.jpg)
កម្ពុជា-ឥណ្ឌា ចុះអនុស្សរណៈនៃការយោគយល់គ្នា (MoU) បង្កើនកិច្ចសហប្រតិបត្តិការ ICT។ THE STATESMAN
ភ្នំពេញៈ ប្រទេស កម្ពុជា និងឥណ្ឌា កំពុងឈានឆ្ពោះទៅរកកិច្ចសហប្រតិបត្តិការក្នុងវិស័យបច្ចេកវិទ្យាព័ត៌មានវិទ្យា និងទូរគមនាគមន៍ (ICT) ដើម្បីសម្រេចបានគោលបំណងស្ថិរភាពរយៈពេលវែងនៅក្នុងវិស័យនេះ។ នេះបើតាមសេចក្ដីប្រកាសព័ត៌មានរបស់ស្ថានទូតឥណ្ឌាប្រចាំកម្ពុជា។
ក្នុងអំឡុងដំណើរទស្សនកិច្ច ២ ថ្ងៃរបស់គណៈប្រតិភូមកពីនាយកដ្ឋានទូរគមានគមន៍របស់ប្រទេស ឥណ្ឌា មកកម្ពុជាចាប់ពីថ្ងៃទី ១៨-១៩ ខែ មីនា ភាគីទាំង ២ បានសហការក្នុងទម្រង់នៃការចុះអនុស្សរណៈនៃការយោគយល់គ្នា (MoU) ក្រោមឆត្រ កម្ពុជា-ឥណ្ឌា ដែលនឹងអាចឲ្យមានការផ្លាស់ប្តូរសមត្ថភាពក្នុងការបំពេញភាពខ្លាំងទៅវិញទៅមក។ នេះបើយោងតាមសេចក្ដីប្រកាសព័ត៌មាននេះ។
MoU នេះដាក់បញ្ចូលវិសាលភាពដ៏ទូលំទូលាយបំផុតនៃកិច្ចសហប្រតិបត្តិការ ដូចជាគោលនយោបាយទូរគមនាគមន៍ ក្របខ័ណ្ឌគ្រប់គ្រង និងវិញ្ញាបនបត្រ កម្មវិធីទូរគមនាគមន៍ សម្រាប់ការគ្រប់គ្រងគ្រោះថ្នាក់ សន្ដិសុខអ៊ីនធឺណិត និងការឆ្លើយតបគ្រោះថ្នាក់ជាដើម។
សេចក្ដីប្រកាសព័ត៌មាននេះបង្ហាញថា MoU នេះនឹងជាឧបករណ៍ដ៏ទូលំទូលាយមួយ ក្នុងការឆ្លើយតបតាមតម្រូវការប្រជាជន របស់ប្រទេសទាំង ២ តាមរយៈគំនិតផ្ដួចផ្ដើម និងកិច្ចសហប្រតិបត្តិការផ្សេងៗ ដោយឈរលើមូលដ្ឋានរយៈពេលវែងក្នុងវិស័យនៃការអភិវឌ្ឍ ICT។
មជ្ឈមណ្ឌលអង្គការស្រាវជ្រាវ និងអភិវឌ្ឍន៍បឋមរបស់ប្រទេស ឥណ្ឌា សម្រាប់ការអភិវឌ្ឍទូរគមនាគមន៍ និងព័ត៌មានវិទ្យា (C-DoT) និងក្រុមហ៊ុនទូរគមនាគមន៍កម្ពុជា (TC) ក៏បានចុះហត្ថលេខាលើ MoU ដាច់ដោយឡែកស្ដីពីដំណោះស្រាយបច្ចេកវិទ្យាទូរគមនាគមន៍ដ៏រឹងមាំផងដែរ៕ LA
