.jpg)
លោកស្រី កែវ មុំ អគ្គនាយិកាក្រុមហ៊ុន LyLy Food Industry Co ។ រូបថត សហការី
ការចូលចិត្តរៀនសូត្រអំពីភាពពិតប្រាកដនៃអាជីវកម្ម និងការទទួលខុសត្រូវផ្នែកហិរញ្ញវត្ថុបានធ្វើឲ្យលោកស្រី កែវ មុំ អគ្គនាយិកាក្រុមហ៊ុន LyLy Food Industry Co ក្លាយជាពាណិជ្ជករដ៏ជោគជ័យមួយរូប។
ក្រុមហ៊ុន LyLy Food Industry ផ្ដល់អាហារសម្រន់ និងអាហារបំប៉នផ្សេងៗគឺជាក្រុមហ៊ុនអាហារលក្ខណៈអន្តរជាតិដ៏ធំមួយ។
ថ្លែងមកកាន់កាសែតភ្នំពេញប៉ុស្ដិ៍លោកស្រី កែវ មុំ បញ្ជាក់ពីភាពជោគជ័យរបស់លោកស្រីចំពោះការពិតដែលថាលោកស្រីបានខិតខំយ៉ាងខ្លាំងក្នុងការស្វែងយល់ដោយខ្លួនឯងផ្នែកហិរញ្ញវត្ថុ និងបានក្លាយជាបុគ្គលដែលមានចំណេះដឹងផ្នែកហិរញ្ញវត្ថុដ៏ជ្រៅជ្រះមួយរូប។
លោកស្រីថ្លែងថា៖ «ខ្ញុំបានរៀនសូត្រចំណេះដឹងផ្នែកហិរញ្ញវត្ថុដោយខ្លួនឯងតាមបទពិសោធក្នុងការរកស៊ីធ្វើអាជីវកម្មជួយឪពុកម្តាយគឺរៀនសូត្រតាមបទពិសោធន៍ផ្ទាល់ខ្លួន»។
លោកស្រីបន្តថា៖ «នៅពេលយើងមានចំណេះដឹងផ្នែកហិរញ្ញវត្ថុគឺវាជួយដល់អាជីវកម្មយើងបានច្រើន យើងដឹងនូវចរន្តសាច់ប្រាក់របស់យើងដូចជាចំណូលចំណាយ និងចំណេញជាដើម»។
លោកស្រីបញ្ជាក់ថា៖ «តាមរយៈការមានចំណេះដឹងផ្នែកហិរញ្ញវត្ថុប្រាក់ដែលយើងចំណាយត្រួវបានគ្រប់គ្រងយ៉ាងល្អ ហើយប្រតិបត្តិការសាច់ប្រាក់របស់យើងត្រូវបានគិតគួរយ៉ាងត្រឹមត្រូវ»។
លោក ស្រីមុំ ថ្លែងថាបើសិនជាយើងមិនមានចំណេះដឹងអំពីហិរញ្ញវត្ថុច្បាស់លាស់ទេ នោះយើងមិនអាចគ្រប់គ្រងលំហូរសាច់ប្រាក់ ថាចំណាយ ចំណូល ឬចំណេញប៉ុន្មាននោះទេ ហើយបើយើងចង់ពង្រីកអាជីវកម្ម យើងត្រូវការប្រាក់កម្ចីប៉ុន្មានត្រូវបង់ការប្រាក់ប៉ុន្មាន បង់ទាំងការទាំងដើមអស់ប៉ុន្មាន? ដូច្នេះបើយើងមិនមានចំណេះដឹងអំពីការកត់ត្រាហិរញ្ញវត្ថុច្បាស់លាស់ទេនោះយើងមិនហ៊ានខ្ចីលុយពីធនាគារដើម្បីយកមកពង្រីកអាជីវកម្មទេ។
លោកស្រីបន្តថា៖ «បើយើងមិនមានចំណេះដឹងអំពីហិរញ្ញវត្ថុទេគឺយើងមិនអាចសម្រេចបំណងរបស់យើងឲ្យរីកចម្រើនបានទេ។ ម្ចាស់អាជីវកម្មខ្នាតតូចជាច្រើនមិនមានចំណេះដឹងអំពីហិរញ្ញវត្ថុទេ ដូច្នេះធ្វើឲ្យពួកគាត់មិនអាចពង្រីកអាជីវកម្មបានដោយសារគាត់មិនអាចគ្រប់គ្រងចរន្តសាច់ប្រាក់របស់គាត់បាន ឬកត់ត្រា មិនអំពីចរន្តសាច់ប្រាក់ឲ្យបានច្បាស់លាស់»។
ចំណុចសំខាន់មួយក្នុងចំណោមចំណុចសំខាន់ៗបំផុតជាច្រើនមុនពេលទៅខ្ចីលុយពីធនាគារ ឬគ្រឹះស្ថានមីក្រូហិរញ្ញវត្ថុគឺត្រូវដឹងអំពីប្រាក់ចំណូល និងការចំណាយនៃអាជីវកម្មឲ្យបានច្បាស់លាស់ ហើយចំណេះដឹងផ្នែកហិរញ្ញវត្ថុមានសារៈសំខាន់ណាស់ក្នុងបញ្ហានេះ។
លោកស្រីបន្តថា៖ « ក្នុងនាមខ្ញុំជាម្ចាស់អាជីវកម្មមួយរូបតាំងពីដំបូងមកទោះបីមិនទាន់ចេះប្រើការកត់ត្រាតាមកុំព្យូទ័រ ក៏ខ្ញុំចេះកត់ត្រាដោយដៃ ប្រើសៀវភៅដែរ។ ហើយពេលណាអាជីវកម្មរបស់យើងត្រូវពង្រីកកាន់តែធំ យើងត្រូវចេះប្រើកុំព្យូទ័រ ហើយបើអាជីវកម្មរបស់យើងកាន់តែធំ យើងអាចប្រើប្រព័ន្ធគ្រប់គ្រងគណនេយ្យ។ ដូច្នេះអាជីវកម្មមួយអាចរីកចម្រើនបានលុះត្រាតែម្ចាស់យល់ដឹងអំពីការគ្រប់គ្រងហិរញ្ញវត្ថុ និងចំណេះដឹងហិរញ្ញវត្ថុខ្លាំង»។ លោកស្រី កែវមុំ សង្កត់ធ្ងន់ថាចំណេះដឹងផ្នែកហិរញ្ញវត្ថុគឺមានសារៈសំខាន់ខ្លាំងណាស់សម្រាប់ប្រជាជនកម្ពុជាគ្រប់រូប៕
