ភ្នំពេញៈ ការសាងសង់ផ្លូវល្បឿនលឿនដែលមានតម្លៃប្រមាណជាង ១,៩ ពាន់លានដុល្លារ ដែលបានបើកការដ្ឋានសាងសង់កាលពីចុងខែមីនា ឆ្នាំ ២០១៩ រហូតមកទល់ពេលនេះសម្រេចបានទៅតាមផែនការ ខណៈគម្រោងទាំងមូល គ្រោងនឹងបញ្ចប់នៅដើមឆ្នាំ ២០២៣ ខាងមុខ។ នេះបើយោងតាមអ្នកនាំពាក្យក្រសួងសាធារណការ និងដឹកជញ្ជូន។
ផ្លូវល្បឿនលឿនដែលតភ្ជាប់ពីភ្នំពេញទៅកាន់ខេត្តព្រះសីហនុ នេះមានប្រវែង ១៩០ គីឡូម៉ែត្រ វិនិយោគដោយក្រុមហ៊ុនសាជីវកម្មស្ពាន និងថ្នល់ចិន (CRBC) តាមរយៈក្រុមហ៊ុន Cambodian PPSHV Expressway Co., Ltd។
អ្នកនាំពាក្យក្រសួងសាធារណការ និងដឹកជញ្ជូនលោក វ៉ាស៊ឹម សុរិយា កាលពីថ្ងៃម្សិលមិញបាននិយាយថា ការសាងសង់ផ្លូវល្បឿនលឿនទី ១ នៅកម្ពុជាកំពុងដំណើរទៅមុខជាប្រចាំដោយចាប់ពីពេលបើកការដ្ឋានមកទល់ពេលនេះការសាងសង់ទើបសម្រេចបានប្រមាណជាង ៥ ភាគរយប៉ុណ្ណោះ។
លោកបន្តថា ដោយសារផ្លូវនេះជាច្រកសេដ្ឋកិច្ចដ៏សំខាន់ ហេតុនេះថ្នាក់ដឹកនាំក្រសួងសាធារណការតែងជំរុញឲ្យម្ចាស់ក្រុមហ៊ុនសាងសង់ត្រូវបញ្ចប់ការដ្ឋានតាមពេលកំណត់។ លោកថ្លែងថា៖ «យើងចង់ឲ្យសកម្មភាពសាងសង់បានលឿនជាងនេះ។ យើងសង្ឃឹមថា ការសាងសង់នឹងមានដំណើរលឿននៅពេលខាងមុខ គឺបន្ទាប់ពីក្រុមហ៊ុនសាងសង់គ្រឹះស្ពាន ផ្លូវ រោងជាង និងការិយាល័យក្រុមហ៊ុនរួចរាល់»។
ផ្លូវល្បឿនលឿននេះចេញពីសង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញដល់ភូមិទី ១ សង្កាត់លេខ ៣ ក្រុងព្រះសីហនុ ឆ្លងកាត់រាជធានីភ្នំពេញប្រវែង ៨,៣០ គីឡូម៉ែត្រ ខេត្តកណ្តាលប្រវែង ៩,១០ គីឡូម៉ែត្រ ខេត្តកំពង់ស្ពឺ ប្រវែង ៨០,៨០ គីឡូម៉ែត្រ ខេត្តកោះកុង ប្រវែង ១,៩២ គីឡូម៉ែត្រ និងខេត្តព្រះសីហនុ ប្រវែង ៨៩,៨៩ គីឡូម៉ែត្រ ។
លោក វ៉ី សំណាង អភិបាលខេត្តកំពង់ស្ពឺបាននិយាយថា សកម្មភាពនៃការសាងសង់ផ្លូវល្បឿនលឿនក្នុងទឹកដីខេត្តកំពង់ស្ពឺកំពុងដំណើរទៅមុខយ៉ាងសស្រោកសស្រាំ ដោយមានកម្មករធ្វើការទាំងយប់-ថ្ងៃ។ លោកបន្តថា ផ្លូវល្បឿនលឿននេះនឹងមានសក្តានុពលខ្លាំងសម្រាប់សេដ្ឋកិច្ចកម្ពុជា។ ផ្លូវនេះនឹងក្លាយជាចំណែកមួយដ៏ចម្បងក្នុងការបង្កើនភាពទាក់ទាញឲ្យបានការចូលមកបណ្តាក់ទុនក្នុងខេត្តកំពង់ស្ពឺផងដែរ។
លោកថ្លែងថា៖ «សកម្មភាពនៃការសាងសង់ផ្លូវល្បឿនលឿនក្នុងទឹកដីខេត្តកំពង់ស្ពឺកំពុងដំណើរការទៅមុខជាប្រចាំ។ ខ្ញុំបានទៅពិនិត្យជាញឹកញាប់ តែមិនបានជួបជាមួយក្រុមហ៊ុនដើម្បីសាកសួរពីដំណើរការសាងសង់បានប៉ុន្មានភាគរយនោះទេ»។
ជាមួយគ្នានេះលោកក៏ប្រាប់ដែរថា ការដោះស្រាយផលប៉ះពាល់ដីប្រជាជនពីគម្រោងនេះក៏កំពុងធ្វើជាប្រចាំដែរ ដោយមកដល់ពេលនេះនៅមានសល់បន្តិចបន្តួចប៉ុណ្ណោះ៕LA