នៅពេលក្រុមហ៊ុន Public Bank Group បានចាប់ផ្តើមប្រតិបត្ដិការធនាគារកម្ពុជាសាធារណៈក្នុងឆ្នាំ ១៩៩២ ដែលអនុវត្តគំរូធនាគារលក់រាយ និងផ្តោតលើការគាំទ្រដល់កំណើនសហគ្រាសធុនតូច និងមធ្យម (SMEs) ហើយបានជួយឱ្យធនាគារមួយនេះក្លាយជាធនាគារដ៏សំខាន់មួយនៅក្នុងព្រះរាជាណាចក្រកម្ពុជា។
បច្ចុប្បន្នយុទ្ធនាការ «អ្នកជិតខាងរបស់ខ្ញុំ អតិថិជនខ្ញុំ» របស់ធនាគារកម្ពុជាសាធារណៈកំពុងពង្រឹងជំហររបស់ខ្លួនបន្ថែមទៀតនៅក្នុងវិស័យធនាគារតាមរយៈការកសាងទំនាក់ទំនងកាន់តែជិតស្និទ្ធជាមួយអាជីវកម្មខ្នាតតូចក្នុងស្រុក និងសហគមន៍ SMEs ។
នៅក្នុងបទសម្ភាសផ្តាច់មុខជាមួយកាសែតភ្នំពេញប៉ុស្តិ៍ នាយក និងជាប្រធានប្រតិបត្តិប្រចាំ ឥណ្ឌូចិន លោក Phan Ying Tong មានប្រសាសន៍ថា SMEs គឺជាឆ្អឹងខ្នងនៃសេដ្ឋកិច្ចរបស់ប្រទេស។
«នៅពេលធនាគារកម្ពុជាសាធារណៈចូលមកក្នុងប្រទេសកម្ពុជាដំបូងយើងយកគំរូតាមប្រតិបត្ដិការរបស់យើងដែលបានធ្វើនៅប្រទេសម៉ាឡេស៊ី។ ក្នុងនាមជាធនាគារលក់រាយយើងមិនផ្តោតលើគម្រោងធំៗទេ ប៉ុន្តែយើងផ្តោតលើ SMEs វិស័យលក់រាយ និងអតិថិជនជាលក្ខណៈបុគ្គល»។
លោកបញ្ជាក់ថាគម្រោងធំៗមិនមានញឹកញាប់ទេ ហើយបើមើលកំណត់ត្រារបស់ធនាគារសាធារណៈនៅម៉ាឡេស៊ី និងកម្ពុជាវាបានបង្ហាញថា គំរូរបស់ធនាគារគឺមាននិរន្តរភាព និងទទួលបានផលចំណេញ។
ធនាគារកម្ពុជាសាធារណៈក៏បានខិតខំប្រឹងប្រែងយ៉ាងខ្លាំងនៅក្នុងការលើកកម្ពស់បរិយាប័ន្នហិរញ្ញវត្ថុនៅកម្ពុជា។ យុទ្ធនាការ «អ្នកជិតខាងរបស់ខ្ញុំ អតិថិជនខ្ញុំ» គឺកំពុងបង្រៀនដល់សហគមន៍មូលដ្ឋានរួមបញ្ចូលពាណិជ្ជករតូចតាចក៏ដូចជាសហគ្រាសខ្នាតតូចអំពីសេវាធនាគារដែលពួកគេអាចទទួលបាន។
«យើងចែករំលែកជាមួយពួកគេថាតើសេវាធនាគារណាអាចជួយពួកគេបាន ក្នុងការពង្រីកអាជីវកម្ម ឬបើកអាជីវកម្មថ្មី។ ពួកគេភាគច្រើនមិនបានដឹងថាតើពួកគេត្រូវទទួលប្រាក់កម្ចីពីធនាគារដោយរបៀបណានោះទេ។
លោកបានពន្យល់ថាយុទ្ធនាការ «អ្នកជិតខាងរបស់ខ្ញុំ អតិថិជនខ្ញុំ» គឺត្រូវបានអនុវត្តនៅតាមសាខានីមួយៗដោយផ្តោតលើសង្កាត់នៅជុំវិញ។
យុទ្ធនាការសហគមន៍ «អ្នកជិតខាងរបស់ខ្ញុំ អតិថិជនខ្ញុំ» របស់ធនាគារកម្ពុជាសាធារណៈគឺអនុវត្តតាមពាក្យស្លោក «ធ្វើឲ្យអ្នកជិតខាងរបស់អ្នករីកចម្រើន» ដែលជាគំនិតផ្តួចផ្តើមរបស់នាយករដ្ឋមន្ត្រីម៉ាឡេស៊ីលោក ម៉ាហាធៀ ម៉ូហាម៉ាដ ក្នុងទសវត្សរ៍ឆ្នាំ ១៩៨០ ក្នុងអំឡុងពេលកាន់តំណែងជានាយករដ្ឋមន្ត្រីនៅជុំដំបូង។ គំនិតផ្តួចផ្តើមនេះបានលើកទឹកចិត្តដល់ប្រទេសកំពុងអភិវឌ្ឍន៍ដើម្បីជួយប្រទេសកំពុង អភិវឌ្ឍន៍ដទៃទៀតឱ្យរួចផុតពីវដ្តនៃភាពក្រីក្រ។
ដាក់ចេញផែនការជោគជ័យ
ក្រៅពីគំនិតផ្តួចផ្តើមខាងក្រៅរបស់ខ្លួនក្នុងការជួយដល់ SMEs នៅកម្ពុជាឲ្យរីកចម្រើន ធនាគារកម្ពុជាសាធារណៈមានផែនការជោគជ័យរយៈពេលវែងសម្រាប់ប្រជាពលរដ្ឋកម្ពុជាក្នុងការដឹកនាំប្រតិបត្តិការធនាគារ។
«យើងបានវិនិយោគយ៉ាងច្រើនទៅលើការបណ្តុះបណ្តាលបេក្ខជនដែលសមស្រប និងទទួលបានជោគជ័យក្នុងជំហានដំបូង [នៃផែនការជោគជ័យ] ហើយប្រធានគ្រប់គ្រងនៅគ្រប់សាខារបស់យើងទាំងអស់គឺជាជនជាតិខ្មែរ។ យ៉ាងណាក៏ដោយផែនការជោគជ័យនៅឯស្នាក់ការកណ្តាលរបស់យើងមានបញ្ហាប្រឈមច្រើនជាង ពីព្រោះផ្នែកខ្លះត្រូវការបុគ្គលិកដែលមានជំនាញពិសេសដែលបច្ចុប្បន្នមានចំនួនតិចតួចនៅក្នុងប្រទេសកម្ពុជា។
លោក Phan ថ្លែងថា៖ «វាជាកិច្ចខិតខំប្រឹងប្រែងដែលកំពុងបន្តហើយយើងលើកទឹកចិត្ត និងឧបត្ថម្ភដល់បុគ្គលិកជាន់ខ្ពស់ឱ្យចុះឈ្មោះចូលរៀនវគ្គសិក្សាជាមួយវិទ្យាស្ថាន Asian Institute of Chartered Bankers នៅទីក្រុងគូឡាឡាំពួរ ដើម្បីទទួលបានការទទួលស្គាល់ជាធនាគារិកអាជីព។ ក្រោយមក ពួកគេក៏អាចទទួលបានការទទួលស្គាល់ជាធនាគារិកដែលមានការទទួលស្គាល់នៅក្នុងចក្រភពអង់គ្លេសផងដែរ»។
លោកបន្តថាការឧបត្ថម្ភសម្រាប់ការសិក្សាផ្នែកធនាគាររបស់និយោជិត គឺជាកិច្ចសហការជាមួយធនាគារ Bank Negara Malaysia ដែលអនុវត្តដោយធនាគារសាធារណៈនៅម៉ាឡេស៊ីហើយឱកាសត្រូវបានពង្រីកដល់និយោជិតនៅកម្ពុជា៕