.jpg)
WhatsApp ពេលនេះអាចបញ្ជូនបន្តទៅអ្នកជជែកលេង ៥ នាក់ប៉ុណ្ណោះនៅពេលតែមួយ។ AFP
សាន ហ្រ្វានស៊ីស្កូៈ WhatsApp ដែលជាកម្មវិធីផ្ញើសារតាមឧបករណ៍ចល័តរបស់ក្រុមហ៊ុន Facebook បានប្រកាសកាលពីថ្ងៃចន្ទថា ខ្លួនកំពុងរឹតបន្ដឹងថា ការផ្ញើរសារដែលអាចបញ្ជូនបន្ត (Forward ) ជាកិច្ចខិតខំប្រឹងប្រែងមួយ ដើម្បីបង្កើនសិទ្ធិឯកជន និងសន្ដិសុខ។
កាលពីខែកក្កដា កម្មវិធី WhatsApp បានដាក់ចេញការការពារនៅក្នុងប្រទេស ឥណ្ឌា ដែលដាក់បញ្ចូលការកម្រិតចំនួនអ្នកប្រើប្រាស់ចំពោះអ្នកដែលអាចត្រូវបានបញ្ជូនសារបន្ត។ វិធានការនេះក៏បានផ្សព្វផ្សាយនៅលើទំព័រកាសែត ដើម្បីបង្កើនការយល់ដឹងអំពីព័ត៌មានក្លែងក្លាយផងដែរ។
សេចក្ដីសម្រេចនោះបានធ្វើឡើងបន្ទាប់ពីការគំរាមកំហែងដោយរដ្ឋាភិបាលរបស់ប្រទេស ឥណ្ឌា ថា នឹងចាត់វិធានការ បន្ទាប់ពីហ្វូងមនុស្សបានសម្លាប់មនុស្សជាង ២០ នាក់ ដែលត្រូវបានចោទប្រកាន់ពីបទចាប់ជំរិតក្មេង និងបទឧក្រិដ្ឋផ្សេងទៀត ដោយសារសារជាអក្សររបស់កម្មវិធី WhatsApp ដែលចែកចាយយ៉ាងទូលំទូលាយ។
WhatsApp បានឲ្យដឹងថា វិធានការចុងក្រោយរបស់ខ្លួនក្នុងការបន្តការរឹតបន្តឹងចំពោះអ្នកប្រើប្រាស់ទាំងអស់ បានធ្វើឡើងបន្ទាប់ពីការត្រួតពិនិត្យរយៈពេល ៦ ខែនៃការប្រតិកម្មតបរបស់អ្នកប្រើប្រាស់។
សេចក្ដីប្រកាសរបស់ក្រុមហ៊ុនអំពីការដំណើរការសាកល្បងនៃការកម្រិតការបញ្ជូនបន្តនេះបានបង្ហាញថា៖ «ការកម្រិតការបញ្ជូនបន្តនេះបានកាត់បន្ថយការបញ្ជូនសារបន្តខ្លាំងជុំវិញពិភពលោក»។
សេចក្ដីប្រកាសបានបន្តថា៖ «ការចាប់ផ្ដើមនៅថ្ងៃនេះ អ្នកប្រើប្រាស់ទាំងអស់នៅលើកម្មវិធីចុងក្រោយរបស់ WhatsApp ពេលនេះអាចបញ្ជូនបន្តទៅអ្នកជជែកលេង ៥ នាក់ប៉ុណ្ណោះនៅពេលតែមួយ ដែលនឹងជួយរក្សា WhatsApp ផ្ដោតលើការផ្ញើសារឯកជនជាមួយអ្នកមានទំនាក់ទំនងជិតស្និទ្ធ»។
ពីមុន អ្នកប្រើប្រាស់អាចបញ្ជូនបន្តរហូតដល់ ២០ ដងនៅលើកម្មវិធីនេះ៕ AFP/LA
