉ុន្តែ ប៉ះនៅខាងមុខខ្លាំង តែអ្នកបើកបរអត់អីទៅជាអីអ្នកម្នាង និងព្រះអង្គទៅវិញដែលនៅក្រោយ»។ ប៉ុន្តែទោះយ៉ាងណាលោក យន្ត មីន បញ្ជាក់ថានេះគឺជារឿងគ្រោះថ្នាក់ចរាចរណ៍មិនមែនជារឿងនយោបាយដូចការសង្ស័យរបស់អ្នកខ្លះនោះទេ។
លោកបន្ថែមថា៖ «វាជាគ្រោះថ្នាក់ចរាចរណ៍ទេ...ខ្ញុំមិនគិតថាជារឿងនយោបាយទេ។ ខ្ញុំគិតថាស្រុកខ្មែរមិនមានរហូតដល់ថ្នាក់កាប់សម្លាប់គ្នា និងនយោបាយធ្វើឃាតគ្នា គ្មានទេ។ ស្រុកខ្មែរ យើងមិនដល់ថ្នាក់ហ្នឹងទេ ហើយវាកម្រណាស់រឿងអ៊ីចឹងនោះដល់ថ្នាក់យកឡានបុកបែបនេះមិនអាចទេ»។
អ្នកនាំពាក្យគណបក្សហ៊្វុនស៊ិនប៉ិច លោក ញេប ប៊ុនជិន បានថ្លែងថា ព្រះអង្គម្ចាស់ រណឫទ្ធិ កំពុងត្រូវបានក្រុមគ្រូពេទ្យជួយសង្គ្រោះ ហើយក្រៅពីនេះលោកមិនទាន់ទទួលបានព័ត៌មានអ្វីថ្មីទេ។
លោកបន្តថា៖ «សម្តេចក្រុមព្រះ គាត់នៅដឹងព្រះកាយទេ...។ ហេតុអ្វីក៏វាចៃដន្យអីត្រូវតែព្រះអង្គ និងអ្នកម្នាង...យើងឃើញតៃកុងឡានគាត់កាន់កាបូបឲ្យលោក និងបីលោកចេញពីឡានទៅដាក់ឡានមួយទៀត។ សម្តេចត្រូវរបួសចំជើងឆ្វេង យើងភ័យស្លន់ស្លោគ្រប់តែគ្នា»។
បើតាមលោក ប៊ុនជិន សពរបស់អ្នកម្នាង ផល្លា ប្រហែលជាយកទៅបូជានៅមុខវត្តបទុមវតី។
លោក រុណ រ័ត្នវាសនា ប្រធាននាយកដ្ឋាននគរបាលចរាចរណ៍ក្រសួងមហាផ្ទៃ បានថ្លែងថាកំណើនយ៉ាងច្រើននៃយានយន្តបានធ្វើឲ្យគ្រោះថ្នាក់ចរាចរណ៍នៅតែបន្តកើតមានឡើងទោះបីជាមានការខិតខំប្រឹងប្រែងរបស់សមត្ថកិច្ចក៏ដោយ ខណៈអ្នកបើកបរមួយចំនួនមិនគោរពច្បាប់។ លោកបញ្ជាក់ថា៖ «ដោយសារការគោរពច្បាប់យើងនៅមានកម្រិត អ្នកគោរពចេះតែគោរពទៅ អ្នកមិនគោរពនៅតែល្មើសអ៊ីចឹងទៅ»។
លោកបានឲ្យដឹងថាមូលហេតុចម្បងដែលបណ្តាលឲ្យកើតមានគ្រោះថ្នាក់ចរាចរណ៍ គឺកត្តាល្បឿន អ្នកបើកបរស្រវឹង ការវ៉ាជែងមិនគោរពសិទ្ធិអាទិភាពជាដើម។
បើតាមលោក រ័ត្នវាសនា នៅក្នុងខែមិថុនាឆ្នាំ ២០១៨ នេះ ក្នុងមួយថ្ងៃមានអ្នកស្លាប់ដោយសារគ្រោះថ្នាក់ចរាចរណ៍យ៉ាងតិចបំផុត ៣ នាក់ និងច្រើនបំផុតរហូតដល់ ៧ នាក់ហើយនៅថ្ងៃម្សិលមិញមានអ្នកស្លាប់ ៥ នាក់។ «តួលេខ ៣ ទៅ ៤ -៥ និងទៅ ៦ និង ៧...។ ប្រសិនបើគ្មានការចូលរួមទេ កំណើនគ្រោះថ្នាក់នឹងមិនអាចថយចុះទេ ដោយសារការព្រហើន និង ការមិនគោរពច្បាប់»។
អធិការរងស្រុកព្រៃនប់ម្នាក់ដែលបដិសេធបញ្ចេញឈ្មោះបានឲ្យដឹងថា អ្នកបើកបររថយន្តតាក់ស៊ី ឈ្មោះ វុល សារ៉េត អាយុ ៣៤ ឆ្នាំដែលក៏រងរបួសដែរនោះត្រូវបាននាំខ្លួនពីមន្ទីរពេទ្យទៅកាន់ស្នងការដ្ឋានខេត្តព្រះសីហនុ បន្ទាប់ពីគ្រូពេទ្យរុំមុខរបួសរួច។
បើតាមអធិការរងរូបនេះគ្រោះថ្នាក់នេះបណ្ដាលមកពីរថយន្តតាក់ស៊ី Highlander បើកបុកព្រះទីនាំងរបស់ព្រះអង្គម្ចាស់ រណឫទ្ធិ នៅវេលាម៉ោងជិត ៩ ព្រឹក ខណៈដែលព្រះអង្គយាងទៅជួបសួរសុខទុក្ខប្រជាពលរដ្ឋនៅខេត្តព្រះសីហនុ។ «ឡាន Highlander ដែលធ្វើដំណើរចេញមកពីខេត្តព្រះសីហនុបានរេចង្កូតមកឆ្វេងហើយបានបុកឡានរបស់សម្តេចក្រុមព្រះ BMW ហើយឡាន Highlander បុកពេញទំហឹងបង្កឲ្យរបួសចំនួន ៧ នាក់ ស្រី ២ នាក់...»។
សូមបញ្ជាក់ថានេះគឺជាលើកទី ២ ហើយដែលព្រះអង្គម្ចាស់ រណឫទ្ធិ និង អ្នកម្នាង អ៊ុក ផល្លា បានជួបគ្រោះថ្នាក់ចរាចរណ៍ បន្ទាប់ពីព្រះអង្គបានជួបគ្រោះថ្នាក់ចរាចរណ៍លើកទី ១ កាលថ្ងៃទី ២៥ ខែមេសា ឆ្នាំ ២០១៥ នៅក្នុងឃុំខ្វិតធំ ស្រុកព្រៃឈរ ខេត្តកំពង់ចាមដែលកាលនោះបណ្ដាលឲ្យអ្នកម្នាង អ៊ុក ផល្លា រងរបួសភ្នែកជាទម្ងន់ និងត្រូវបានបញ្ជូនទៅព្យាបាលនៅក្រៅប្រទេស៕