ភ្នំពេញ: កម្ពុជាគ្រោងនឹងដាក់ឲ្យដំណើរការថាមពលអគ្គិសនីទំហំ ២០០ មេហ្គាវ៉ាត់ ដែលទិញពីឡាវនៅដើមឆ្នាំ ២០២០ ដើម្បីបំពេញកង្វះថាមពលអគ្គិសនី ខណៈការអូសបណ្តាញនឹងបញ្ចប់នៅចុងឆ្នាំនេះ។ នេះបើតាមមន្ត្រីនាំពាក្យក្រសួងរ៉ែ និងថាមពល។
លោក វិចទ័រ ហ្សូនា អ្នកនាំពាក្យ និងជាអគ្គនាយកនៃអគ្គនាយកដ្ឋានថាមពល បានឲ្យដឹងថា ការតភ្ជាប់បណ្តាញអគ្គិសនីរបស់កម្ពុជាពីអនុស្ថានីយនៅខេត្តស្ទឹងត្រែងទៅព្រំដែនឡាវដែលមានប្រវែងជាង ៥០ គីឡូម៉ែត្រ សម្រេចបានជាង ៩០ ភាគរយ ហើយគិតមកដល់ពេលនេះ ខណៈការអូសបណ្តាញអគ្គិសនីពីប្រទេស ឡាវ មកព្រំដែនកម្ពុជាក៏ជិតរួចរាល់ផងដែរ។
លោកថ្លែងថា៖ «វាជិតរួចរាល់ហើយ យើងនៅតែសម្អាតព្រៃតាមដងផ្លូវ បង្គោលភ្លើង ក្រុមការងារបានបំពាក់ខ្សែភ្លើង និងឌីហ្សង់ទ័រ ចប់សព្វគ្រប់អស់ហើយ បើតាមផែនការភាគីទាំង ២ ត្រូវបញ្ចប់ការតភ្ជាប់បណ្តាញនៅក្នុងខែធ្នូខាងមុខនេះ»។
លោកបានបន្តថា ការតភ្ជាប់បណ្តាញអគ្គិសនីនេះដើម្បីទាញថាមពល ២០០ មេហ្គាវ៉ាត់ ពីវារីអគ្គិសនីដនសាហុងរបស់ឡាវដែលកម្ពុជា និងឡាវបានចុះកិច្ចព្រមព្រៀងទិញកាលពីអំឡុងខែមិថុនាឆ្នាំនេះ។ លោកបន្ថែមថា គម្រោងនេះអាចប្រតិបត្តិការឲ្យប្រើប្រាស់ថាមពលអគ្គិសនីជាលើកដំបូងនៅដើមឆ្នាំ ២០២០។
លោកថ្លែងថា៖ «យើងធ្វើយ៉ាងណាទាញថាមពលពីប្រភពផ្សេងៗតាមដែលអាចធ្វើទៅបាន ដើម្បីឆ្លើយតបសេចក្តីត្រូវការរបស់ប្រជាពលរដ្ឋ ព្រមទាំងតម្រូវការប្រើប្រាស់ពីផ្នែកឧស្សាហកម្ម និងសិប្បកម្មយើង»។
កាលពីថ្ងៃទី ៧ ខែវិច្ឆិកា លោកនាយករដ្ឋមន្ត្រី ហ៊ុន សែន បានប្រកាសថា កម្ពុជានឹងប្រឈមកង្វះអគ្គិសនីប្រើប្រាស់ជាថ្មីម្តងទៀតនារដូវប្រាំងខាងមុខនេះដោយសារប្រភពថាមពលបានពីវារីអគ្គិសនីត្រូវបានកាត់បន្ថយ៕LA