ភ្នំពេញៈ អគារពាណិជ្ជកម្ម Exchange Square ដែលជាការវិនិយោគដោយក្រុមហ៊ុន Hongkong Land ក្នុងទឹកប្រាក់ ១០០ លានដុល្លារបានប្រកាសដាក់ឲ្យដំណើរការជាផ្លូវការកាលពីថ្ងៃព្រហស្បតិ៍ដោយរំពឹងថា ទីតាំងជួលក្នុងអគារនេះនឹងត្រូវបានជួលអស់ទាំងស្រុងនៅចុងឆ្នាំនេះ។ នេះបើតាមតំណាងក្រុមហ៊ុន។
អគារពាណិជ្ជកម្មដែលមានផ្ទៃក្រឡាសម្រាប់ធ្វើពាណិជ្ជកម្មសរុប ៣៩ ៧០០ ម៉ែត្រការ៉េ និងបានដំណើរការសាកល្បងកាលពីខែសីហាឆ្នាំមុនមានការិយាល័យធ្វើការ និងហាងលក់ទំនិញសរុប ៦០ នោះត្រូវបានជួលអស់ ៦០ ភាគរយហើយ។
តំណាងក្រុមហ៊ុន Hongkong Land បានរំពឹងថាទីតាំងជួលនឹងត្រូវបំពេញទាំងស្រុងនៅចុងឆ្នាំ ២០១៨ នេះ។
លោក Robert Wong ប្រធានប្រតិបត្តិក្រុមហ៊ុន Hong Kong Land បានថ្លែងកាលពីម្សិលមិញថា ការវិនិយោគលើអគារ Exchange Square បង្ហាញពីការប្ដេជ្ញាចិត្តដ៏រឹងមាំ និងទំនុកចិត្តពីក្រុមហ៊ុនរបស់លោកនៅលើទីផ្សារអចលនទ្រព្យនៅក្នុងទីក្រុងភ្នំពេញ។
លោកថ្លែងថា៖ «យើងជឿជាក់ថា អចលនទ្រព្យថ្នាក់ពិភពលោកនេះនឹងធ្វើឲ្យមានគុណភាពកម្រិតថ្មីក្នុងវិស័យសាងសង់ ការគ្រប់គ្រងអចលនទ្រព្យ និងសេវាបម្រើអតិថិជនដល់ទីផ្សារនេះ ហើយនិងធ្វើឲ្យមានការរួមចំណែកផ្លាស់ប្តូរការប្រកួតប្រជែងនៃទីក្រុងភ្នំពេញ»។
អគារ Exchange Square មានកម្ពស់ ១៦ ជាន់ និងមានជាន់ក្រោមដី ៤ ជាន់ដែលបម្រើជាទីតាំងចំណត។ ចាប់ពីជាន់ផ្ទាល់ដីដល់ជាន់ទី ៣ គឺជាទីតាំងភោជនីយដ្ឋាន ហាងកាហ្វេ ហាងលក់រាយ និងហាងអាជីវកម្មផ្សេងទៀត។
បច្ចុប្បន្ន អគារនេះត្រូវបានជួលឲ្យស្ថាប័នអន្តរជាតិសំខាន់ៗ ដូចជាក្រុមហ៊ុនធានារ៉ាប់រងអាយុជីវិត AIA (Cambodia) ធនាគារ CIMB Bank សាជីវកម្មហិរញ្ញវត្ថុអន្តរជាតិ (IFC) ធនាគារ World Bank Group និងហាងលក់អាហារ និងភេសជ្ជៈ និងហាងលក់រាយល្បីៗមួយចំនួនផ្សេងទៀត។
លោក ប៉ែន សុផល រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់បានថ្លែងកាលពីម្សិលមិញថាប្រតិបត្តិការអគារ Exchange Square នឹងរួមចំណែកក្នុងការលើកកម្ពស់ស្ដង់ដារក្នុងទីផ្សារអចលនទ្រព្យក្នុងប្រទេសកម្ពុជា។
លោកថ្លែងថា៖ «កំណើនអចលនទ្រព្យ និងសំណង់ពិតជាបានបង្កើតផលជាវិជ្ជមាន និងរួមចំណែកយ៉ាងល្អប្រសើរសម្រាប់សេដ្ឋកិច្ចកម្ពុជា»៕LA