គម្រោងបណ្តាញទីក្រុងឆ្លាតវៃអាស៊ាន (ASCN) ត្រូវបានបង្កើតឡើងនៅថ្ងៃទី ២៨ ខែមេសា ឆ្នាំ ២០១៨ ដែលជាវេទិការួមគ្នាមួយសម្រាប់ទីក្រុងរបស់សមាជិកអាស៊ានដើម្បីផ្លាស់ប្តូរការអនុវត្តឲ្យបានល្អបំផុតដូចជាផ្តល់ដំណោះស្រាយក្នុងទីក្រុង និងការជំរុញគម្រោងទីក្រុងឆ្លាតវៃឲ្យបានជោគជ័យដើម្បីដោះស្រាយបញ្ហាប្រឈមនៃកំណើនអ្នកមករស់នៅទីក្រុងដែលកំពុងតែកើនឡើងយ៉ាងឆាប់រហ័ស។
ទីក្រុងចំនួន ២៦ នៅក្នុងប្រទេសអាស៊ានទាំងអស់ត្រូវបានជ្រើសរើសចូលរួមជាមួយគម្រោងបណ្តាញទីក្រុងឆ្លាតវៃអាស៊ាន (ASCN) នេះដែលជាបណ្តុំអ្នកត្រួសត្រាយផ្លូវសម្រាប់ទីក្រុងនៅក្នុងប្រទេសអាស៊ានដែលចូលរួមក្នុងគម្រោងនេះ។
នៅក្នុងប្រទេសកម្ពុជាយើងស្វាគមន៍ទីក្រុងចំនួន ៣ ដែលបានចូលរួមសាកល្បងក្នុងគម្រោងទីក្រុងឆ្លាតវៃអាស៊ាននេះគឺមានទីក្រុងភ្នំពេញ ទីក្រុងបាត់ដំបង និងទីក្រុងសៀមរាប។ ទីក្រុងទាំងនេះនឹងដាក់ចេញនូវមូលដ្ឋានគ្រឹះសម្រាប់ដំណើរការអនុវត្តគម្រោង ASCN នេះ។
ទំនាក់ទំនងរបស់គម្រោង ASCN នៅក្នុងប្រធានបទរបស់ប្រទេសសិង្ហបុរីដែលជាប្រធានអាស៊ានស្តីអំពីកាលានុវត្តន៍ និងភាពរឹងមាំ «Resilience» និង «Innovation» ដោយលើកទឹកចិត្តដល់បណ្តាទីក្រុងដែលជាសមាជិកឱ្យប្រើប្រាស់បច្ចេកវិទ្យាដើម្បីធ្វើឲ្យប្រសើរឡើងនូវជីវភាពរស់នៅរបស់ប្រជាពលរដ្ឋ។
ប្រជាជនជាង ៩០ លាននាក់នៅក្នុងតំបន់អាស៊ានត្រូវបានគេរំពឹងថានឹងចូលមករស់នៅក្នុងទីក្រុងត្រឹមឆ្នាំ ២០៣០ ហើយទីប្រជុំជនជាមធ្យមត្រូវបានគេប៉ាន់ស្មានថានឹងមានប្រជាពលរដ្ឋរស់នៅចន្លោះពី ២០០ ០០០ ទៅ ២ លាននាក់ស្មើនឹង ៤០ ភាគរយនៃកំណើនក្នុងតំបន់។
ជំហានដំបូងរបស់គម្រោង ASCN ត្រូវបានដាក់ចេញ។
នៅក្នុងកិច្ចប្រជុំសម្ពោធគម្រោង ASCN កាលពីថ្ងៃទី ៨ ខែកក្កដា ឆ្នាំ ២០១៨ មានកិច្ចព្រមព្រៀងចំនួន ៥ ត្រូវបានចុះហត្ថលេខានៅក្នុងចំណោមទីក្រុងក្នុងគម្រោងទីក្រុងឆ្លាតវៃអាស៊ាន (ASCN) ជាអ្នកផ្តល់ដំណោះស្រាយ និងដៃគូខាងក្រៅដើម្បីគាំទ្រដល់គោលបំណងនៃបណ្តាញនេះ។
ដោយមានការគាំទ្រជាបន្តពីប្រទេសកម្ពុជា និងដៃគូអាស៊ានដទៃទៀតប្រទេសសិង្ហបុរី កំពុងទន្ទឹងរង់ចាំការចាប់ផ្តើមជាផ្លូវការនៃគម្រោង ASCN នេះពីមេដឹកនាំអាស៊ាននៅក្នុងកិច្ចប្រជុំក្នុងខែវិច្ឆិកាឆ្នាំ ២០១៨ ខាងមុខ។ សម្រាប់ព័ត៌មានបន្ថែមស្តីអំពីគម្រោង ASCN សូមចូលទៅកាន់ ហ្វេសប៊ុក ASEAN Smart Cities Network៕
អត្ថបទ: ស្ថានទូតសិង្ហបុរីក្នុងរាជធានីភ្នំពេញ