.jpg)
ក្រុងប្រ៊ុចសែលៈ សហភាពអឺរ៉ុបកាលពីថ្ងៃពុធបានវាយប្រហារក្រុមហ៊ុន Google ជាមួយការផាកពិន័យច្រើនបំផុតមិនធ្លាប់មានចំនួន ៤,៣៤ ពាន់លានអឺរ៉ូ (៥ ពាន់លានដុល្លារ) ពីបទរំលោភបំពានលើការគ្រប់គ្រងដោយខុសច្បាប់នៃប្រព័ន្ធប្រតិបត្តិការរបស់ខ្លួនសម្រាប់ឧបករណ៍ចល័ត។
ទីក្រុងប្រ៊ុចសែលបានចោទប្រកាន់ក្រុមហ៊ុន Google ពីបទប្រើប្រាស់ការគ្រប់គ្រងស្ទើរទាំងអស់របស់ប្រព័ន្ធ Android លើទូរស័ព្ទចល័ត និងថេប្ល៊ិត ដើម្បីផ្សព្វផ្សាយការប្រើប្រាស់ម៉ាស៊ីនស្វែងរក Google ផ្ទាល់របស់ក្រុមហ៊ុនខ្លួន និងរារាំងដៃគូប្រកួតប្រជែង។
ការសម្រេចចិត្តនេះធ្វើឡើងបន្ទាប់ពីការស៊ើបអង្កេតរយៈពេល ៣ ឆ្នាំ។
លោកស្រី Margrethe Vestager ស្នងការការប្រកួតប្រជែង EU បានថ្លែងថា៖ «ក្រុមហ៊ុន Google ជាប់ពាក់ព័ន្ធនឹងការអនុវត្តដោយខុសច្បាប់ ដើម្បីពង្រឹងតួនាទីទីផ្សារដ៏លើសលប់របស់ខ្លួនក្នុងការស្វែងរកតាមអ៊ីនធឺណិត»។
លោកស្រី Vestager បានបញ្ជាឲ្យក្រុមហ៊ុន Google ត្រូវ «បញ្ចប់ដោយប្រសិទ្ធភាពនូវការអនុវត្តនេះក្នុងរយៈពេល ៩០ ថ្ងៃ បើមិនអ៊ីចឹងទេប្រឈមនឹងការបង់ប្រាក់ពិន័យ» ដែលមានចំនួនរហូតដល់ ៥ ភាគរយនៃផលរបរ (turnover) ប្រចាំថ្ងៃជាមធ្យមរបស់ខ្លួន។
Google ផ្ដល់ប្រព័ន្ធ Android មិនគិតថ្លែដល់ក្រុមហ៊ុនផលិតស្មាតហ្វូន ហើយការរកប្រាក់ចំណូលភាគច្រើនរបស់ខ្លួនបានពីការលក់ការផ្សព្វផ្សាយពាណិជ្ជកម្មដែលលេចឡើងស្របជាមួយនឹងលទ្ធផលស្វែងរកពីគេហទំព័រនេះ។
លោកស្រី Vestager បានថ្លែងថាក្រុមហ៊ុន Google បានរារាំងដៃគូប្រកួតប្រជែងដោយបង្ខំឲ្យក្រុមហ៊ុនផលិតទូរស័ព្ទស្មាតហ្វូនធំ រួមទាំងក្រុមហ៊ុន Samsung និងក្រុមហ៊ុន Huawei ដំឡើងជាមុននូវម៉ាស៊ីនស្វែងរករបស់ខ្លួន និងគេហទំព័រស្វែងរក Google Chrome៕ LA
