.jpg)
លោកនាយករដ្ឋមន្ត្រី ហ៊ុន សែន ថ្លែងក្នុងកម្មវិធីពិព័រណ៍កាលពីថ្ងៃម្សិលមិញ។ រូបថត SPM
ភ្នំពេញៈ លោកនាយករដ្ឋមន្ដ្រី ហ៊ុន សែន កាលពីថ្ងៃអាទិត្យបានឲ្យដឹងថា ជាមួយនឹងស្ថិរភាពសង្គម នយោបាយល្អប្រសើរ និងកំណើនសេដ្ឋកិច្ចខ្ពស់ក្នុងរយៈពេល ២ ទសវត្សរ៍កន្លងមក ប្រទេសកម្ពុជានៅតែជាកន្លែងដ៏គួរឲ្យទាក់ទាញមួយសម្រាប់ការធ្វើអាជីវកម្ម និងការវិនិយោគ។
ថ្លែងនៅក្នុងការបើកពិព័រណ៍ទំនិញនាំចូល និងនាំចេញលើកទី ១៤ ឆ្នាំ ២០១៩ នៅមជ្ឈមណ្ឌលសន្និសីទកោះពេជ្រកាលពីថ្ងៃអាទិត្យលោក ហ៊ុន សែន បានឲ្យដឹងថា ពិព័រណ៍នេះកំពុងបង្ហាញយ៉ាងច្បាស់ដល់សាធារណជន និងប្រទេសផ្សេងៗឲ្យមើលឃើញបរិយាកាសអាជីវកម្ម និងការវិនិយោគ ស្ថិរភាពសង្គម និងនយោបាយល្អប្រសើររួមទាំងកំណើនសេដ្ឋកិច្ចខ្ពស់។ លោកបន្តថា ពិព័រណ៍នេះក៏ផ្ដល់ជាវេទិកាមួយផងដែរសម្រាប់ទាំងក្រុមហ៊ុន និងវិនិយោគិនក្នុងស្រុក និងបរទេស ដើម្បីផ្លាស់ប្តូរព័ត៌មាន និងស្វែងរកដៃគូ។
លោកមានប្រសាសន៍ថា៖ «ដើម្បីធានាបានម៉ាក្រូសេដ្ឋកិច្ចរឹងមាំ និងស្ថិរភាពនយោបាយ និងសង្គម រដ្ឋាភិបាលកម្ពុជាបើកចំហយ៉ាងខ្លាំងដល់ក្រុមវិនិយោគិនទាំងអស់ឲ្យមកធ្វើពាណិជ្ជកម្ម និងវិនិយោគនៅកម្ពុជា។ ជាមួយនឹងលំហូរចូលការវិនិយោគពីប្រទេសក្រៅ វាផ្ដល់ដល់យើងនូវទុន បច្ចេកវិទ្យាថ្មី ការបង្កើតការងារ ជំនាញ និងចំណេះដឹង បទពិសោធ ជំនាញសហគ្រិនភាព និងការពង្រីកមូលដ្ឋានផលិតកម្មក្នុងស្រុក»។
លោកបន្តថា៖ «នៅពេលនេះយើងកំពុងរៀបចំច្បាប់វិនិយោគថ្មី និងច្បាប់តំបន់សេដ្ឋកិច្ចពិសេសដែលនឹងកាន់តែបើកចំហខ្លាំង និងទូលំទូលាយបន្ថែមទៀត ដើម្បីទាក់ទាញការវិនិយោគកាន់តែច្រើន និងលំហូរចូលទុនបន្ថែមទៀត»។
ពិព័រណ៍ដែលមានស្ដង់ ៣៤២ នេះចាប់ផ្ដើមពីថ្ងៃទី ១៥ ដល់ថ្ងៃទី ១៨ នៅមជ្ឈមណ្ឌលសន្និសីទកោះពេជ្រ។ ពិព័រណ៍នេះមានការចូលរួមពីប្រទេសចិន ជប៉ុន ថៃ ឥណ្ឌូនេស៊ី ម៉ាឡេស៊ី មីយ៉ាន់ម៉ា វៀតណាម និងឡាវ និងក្រុមហ៊ុនក្នុងស្រុកជាច្រើន។
លោក ប៉ាន សូរស័ក្តិ រដ្ឋមន្ដ្រីក្រសួងពាណិជ្ជកម្មបានឲ្យដឹងថា ការបើកដំណើរការពិព័រណ៍នេះ គឺដើម្បីបម្រើជាវេទិកាអន្តរជាតិសម្រាប់ឆ្នាំនេះ ក្នុងគោលបំណងលើកកម្ពស់សកម្មភាពពាណិជ្ជកម្ម អាជីវកម្ម និងឱកាសវិនិយោគប្រកបដោយសក្ដានុពលព្រមទាំងដើម្បីបង្ហាញគោលនយោបាយរបស់រដ្ឋាភិបាលដែលគាំទ្រដល់វិស័យឯកជនផងដែរ។
លោកបន្តថា៖ «ជាមួយនឹងពិព័រណ៍ពាណិជ្ជកម្មនេះវាក៏បង្ហាញផងដែរនូវផលិតផលរបស់យើងមកពីតាមបណ្ដាខេត្តនានាដល់ប្រជាជនក្នុងស្រុករបស់យើង ព្រមទាំងផលិតផលនាំចេញរបស់យើង។ ជាមួយគ្នានេះដែរ ប្រជាជនរបស់យើងក៏នឹងមើលឃើញផលិតផលនាំចូលដែលមានគុណភាពខ្ពស់ផងដែរ»។
យោងតាមលោកនាយករដ្ឋមន្ដ្រីដោយមានកំណើនសេដ្ឋកិច្ចប្រកបដោយស្ថិរភាព ប្រទេសកម្ពុជាបានធ្វើសមាហរណកម្មយ៉ាងសកម្មទៅក្នុងតំបន់ និងពិភពលោក។
លោកមានប្រសាសន៍ថា៖ «យើងក៏បានលើកកម្ពស់សមត្ថភាពប្រកួតប្រជែងរបស់យើងលើគ្រប់វិស័យផងដែរ ជាពិសេសវិស័យពាណិជ្ជកម្មកំពុងរួមចំណែកយ៉ាងច្រើនដល់ការបង្កើតការងារដល់ប្រជាជន ព្រមទាំងរួមចំណែកដល់ការជំរុញកំណើនសេដ្ឋកិច្ចតាមរយៈការនាំចេញទំនិញ និងសេវាកម្មទៅកាន់ប្រទេស ១៤២ នៃសមាជិកអង្គការពាណិជ្ជកម្មពិភពលោក និងនាំចូលទាំងទំនិញ និងសេវាកម្មពីប្រទេស ១៣៥ ដើម្បីបំពេញតម្រូវការក្នុងស្រុកដែលជំរុញពាណិជ្ជកម្មទ្វេភាគីអន្តរជាតិដែលសម្រេចបានជាង ៣០ ពាន់លានដុល្លារកាលពីឆ្នាំ ២០១៨»។
លោកនាយករដ្ឋមន្ដ្រីបន្ថែមថា៖ «ខ្ញុំសង្ឃឹមថា ដោយមានពិព័រណ៍នេះពាណិជ្ជករ វិនិយោគិន នឹងយល់ និងរៀនសូត្រកាន់តែច្រើនអំពីឱកាសវិនិយោគ និងអាជីវកម្មនៅកម្ពុជាសម្រាប់ការស្វែងរកការវិនិយោគណាមួយ និងការធ្វើអាជីវកម្មនៅទីនេះ»៕ LA
