ភ្នំពេញៈ ប្រាក់ចំណូលសរុបរបស់កំពង់ផែស្វយ័តភ្នំពេញ (PPAP) ដែលចុះបញ្ជីក្នុងផ្សារហ៊ុនកម្ពុជា នៅក្នុងត្រីមាសទី ១ ឆ្នាំ ២០១៨ មានចំនួនជាង ៤,៧ លានដុល្លារ ដែលចំណូលភាគច្រើនបានមកពីសេវាលើកដាក់ទំនិញលើទីលាន (ជាង ១,៥ លានដុល្លារ) និង សេវាលើកដាក់ក្រោមដងយោងដែលមានជាង ១,៩ លានដុល្លារ។ នេះបើតាមរបាយការណ៍មិនទាន់ធ្វើសវនកម្មចេញផ្សាយលើផ្សារហ៊ុន នៅថ្ងៃនេះ។
របាយការណ៍បង្ហាញថា ចំណូលរបស់កំពង់ផែ សរុបបានមកពីប្រភពសេវាចំនួន ១៤ ។
របាយការណ៍បង្ហាញថា ចំណូលនៅខែមីនា ទទួលបាន ១,៦ លានដុល្លារ។ ទោះបីយ៉ាងនេះក្តីរបាយការណ៍មិនបានបង្ហាញតួលេខប្រៀបធៀបកាលពីឆ្នាំ ២០១៧ ទេ ប៉ុន្តែធ្លាក់ចុះបន្តិច បើធៀបនឹងត្រីមាសទី ៤ ឆ្នាំ ២០១៧ ដែលកំពង់ផែនេះរកចំណូលបានសរុប ៤,៨ លានដុល្លារ។
កំពង់ផែស្វយ័តភ្នំពេញ (PPAP) គឺជាក្រុមហ៊ុនគ្រប់គ្រងដោយរដ្ឋទីពីរដែលបានចុះបញ្ជីក្នុងផ្សារហ៊ុនកម្ពុជាដែលមិនសូវសកម្ម។
ភាគហ៊ុនរបស់កំពង់ផែស្វយ័តភ្នំពេញពុំមានការជួញដូរទេគិតត្រឹមម៉ោង ៣ រសៀលថ្ងៃនេះ និងបានរក្សាតម្លៃជួញដូរ ៥ ៣០០រៀលក្នុងមួយភាគហ៊ុន៕