ក្រុងហ្សឺណែវៈ អង្គការសហប្រជាជាតិ បានឲ្យដឹងកាលពីថ្ងៃអង្គារថា ការដាក់ពាក្យសុំប៉ាតង់អន្តរជាតិទូទាំងពិភពលោកកាលពីឆ្នាំ ២០១៨ ជាងពាក់កណ្ដាល បានមកពីប្រទេសនៅតំបន់អាស៊ី ដែលនេះជាសញ្ញានៃការផ្លាស់ប្តូរនវានុវត្តន៍បន្ថែមទៀតពីខាងលិចទៅខាងកើត។
ក្នុងតួលេខប្រចាំឆ្នាំចុងក្រោយបំផុតនៃការដាក់ពាក្យសុំប៉ាតង់ ដែលបានចេញផ្សាយដោយអង្គការកម្មសិទ្ធិបញ្ញាពិភពលោក (WIPO) សហរដ្ឋអាមេរិកនៅតែជាប្រទេសដែលឈានមុខគេសម្រាប់ការដាក់ពាក្យសុំកាលពីឆ្នាំ ២០១៨។
ប៉ុន្តែដោយឈរលើមូលដ្ឋានគេឃើញថា ក្នុងតំបន់អាស៊ី បានបន្តការកើនឡើងជាលំដាប់។
លោក Francis Gurry អគ្គនាយករបស់ទីភ្នាក់ងារមួយនេះ បានឲ្យដឹងនៅក្នុងសេចក្ដីប្រកាសព័ត៌មានមួយថា៖ «នៅពេលនេះប្រទេសក្នុងទ្វីបអាស៊ី គឺជាអ្នកដាក់ពាក្យសុំប៉ាតង់អន្តរជាតិភាគច្រើន តាមរយៈ WIPO ដែលនេះគឺជារបត់ប្រវត្តិសាស្រ្តដ៏សំខាន់មួយសម្រាប់តំបន់ថាមពលសេដ្ឋកិច្ចមួយនេះ និងបានគូសបញ្ជាក់ពីការផ្លាស់ប្តូរភូមិសាស្ដ្រជាប្រវត្តិសាស្ដ្រនៃសកម្មភាពនវានុវត្តន៍ ពីខាងលិចទៅខាងកើត»។
ប្រព័ន្ធមានភាពស្មុគស្មាញរបស់ WIPO នៃការចុះបញ្ជិការប៉ាតង់អន្តរជាតិមានការពាក់ព័ន្ធនឹងផ្នែកជាច្រើន។
នៅក្នុងផ្នែកដ៏សំខាន់នេះសន្ធិសញ្ញាកិច្ចសហប្រតិបត្តិការប៉ាតង់ នេះ សហរដ្ឋអាមេរិកបាននាំមុខគេជាមួយនឹងពាក្យសុំចំនួន ៥៦- ១៤២ បន្ទាប់មកប្រទេស ចិន ដែលមានចំនួន ៥៣ ៣៤៥ និងប្រទេស ជប៉ុន មានចំនួន ៤៩- ៧០២ ប៉ាតង់។
ប្រទេស អាល្លឺម៉ង់ ជាប់ចំណាត់ថ្នាក់ទី៤ និងប្រទេស កូរ៉េខាងត្បូង ទី៥ ដោយប្រទេសនីមួយៗក្នុងចំណោមប្រទេសទាំង ២ នេះមានការដាក់ពាក្យសុំជាង ២០ ០០០ ប៉ាតង់។
ប្រទេសឥណ្ឌា បានចុះបញ្ជិការ នវានុវត្តន៍ឈានមុខគេកាលពីឆ្នាំមុន។ ការដាក់ពាក្យសុំប៉ាតង់ បានកើនឡើងជាង ២៧ ភាគរយ បើធៀបនឹងចំនួន ១ ៥៨៣ កាលពីឆ្នាំ ២០១៧ ដែលមានរហូតដល់ ២ ០១៣។
Huawei ជាក្រុមហ៊ុនទូរគមនាគមន៍ឈានមុខគេរបស់ចិន បានបង្កើតកំណត់ត្រាថ្មីសម្រាប់ចំនួនការដាក់ពាក្យសុំប៉ាតង់ក្នុងរយៈពេល ១ ឆ្នាំ មានចំនួន ៥ ៤០៥ ប៉ាតង់៕ AFP/LA