បរិយាប័ន្នហិរញ្ញវត្ថុ ត្រូវបានដាក់បញ្ចូលជាយុទ្ធសាស្ត្រគោលនយោបាយ ក្នុងការចូលរួមចំណែកអភិវឌ្ឍន៍សេដ្ឋកិច្ច និងសង្គមជាតិ ។ ធនាគារជាតិនៃកម្ពុជា បាន និងកំពុងរៀបចំសេចក្តីព្រាងយុទ្ធសាស្ត្រជាតិ ស្តីពីបរិយាប័ន្នហិរញ្ញវត្ថុ ដោយ បានកំណត់ គោលដៅក្នុង ការបង្កើនកម្រិតបរិយាប័ន្នហិរញ្ញវត្ថុផ្លូវការ ។ ដោយពិនិត្យឃើញពីតួនាទីយ៉ាង សំខាន់របស់ ស្ត្រីនៅក្នុង ការអភិវឌ្ឍសង្គម និង សេដ្ឋកិច្ច ពិសេសការចូលរួមយ៉ាងសកម្មក្នុងវិស័យហិរញ្ញវត្ថុ យុទ្ធសាស្ត្រ នេះនឹង លើកកម្ពស់បរិយាប័ន្នហិរញ្ញវត្ថុ និង ចំណេះដឹង ផ្នែកហិរញ្ញវត្ថុសម្រាប់ស្ត្រី ដោយ កំណត់គោល ដៅកាត់បន្ថយ អត្រាស្ត្រីដែលមិនទាន់ទទួលបានសេវាហិរញ្ញវត្ថុ ។
ស្របជាមួយគ្នានេះ ក្រសួងកិច្ចការនារី បាន និងកំពុងរៀបចំផែនការយុទ្ធសាស្ត្រនារីរតនៈទី ៥ (២០១៩-២០២៣) ក្នុងការលើកកម្ពស់សមភាពយេនឌ័រ និងបង្កើនភាពអង់អាចដល់ស្ត្រី ។ នៅក្នុងផែនការយុទ្ធសាស្ត្រនេះ ចំណុច អាទិភាពមួយ គឺការបង្កើនភាពអង់អាចផ្នែកសេដ្ឋកិច្ច និងការពង្រឹងសហគ្រិនភាពដល់ស្ត្រី រួមទាំងការបង្កើនលទ្ធភាព ក្នុងការទទួលបានសេវាហិរញ្ញវត្ថុសម្រាប់ស្ត្រី ក្នុងការអភិវឌ្ឍធុរៈកិច្ច និងសហគ្រាសរបស់ខ្លួន។
ធនាគារជាតិនៃកម្ពុជា និងក្រសួងកិច្ចការនារី នឹងសហការក្នុងភាពជាដៃគូ ក្នុងគោល បំណង ដើម្បីបញ្ជ្រាបចំណេះដឹងផ្នែកហិរញ្ញវត្ថុដល់សហគ្រិនស្ត្រី ។ ធនាគារជាតិនៃកម្ពុជានិងក្រសួងកិច្ចការនារី បានយល់ព្រមចុះហត្ថលេខា លើអនុស្សរណៈយោគយល់គ្នានេះ ដើម្បី កំណត់ យន្តការ និងភារកិច្ចនៅក្នុងកិច្ចសហប្រតិបត្តិការ លើកកម្ពស់បរិយាប័ន្នហិរញ្ញវត្ថុ និងចំណេះដឹងហិរញ្ញវត្ថុរបស់ស្ត្រី។
គោលបំណង៖ អនុស្សរណៈយោគយល់គ្នានេះ មានគោលបំណងបង្កើតក្របខ័ណ្ឌកិច្ចសហប្រតិបត្តិការក្នុងការលើក កម្ពស់ បរិយាប័ន្នហិរញ្ញវត្ថុសម្រាប់ស្ត្រី តាមរយៈការបញ្ជ្រាបចំណេះដឹងផ្នែកហិរញ្ញវត្ថុដល់ស្ត្រី និង សហគ្រិនជាស្ត្រី ។
គោលដៅ៖ អនុស្សរណៈយោគយល់គ្នានេះ មានគោលដៅពង្រឹង និងពង្រីកចំណេះដឹង ផ្នែកហិរញ្ញវត្ថុសម្រាប់ស្ត្រី ដើម្បី ឈាន ទៅ អភិវឌ្ឍន៍សហគ្រិនជាស្ត្រី ក្នុងគោលដៅចូលរួមចំណែកបង្កើនផលិតភាព និងប្រសិទ្ធភាព ក្នុងការអភិវឌ្ឍសេដ្ឋកិច្ច និង សង្គម ជាតិ។
កិច្ចសហប្រតិបត្តិការ៖ ធនាគារជាតិនៃកម្ពុជា និងក្រសួងកិច្ចការនារី យល់ព្រមសហការគ្នាដើម្បី លើកកម្ពស់បរិយាប័ន្នហិរញ្ញវត្ថុសម្រាប់ស្ត្រី តាមរយៈការបញ្ជ្រាបចំណេះដឹងផ្នែកហិរញ្ញវត្ថុ និងសម្របសម្រួលការទទួលបានសេវាកម្មហិរញ្ញវត្ថុដល់សហគ្រិនស្ត្រីនៅថ្នាក់មូលដ្ឋាន យុវតី ឬក្រុមស្ត្រី។
អនុស្សរណៈយោគយល់រវាងធនាគារជាតិនៃកម្ពុជានិងក្រសួងអប់រំយុវជននិងកីឡាស្តីពីការដាក់បញ្ចូលចំណេះដឹងហិរញ្ញវត្ថុទៅក្នុងកម្មវិធីសិក្សាចំណេះដឹងទូទៅ ចំណេះដឹងហិរញ្ញវត្ថុគឺជាកត្តាគន្លឹះមួយក្នុងការអភិវឌ្ឍវិស័យហិរញ្ញវត្ថុប្រកបដោយចីរភាពនិង និរន្តរភាព ដើម្បី រួម ចំណែកដល់ការអភិវឌ្ឍជីវភាពរស់នៅនិងសេដ្ឋកិច្ចជាតិ។ ដោយឃើញពីសារៈសំខាន់នេះ សម្តេចអគ្គ មហា សេនា បតី តេជោ ហ៊ុន សែន បានស្នើឱ្យធនាគារជាតិនៃកម្ពុជាសហការជាមួយក្រសួងពាក់ព័ន្ធ ជាពិសេស ក្រសួងអប់រំ យុវជន និងកីឡា ដោយដាក់បញ្ចូលនូវចំណេះដឹងហិរញ្ញវត្ថុទៅក្នុងកម្មវិធីសិក្សា ចំណេះទូទៅរបស់ ក្រសួងអប់រំ យុវជន និងកីឡា។
ដូចគ្នានេះដែរ យុទ្ធសាស្ត្រអភិវឌ្ឍន៍វិស័យហិរញ្ញវត្ថុឆ្នាំ ២០១៦-២០២៥ ក៏បានកំណត់ឱ្យ ស្ថាប័នពាក់ព័ន្ធ នៃរាជរដ្ឋាភិបាលរៀបចំឲ្យមានកម្មវិធីលើកកម្ពស់ចំណេះដឹង ផ្នែកហិរញ្ញវត្ថុ ដើម្បីបញ្ជ្រាបការយល់ ដឹងទៅដល់ សាធារណ ជនទូទៅ ជាពិសេសការរៀបចំកម្មវិធីសិក្សាទូទៅ របស់ប្រព័ន្ធអប់រំជាតិ។
យោងអនុសាសន៍ដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន និងយុទ្ធសាស្ត្រ និងផែន ការអនាគត ដែលមានចែងនៅក្នុងយុទ្ធសាស្ត្រអភិវឌ្ឍន៍វិស័យហិរញ្ញវត្ថុឆ្នាំ ២០១៦-២០២៥ ធនាគារជាតិ នៃកម្ពុជា បានសហការ ជាមួយនឹងក្រសួងអប់រំ យុវជន និងកីឡា ដោយបានរៀបចំផែនការសកម្មភាពក្នុងការ អនុវត្ត គម្រោង ដាក់បញ្ចូល ចំណេះដឹង ផ្នែកហិរញ្ញវត្ថុ ទៅក្នុងកម្មវិធីសិក្សាចំណេះទូទៅរបស់ក្រសួងអប់រំ យុវជន និងកីឡា។ ជាមួយ គ្នានេះផងដែរ ធនាគារ ជាតិនៃកម្ពុជានិងក្រសួងអប់រំ យុវជន និងកីឡាបានយល់ព្រមចុះ អនុស្សរណៈនៃការយោគយល់ ដើម្បីកំណត់ នូវភារ កិច្ចនិងវិធាននៃកិច្ចសហប្រតិបត្តិការថ្នាក់ជាតិលើការលើក កម្ពស់ ចំណេះដឹង ផ្នែកហិរញ្ញវត្ថុ។
គោលបំណង៖ អនុស្សរណៈនៃការយោគយល់នេះមានគោលបំណងបង្កើតក្របខណ្ឌកិច្ចសហប្រតិបត្តិការ ដើម្បី ការបញ្ជ្រាបចំណេះដឹងផ្នែកហិរញ្ញវត្ថុទៅក្នុងកម្មវិធីសិក្សាចំណេះទូទៅនិងលើកម្ពស់ចំណេះដឹងហិរញ្ញវត្ថុ តាមរយៈវិស័យអប់រំ យុវជន និងកីឡា។
គោលដៅ៖ អនុស្សរណៈនៃការយោគយល់នេះមានគោលដៅបញ្ជ្រាបការយល់ដឹងនិងអក្ខរកម្មហិរញ្ញវត្ថុទៅដល់សិស្សានុសិស្សនិងសាធារណជនទូទៅ ដើម្បីធានាឱ្យបាននូវការទទួលបាននិងប្រើប្រាស់សេវាហិរញ្ញវត្ថុ ប្រកបដោយប្រសិទ្ធិ ភាពនិងបរិយាប័ន្ន។
កិច្ចសហប្រតិបត្តិការ៖ ធនាគារជាតិនៃកម្ពុជានិងក្រសួងអប់រំ យុវជន និងកីឡា បានព្រមព្រៀងសហការបញ្ចូលចំណេះដឹង ផ្នែកហិរញ្ញវត្ថុ ទៅក្នុង កម្មវិធីសិក្សាចំណេះទូទៅរបស់ក្រសួងអប់រំ យុវជន និងកីឡា ចាប់តាំងពីថ្នាក់បឋមសិក្សា រហូតដល់មធ្យមសិក្សា។
នៅក្នុងកិច្ចសហការនេះ ធនាគារជាតិនៃកម្ពុជា មានមុខងារចម្បងក្នុងការរៀបចំកម្មវិធីសិក្សានិង សៀវភៅ សិក្សា ហិរញ្ញ វត្ថុ និងជួយបណ្ដុះបណ្ដាលគ្រូបង្គោលអំពីកម្មវិធីសិក្សាដែលខ្លួនបានរៀបចំឡើង។ ក្រសួងអប់រំ យុវជន និងកីឡា មានមុខងារ ចម្បងក្នុងការបញ្ចូលកម្មវិធីសិក្សាហិរញ្ញវត្ថុទៅក្នុងកម្មវិធីសិក្សា ចំណេះទូទៅ និងជួយ សហការ និង សម្រប សម្រួលការរៀបចំកម្មវិធីសិក្សានិងសៀវភៅសិក្សាហិរញ្ញវត្ថុ និង ការបណ្តុះបណ្ដាលគ្រូ៕