ភ្នំពេញៈ អ្នកវិភាគ និងអតីតតំណាងរាស្ត្របក្សប្រឆាំងយល់ថា លិខិតរបស់លោក សម រង្ស៊ី ប្រធានស្តីទីអតីតគណបក្សសង្គ្រោះជាតិដែលអំពាវនាវឲ្យមានឯកភាពផ្ទៃក្នុងបក្សនោះបញ្ជាក់ច្បាស់ពីការបែកបាក់ផ្ទៃក្នុងនៃអតីតបក្សប្រឆាំង។
លោក សម រង្ស៊ី ដែលកំពុងនិរទេសដោយខ្លួនឯងនៅក្រៅប្រទេសកាលពីថ្ងៃទី ២៧ មករា បានចេញលិខិតអំពាវនាវមួយទៅកាន់អ្នកគាំទ្រគណបក្សសង្គ្រោះជាតិទាំងអស់ឲ្យមានឯកភាពផ្ទៃក្នុងបក្ស។ លោកក៏អំពាវនាវឲ្យអ្នកគាំទ្រទាំងអស់រក្សាគោលជំហររឹងមាំ និងមានការប្ដេជ្ញាចិត្តខ្ពស់ជាទីបំផុត ដើម្បីជំរុញការផ្លាស់ប្ដូរវិជ្ជមានតាមបែបប្រជាធិបតេយ្យនៅកម្ពុជា។
ទោះជាយ៉ាងណាក៏ដោយគណបក្សសង្គ្រោះជាតិត្រូវបានតុលាការកំពូលរំលាយចោលកាលពីចុងឆ្នាំ ២០១៧ ដោយទោសក្បត់ជាតិ។
លោក រង្ស៊ី បានលើកឡើងនូវគោលជំហររបស់លោក ៣ ចំណុចដោយរួមមានការរក្សាទំនាក់ទំនងជាមួយអ្នកគាំទ្រគ្រប់រូប គ្រប់ក្រុម និងគ្រប់ប្រទេស ចូលរួមប្រជុំ និងវេទិកាសាធារណៈ ឬឯកជនទាំងទ្រង់ទ្រាយតូច និងធំជាមួយអ្នកប្រជាធិបតេយ្យដូចលោកនឹងគាំទ្រពាក្យស្លោក «សម រង្ស៊ី កឹម សុខា ជាមនុស្សតែមួយ»។ នៅចំណុចទី ៣ លោកសរសេរថា៖ «ខ្ញុំនៅតែអំពាវនាវឲ្យអ្នកគាំទ្រគណបក្សសង្គ្រោះជាតិទាំងអស់ខិតខំធ្វើសកម្មភាពរួមគ្នាបើអាចធ្វើទៅបានដើម្បីពង្រឹងឯកភាពគណបក្សយើង ពីព្រោះឯកភាពគណបក្សយើងជាលក្ខខណ្ឌចាំបាច់ដើម្បីឲ្យគណបក្សយើងឈានទៅដឹកនាំប្រទេស នៅពេលអនាគតដ៏ខ្លីខាងមុខនេះ»។
លោក អ៊ូ ច័ន្ទរ័ត្ន អតីតតំណាងរាស្ត្រខេត្តតាកែវនៃអតីតគណបក្សសង្គ្រោះជាតិយល់ថា ការអំពាវនាវរបស់លោក សម រង្ស៊ី អំពីឯកភាពផ្ទៃក្នុងបក្សនេះ «វាយឺតបន្តិចហើយ» ដោយសារតែបក្សនេះបានបែកជាច្រើនចម្រៀករួចទៅហើយ។ លោកថាបន្ទាប់ពីយុទ្ធនាការ ៩ វិច្ឆិកា ឆ្នាំមុនដែលលោកប៉ុនប៉ងត្រឡប់មកកម្ពុជាវិញនោះបានធ្វើឲ្យមន្ត្រីមូលដ្ឋានរបស់ CNRP ជាប់គាំងនៅប្រទេសថៃ ហើយពេលនេះពួកគេបាត់បង់ទឹកចិត្តមិនដឹងត្រូវទៅទីណា ហើយធ្វើអ្វីទៀត។
លោកថ្លែងថា៖ «ខ្ញុំបានមើលឃើញរូបភាពនេះ ទិដ្ឋភាពនេះតាំងពីឆ្នាំមុនថា វានឹងមានលទ្ធផលបែបនេះចំពោះមន្ត្រីដែលរត់ចេញពីប្រទេសទៅជ្រកកោននៅប្រទេសថៃ ខ្ញុំថាគង់តែដល់ថ្ងៃនេះទេ។ ព្រោះគាត់មិនអាចទទួលបានការគាំទ្រពីបងប្អូននៅក្រៅប្រទេស ឬពីអង្គការផ្សេងៗសម្រាប់ការរស់នៅរបស់មនុស្សរាប់រយនាក់ដែលអត់មានធ្វើអ្វីក្រៅតែពីគេចខ្លួនពួនអាត្មា ហើយរង់ចាំទទួលការឧបត្ថម្ភពីក្រៅទេ»។
លោក ច័ន្ទរ័ត្ន បានថ្លែងទៀតថា៖ «ការអំពាវនាវរបស់លោកនេះហាក់ដូចជាយឺត គឺយឺតមែនទែន។ មិនដឹងថា លោកដឹងពីការបែកបាក់នោះយូរហើយ ឬនៅ ឬក៏ទើបតែចាប់ផ្ដើមភ្ញាក់ខ្លួនថាឥឡូវមានការបែកបាក់ផ្ទៃក្នុង។ យើងឃើញមានឫសគល់ ២ ពីសិទ្ធិមនុស្សនិយម និង សម រង្ស៊ី និយមបានបាចទឹក វាយប្រហារគ្នាយូរហើយ មិនមែនទើបឥឡូវទេ។ ខ្ញុំយល់ថា សារនេះវាយឺតបន្តិច មិនមែនបន្តិចទេ គឺវាចង់ជ្រុលទៅហើយ ព្រោះការបែកបាក់វាចេះតែធំទៅៗស្ទើរគ្រប់ចម្រៀកទៅហើយ លោកទើបតែអំពាវនាវកុំឲ្យមានការបែកបាក់»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាយល់ឃើញថា លិខិតរបស់លោក សម រង្ស៊ី គឺជាការបញ្ជាក់ច្បាស់អំពីការបែកបាក់របស់អតីតគណបក្សសង្គ្រោះជាតិដែលមានបញ្ហាផ្ទៃក្នុងរួចស្រេចទៅហើយ។
លោកថ្លែងថា៖ «បើយើងពិនិត្យទិដ្ឋភាពជារួម គឺសង្គ្រោះជាតិបានបែកខ្ញែកជា ៤ ចំណែក ទី ១ គឺទៅក្រុមលោក សម រង្ស៊ី ១ ទៀតទៅក្រុមលោក កឹម សុខា ១ ក្រុមទៀតទៅបង្កើតបក្សរៀងៗខ្លួន ហើយ ១ ចំណែកទៀតគឺទៅចូលរួមគណបក្សផ្សេងទៀត។ នេះយើងមិនទាន់គិតដល់ក្រុមដែលគាត់មិនខ្វល់អ្វីទាំងអស់»។
លោកបន្តថា ការបែកបាក់នេះជាក់ស្ដែងគឺលោក សម រង្ស៊ី ខ្លួនឯងធ្វើសកម្មភាព និងយុទ្ធសាស្ត្រមួយចំនួនដើម្បីធ្វើឲ្យមានការបែកបាក់ផ្ទៃក្នុងដោយខ្លួនឯង។ លោកថាលោក សម រង្ស៊ី តែងលើកឡើងថា CPP ជាអ្នកបំបែកគណបក្សសង្គ្រោះជាតិ តែជាក់ស្ដែងគឺក្រុមបក្សប្រឆាំងខ្លួនឯងទេដែលបំបែកបំបាក់ខ្លួនឯង៕