ក្រុងដូហាៈ ក្រុមហ៊ុនអាកាសចរណ៍ Qatar Airways កាលពីថ្ងៃអង្គារបានបង្ហាញការខាតសុទ្ធចំនួនជាង ៦៩ លានដុល្លារក្នុងរយៈពេលមួយឆ្នាំដែលបញ្ចប់ត្រឹមខែមីនា ឆ្នាំ២០១៨ ដោយចោទប្រកាន់ថា ការខាតនេះបណ្តាលមកពី «ការបិទមិនឲ្យចេញចូលដោយខុសច្បាប់» ប្រឆាំងនឹងទីក្រុងដូហា ដោយប្រទេសមួយចំនួនដែលដឹកនាំដោយប្រទេសអារ៉ាប៊ីសាអ៊ូឌីត។
ក្រុមហ៊ុនអាកាសចរណ៍ជាតិរបស់ប្រទេសស្ថិតនៅឈូងសមុទ្រពែក្សមួយនេះ បានឲ្យដឹងថា ក្នុងរយៈពេលនោះគឺជា «ឆ្នាំដែលមានបញ្ហាប្រឈមបំផុតនៅក្នុងប្រវត្តិសាស្រ្ត ២០ ឆ្នាំរបស់ខ្លួន»។
ប្រទេសអារ៉ាប៊ីសាអ៊ូឌីត និងសម្ព័ន្ធមិត្តរបស់ខ្លួនបានកាត់ផ្តាច់ទំនាក់ទំនងការទូតជាមួយប្រទេសកាតាដែលសំបូរដោយឧស្ម័ន កាលពីថ្ងៃទី៥ ខែមិថុនា ឆ្នាំ២០១៧។
ប្រទេសទាំងនេះបានបិទការតភ្ជាប់ទំនាក់ទំនងផ្លូវគោក ផ្លូវសមុទ្រ និងផ្លូវអាកាស ជាមួយប្រទេសកាតា ដោយចោទប្រកាន់ប្រទេសនេះថាមានទំនងទំនងជាមួយប្រទេសអ៊ីរ៉ង់ដែលជាសត្រូវដ៏ធំរបស់ប្រទេសអារ៉ាប៊ីសាអ៊ូឌីត និងថាបានការគាំទ្រក្រុមអ៊ីស្លាមជ្រុលនិយម។
ប្រទេសកាតាបានបដិសេធការចោទប្រកាន់នេះ ដោយនិយាយថា បណ្តាប្រទេសជាគូប្រជែងក្នុងឈូងសមុទ្រពែក្សរបស់ខ្លួន កំពុងព្យាយាមក្តោបក្តាប់ការគ្រប់គ្រងគោលនយោបាយការបរទេសរបស់ទីក្រុងដូហា។
ក្នុងសេចក្តីថ្លែងការណ៍មួយ ក្រុមហ៊ុន Qatar Airways បានឲ្យដឹងថា ការបិទច្រកចេញចូលនេះបានប៉ះពាល់ដោយផ្ទាល់ទៅលើចំណូលរបស់ខ្លួន និងកាត់បន្ថយចំនួនជើងហោះហើរដែលចេញពីប្រទេសកាតាចំនួន ១៩ ភាគរយ។
ក្រុមហ៊ុនបានឲ្យដឹងទៀតថា ក្រុមយន្តហោះរបស់ខ្លួនត្រូវបង្ខំចិត្តហោះហើរទៅតាមផ្លូវវែងជាងមុន បង្កើនការចំណាយលើឥន្ធនៈច្រើនជាងមុន និងថែមទាំងលុបចោលការហោះហើររហូតដល់ ១៨ ទិសដៅ។
ក្រុមហ៊ុនអាកាសចរណ៍នេះបានបើកផ្លូវថ្មីចំនួន ១៤ ក្នុងរយៈកាលនោះ ប៉ុន្តែឲ្យដឹងថា ក្រុមហ៊ុនចំណាយច្រើនលើការចាប់ផ្តើមជើងហោះហើរថ្មីនេះ និងបានឲ្យដឹងថា ការបង្កើតវត្តមានថ្មីមួយនៅក្នុងទីផ្សារថ្មីនឹងត្រូវការពេលវេលា៕ AFP/PS