បន្ទាប់ពីមានឧបទ្ទវហេតុបាក់រលំអគារដែលកំពុងតែសាងសង់ ៧ ជាន់ នៅខេត្តព្រះស៊ីហនុ កាលពីខែមិថុនាកន្លងទៅដែលបណ្តាលឲ្យស្លាប់កម្មករ ២៨ នាក់ និងរងរបួស ២៦ នាក់ រាជរដ្ឋាភិបាល បានសម្រេចដូរតំណែងលោក យន្ត មីន អភិបាលខេត្តព្រះសីហនុ ទៅរដ្ឋលេខាធិការ នៃក្រសួងការពារជាតិ និងលោក ញឹម វណ្ណដា ត្រូវបានដកតំណែងពីអនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយទៅជាទីប្រឹក្សារាជរដ្ឋាភិបាលវិញ។
អ៊ីចឹងហើយបានជាប៉ុន្មានសប្តាហ៍ចុងក្រោយនេះ បានផ្អើលដល់ស្ថាប័នរាជរដ្ឋាភិបាលមួយចំនួន ហាក់បីដូចជាមានការភ្ញាក់រឭកខ្ពស់ ក្នុងការបង្ក្រាបបទល្មើសផ្សេងៗ និងអំពើពុករលួយជាក់ស្តែងជាច្រើនដូចជា កងរាជអាវុធហត្ថ បានចាប់ខ្លួនឧកញ៉ាៗឈ្មួញរកស៊ីកាប់ឈើ និងរឹបអូសយកឡាន និងឈើប្រណីត យកមកដុតបំផ្លាញចោលនៅនឹងកន្លែងចាប់បានតែម្តង។
អាជ្ញាធរបញ្ឈប់ការសាងសង់រោងចក្រ និងអគារគ្មានច្បាប់ទូទៅ អាជ្ញាធរបិទគ្លីនិកខុសច្បាប់ នៅខេត្តព្រះវិហារ មានមន្ដ្រីរដ្ឋបាលព្រៃឈើ ២ នាក់ និងមន្ត្រីបរិស្ថានម្នាក់ ខេត្តមណ្ឌលគិរី មន្ត្រីសុរិយោដីខេត្តពោធិ៍សាត់ ៣ រូប ពាក់ព័ន្ធអំពើពុករលួយមានទឹកប្រាក់ ១០ ម៉ឺនដុល្លារ ត្រូវបានចោទ និងឃុំខ្លួន និងការបង្រ្កាបទ្រង់ទ្រាយធំ ប្រយុទ្ធប្រឆាំងនឹងគ្រឿងញៀនទូទាំងប្រទេសនៅតែបន្ត។ សូម្បីតែសំរាមក្នុងកុងតឺន័រ ក៏មិនលើកលែងដែរ គឺតម្រូវឲ្យក្រុមហ៊ុនជុងយៀន ប្លាស្ទិក មេនូហ្វេកឈ័រ ដឹកយកចេញទៅប្រទេសដើមវិញ ហើយពិន័យជាប្រាក់ចំនួនជាង ១ ពាន់លានរៀល ។
ការចាត់វិធានការទ្រង់ទ្រាយធំបែបនេះ ធ្វើឲ្យសាធារណជន អបអរសាទរ ជាមួយនឹងកិច្ចខិតខំប្រឹងប្រែងរបស់ស្ថាប័នរាជរដ្ឋាភិបាល ហើយចង់ឃើញការបង្រ្កាបបែបនេះត្រូវធ្វើឡើងជាប្រចាំ កុំឲ្យធ្វើដូចតែមួយភ្លើងចំបើងនោះ។
ប៉ុន្តែអ្វីដែលគួរឲ្យសោកស្តាយនោះ គឺការចាប់រឹបអូសទ្រព្យសម្បត្តិពីជនល្មើសទាំងរថយន្ត ទាំងឈើយកមកដុតបំផ្លាញចោល ឬក៏ខ្លះចាប់យកឈើទុកចោល នៅការិយាល័យរដ្ឋបាលព្រៃឈើទាំងខេត្ត ទាំងស្រុក ទាំងខណ្ឌ ឃើញគំនរឈើខ្លឹម និងរថយន្តដែលចាប់បាននោះដាក់គរចោលយកស្នាដៃ ។
តែផ្ទុយទៅវិញ ការដុតចោល ការទុកគរចោល ទាំងឈើប្រណីត ទាំងរថយន្តបែបនេះ គួរតែត្រូវបានយកមកច្នៃធ្វើជាវត្ថុសប្បុរសធម៌ទៅវិញ ដូចជា ការច្នៃឈើខ្លឹមធ្វើសសរព្រះវិហារ ឬក៏កុដិព្រះសង្ឃនៅវត្តឬក៏យកទៅសាងសង់អគារសាលារៀន។ រីឯរថយន្តវិញ គឺយកទៅជួសជុលបន្តិចបន្តួច យកដាក់នៅមណ្ឌលសុខភាព ទុកសម្រាប់ធ្វើរថយន្តដឹកអ្នកជំងឺបញ្ជូនទៅមន្ទីរពេទ្យបង្អែកស្រុក ឬក៏ខេត្ត ដើម្បីឲ្យទាន់ពេលវេលា ជាពិសេសស្ត្រីឆ្លងទន្លេ និងករណីគ្រោះថ្នាក់ចរាចរណ៍ នៅក្បែរមណ្ឌលសុខភាព ក៏អាចជួយសង្គ្រោះជនរងគ្រោះបានទាន់ពេលវេលាផងដែរ។
តាមរយៈទិន្នន័របស់ក្រសួងសុខាភិបាលឆ្នាំ ២០១៨ នៅទូទាំងប្រទេស មានមណ្ឌលសុខភាពសរុបចំនួន ១២០៥ តែមណ្ឌលសុខភាពដែលមានរថយន្តសង្រ្គោះបន្ទាន់នោះ មានតិចតួចណាស់។ ហេតុដូច្នេះហើយ បើយករថយន្តដែលរឹបអូសបានពីការបង្ក្រាបបទល្មើសព្រៃឈីក្តី ពីការបង្រ្កាបបទល្មើសគ្រឿងញៀនក្តី ឬក៏ពីបទពុករលួយក្តី គួរតែរក្សាទុកឲ្យទៅជារបស់រដ្ឋ ហើយដាក់ជូនមណ្ឌលសុខភាពដែលមានតម្រូវការចាំបាច់ជាក់ស្តែង នៅទីជនបទឆ្ងាយៗ ពីទីប្រជុំជននោះ ។
ការដែលធ្វើដូចនេះគឺជួយសម្រាលបន្ទុករបស់គ្រូពេទ្យ ដែលជាបុគ្គលិកមណ្ឌលសុខភាព ជាជាងស្នើសុំថវិកាពីរដ្ឋទៅទិញរថយន្តសង្គ្រោះបន្ទាន់បែបនេះ កម្របានណាស់ ឬក៏ការស្នើសុំជំនួយពីថ្នាក់ដឹកនាំ ឬក៏កាកបាទក្រហមក៏តឹងតែងដែរ។ ជាងនេះទៅទៀត បើមានរថយន្តសម្រាប់បញ្ជូនអ្នកជំងឺនៅមណ្ឌលសុខភាពក៏អាចជួយទាក់ទាញអតិថិជនមកទទួលសេវាសុខភាពនៅមណ្ឌលសុខភាពផង និងការកសាងទំនុកចិត្តពីអតិថិជន ក្នុងការបម្រើសេវា ២៤ ម៉ោងរបស់មណ្ឌលផង។ យ៉ាងណាមិញលុយដែលរឹបអូសបានពីជនល្មើសក៏តម្រូវឲ្យមានតម្លាភាពផងដែរ ថាតើយកលុយចូលរដ្ឋវិញ ឬក៏មន្ត្រីចែកគ្នា?
លុយដែលរឹបអូសបានពីជនល្មើស ដែលតុលាការចេញសាលក្រមរួចហើយហ្នឹង គួរតែយកទៅបំពេញតម្រូវការចន្លោះប្រហោងដូចជា ការបោះពុម្ពវចនានុក្រុម ឬក៏សន្ទនានុក្រម ដែលក្រុមអ្នកស្រាវជ្រាវបង្កើតអក្សរសាស្រ្តខ្មែរ បង្កើតបានបណ្តើរៗហើយខ្វះថវិកាបោះពុម្ពជាសៀវភៅ គឺបានត្រឹមតែចែករំលែកគ្នាតាមសារអេឡិចត្រូនិកជាឯកសារ (softcopy) ឬក៏ឯកសារស្រាវជ្រាវ បកប្រែពីភាសាបរទេសរួចហើយ តែអត់លុយបោះពុម្ព។ ក្រៅពីនេះលុយទាំងនោះ អាចយកមកសាងសង់អគារជួយដល់កុមារអនាថា និងជនរងគ្រោះដោយសារការជួញដូរ ឬក៏រំលោភសេពសន្ថវៈជាដើម ៕
ចូលរួមផ្តល់យោបល់តាមរយៈ soprach.tong@phnompenhpost.com