ភ្នំពេញៈ លោក Jong Weon Ha អនុប្រធានក្រុមហ៊ុនផ្សារមូលបត្រកម្ពុជា បានឱ្យដឹងថា ការផ្ទុះឡើងនៃការឆ្លងកូវីដ ១៩ ក្នុងសហគមន៍លើកទី៣ នៅពេលនេះដែលហៅថា «ព្រឹត្តិការណ៍សហគមន៍ ២០ កុម្ភៈ» មិនធ្វើឱ្យប៉ះពាល់អវិជ្ជមានលើតម្លៃភាគហ៊ុននោះទេ។
លោកនាយករដ្ឋមន្ដ្រី ហ៊ុន សែន កាលពីថ្ងៃទី ២០ ខែកុម្ភៈ បានប្រកាសពីការផ្ទុះឡើងការឆ្លងជំងឺកូវីដ ១៩ ក្នុងសហគមន៍ជាលើកទី៣ បន្ទាប់ពីមនុស្ស ៣២ នាក់ បានធ្វើតេស្ដវិជ្ជមានក្នុងរយៈពេលជាង ១០ ម៉ោងតែប៉ុណ្ណោះ។ នៅថ្ងៃទី ២៤ ខែកុម្ភៈ ក្រសួងសុខាភិបាលបានរាយការណ៍ពីករណីរកឃើញការឆ្លងជំងឺកូវីដ ១៩ ចំនួន ៤០ នាក់បន្ថែមទៀត ដោយក្នុងនោះ ៣៨ នាក់ មានពាក់ព័ន្ធនឹងព្រឹត្តិការណ៍សហគមន៍ ២០ កុម្ភៈ។
លោក Jong Weon Ha បានឱ្យដឹងថា មានការជួញដូររយៈពេល ២ ថ្ងៃប៉ុណ្ណោះបន្ទាប់ពីព័ត៌មានថា មានការរីករាលដាលជំងឺកូវីដ ១៩ ជាចង្កោមផ្សេងទៀត។ មកដល់ពេលនេះតម្លៃភាគហ៊ុននៅ CSX នៅតែមានស្ថិរភាព និងមិនមានការប្រែប្រួលខ្លាំងនោះទេ។
លោកថ្លែងថា៖ «យើងនឹងត្រូវរង់ចាំមើលក្នុងរយៈពេលជាច្រើនថ្ងៃខាងមុខ។ ករណីវិជ្ជមានដែលរកឃើញថ្មីរហូតមកដល់ពេលនេះហាក់ដូចជាមិនមានផលប៉ះពាល់ខ្លាំងដល់ទីផ្សារភាគហ៊ុននៅឡើយទេ។ ទោះយ៉ាងណា បើនិន្នាការនេះបន្ត និងក្លាយជាមិនអាចគ្រប់គ្រងបានផលប៉ះពាល់នឹងកើតឡើងជាមិនខាន ដោយសារតែទីផ្សារភាគហ៊ុនមួយនេះវាឆ្លុះបញ្ចាំងសេដ្ឋកិច្ចរបស់ប្រទេសទាំងមូល និងគ្មានប្រទេសណាមួយដែលមានភាពស៊ាំ និងផលប៉ះពាល់ក្នុងអំឡុងពេលការរីករាលដាលបែបនោះទេ»។
លោកក៏បានបង្ហាញថា រហូតមកដល់ពេលនេះ ក៏មិនមានការធ្លាក់ចុះខ្លាំងនៃសកម្មភាពជួញដូរនៅទីផ្សារហ៊ុនទេ។
លោកថ្លែងថា៖ «យើងនៅមិនបានមើលឃើញសកម្មភាពជួញដូរមានការធ្លាក់ចុះទេ។ ម្យ៉ាងទៀត យើងក៏កំពុងរៀបចំ «ការប្រកួតប្រជែងការជួញដូរភាគហ៊ុន» ដែលមានបំណងបង្កើនការយល់ដឹងរបស់សាធារណជនលើទីផ្សារភាគហ៊ុន និងជំរុញឱ្យសាធារណជនយល់ដឹងអំពីការវិនិយោគលើភាគហ៊ុនផងដែរ»។
ទិន្នន័យរបស់ CSX បង្ហាញថា បច្ចុប្បន្នមានក្រុមហ៊ុន ១៣ ចុះបញ្ជីនៅក្នុងប្រទេសកម្ពុជាក្នុងចំណោមនោះ ក្រុមហ៊ុន ៧ ចុះបញ្ជីមូលបត្រកម្មសិទ្ធិ និង ៦ ផ្សេងទៀតជាសញ្ញាបណ្ណសាជីវកម្ម។ ក្រុមហ៊ុនទាំង ១៣ នេះបានប្រមូលមូលនិធិរួមគ្នាចំនួន ២៥៣ លានដុល្លារ គិតត្រឹមថ្ងៃទី ៣០ ខែកញ្ញា ឆ្នាំមុន និងសន្ទស្សន៍ភាគហ៊ុនបានកើនឡើង ៥៨,៣៧ ភាគរយកាលពីឆ្នាំ ២០១៩ ធៀបនឹងឆ្នាំ ២០១៨ ធ្លាក់មកនៅត្រឹម ១៤,៩៣ ភាគរយប៉ុណ្ណោះកាលពីឆ្នាំ ២០២០។
ទិន្នន័យជួញដូរបានពី CSX ការបិទការជួញដូរកាលពីម្សិលមិញ (ថ្ងៃទី ២៤) សន្ទស្សន៍ CSX បានកើន ០,៤១ ភាគរយចំនួន ៦៤១,៨៨ ពិន្ទុធៀបនឹងការបើកដំណើរការ ៦៣៩,២៨ ពិន្ទុ ក្នុងទំហំជួញដូរ ៥៥ ២៦៨ ភាគហ៊ុន ដែលមានតម្លៃ ១៣៩ ៧៩៣ ០០០ រៀល៕ LA