ភ្នំពេញៈ ធនាគារ និងគ្រឹះស្ថានហិរញ្ញវត្ថុធំៗមួយចំនួនត្រូវបានរាយការណ៍ថា នឹងពង្រីកប្រតិបត្តិការរបស់ពួកគេ បន្ទាប់ពីដំណើរការម៉ាក្រូសេដ្ឋកិច្ចបានបង្ហាញពីភាពប្រសើរ និងរឹងមាំ។
លោក Igor Zimarev ប្រធានផ្នែក ទីផ្សារនៅធនាគារ ABA បានប្រាប់ភ្នំពេញប៉ុស្ដិ៍ថា ប្រតិបត្តិការរបស់ធនាគារនេះទទួលបានកំណើនដ៏រឹងមាំបំផុតនៅឆ្នាំនេះ ខណៈចំនួនអតិថិជនបានកើនឡើងជាប្រចាំក្នុងនោះឆ្នាំ ២០១៨ មានកំណើនជាង ៧៦ ភាគរយ ហើយចាប់ពីខែមករាដល់ដើមខែវិច្ឆិកា ឆ្នាំ ២០១៩ បានកើនឡើង ៧២ ភាគរយ។
លោក Igor ថ្លែងថា៖ «ដើម្បីគាំទ្រកំណើននោះ យើងបានបើកសាខា ១៥ កាលពីឆ្នាំ ២០១៨ និង ១១ សាខាបន្ថែមទៀតនៅឆ្នាំនេះ ដោយសាខាមួយចំនួននៅទីក្រុងភ្នំពេញ»។
លោកបន្តថា ការបើកសាខានេះបាននាំឲ្យមានការកើនឡើងប្រាក់បញ្ញើនៅឆ្នាំនេះដែលបានកើនឡើង ៥០ ភាគរយ (ជាង ១,១ ពាន់លានដុល្លារ)។
តាមលោក Igor ចំនួនកាតដែលបានចេញដោយធនាគារ ABA ក៏បានកើនឡើងយ៉ាងខ្លាំងផងដែរក្នុងនោះគ្រាន់តែឆ្នាំ ២០១៩ វាបានកើនឡើងពី ៣៨៩ ០០០ កាលពីខែមករាដល់ ៦៨៥ ០០០ កាលពីខែតុលា។
គិតត្រឹមថ្ងៃទី ១ ខែមករា ឆ្នាំ ២០១៩ ធនាគារ ABA មានម៉ាស៊ីនអេធីអឹម (ATM) ២៧៥ និងបានកើនមកដល់ ៣៥៧ គិតមកដល់ពេលនេះ។ នេះបើយោងតាម Igor។ លោកបន្តថា ធនាគារនឹងបន្ថែមទូ អេធីអឹម ៥០ បន្ថែមទៀតនៅឆ្នាំនេះ។
លោក Igor លើកឡើងថា៖ «យើងនឹងបន្តខិតខំឲ្យអស់ពីសមត្ថភាពក្នុងការបម្រើអតិថិជនដ៏មានតម្លៃរបស់យើង ហើយនឹងបន្តក្នុងការបង្កើនបណ្ដាញម៉ាស៊ីនអេធីអឹមរបស់យើងនៅក្នុងប្រទេសនេះ»។
លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដាក៏បានរាយការណ៍កំណើនអាជីវកម្មដ៏រឹងមាំនៅឆ្នាំនេះផងដែរ ហើយគ្រោងនឹងពង្រីកបន្ថែមទៀតនៅឆ្នាំនេះ។
លោកបន្តថា បច្ចុប្បន្នធនាគារអេស៊ីលីដា មានសាខា និងបណ្ដាញការិយាល័យ ២៦២ ទូទាំងប្រទេស។ លោកបានថ្លែងថា៖ «យើងមានហេដ្ឋារចនាសម្ព័ន្ធអេឡិចត្រូនិកជាមួយនឹងម៉ាស៊ីនអេធីអឹមជាង ៦០០ គ្រឿង ម៉ាស៊ីនឆូតកាតជាង ៤០០ គ្រឿង នៅទូទាំងប្រទេសរួមជាមួយនឹងធនាគារអ៊ីនធឺណិត។ ជាមួយគ្នានេះដែរ យើងក៏មានធនាគារឌីជីថលដោយបម្រើសេវាដោយខ្លួនឯង និងបច្ចេកវិទ្យាហិរញ្ញវត្ថុតាមរយៈកម្មវិធីទូរស័ព្ទចល័តផងដែរ»។
លោក សាយ សូនី អនុប្រធានគ្រឹះស្ថានមីក្រូហិរញ្ញវត្ថុប្រាសាក់ជាគ្រឹះស្ថានមួយក្នុងចំណោមគ្រឹះស្ថានឈានមុខគេជាច្រើនបានរាយការណ៍ថា សកម្មភាពអាជីវកម្មគ្រឹះស្ថានរបស់លោកកំពុងប្រតិបត្តិការយ៉ាងល្អដែលឆ្លុះបញ្ចាំងពីប្រតិបត្តិការសេដ្ឋកិច្ចដ៏ល្អរបស់ប្រទេស កម្ពុជា។
លោកថ្លែងថា៖ «ដោយសារសកម្មភាពអាជីវកម្មកំពុងដំណើរការល្អប្រសើរ និងគ្រឹះស្ថានហិរញ្ញវត្ថុក៏កំពុងដំណើរការល្អប្រសើរផងដែរ ដោយសារដំណើរការសេដ្ឋកិច្ចដ៏ល្អនៅឆ្នាំនេះ»។ លោកបន្ថែមថា បច្ចុប្បន្នប្រាសាក់មានម៉ាស៊ីនអេធីអឹម ១៣៤ គ្រឿង ទូទាំងប្រទេស។
របាយការណ៍ធនាគារជាតិនៃកម្ពុជាបង្ហាញថាគិតត្រឹមត្រីមាសទី ២ ឆ្នាំ ២០១៩ មានធនាគារពាណិជ្ជកម្ម ៤៥ ធនាគារឯកទេស ១៥ គ្រឹះស្ថានទទួលប្រាក់បញ្ញើមីក្រូហិរញ្ញវត្ថុ ៧ គ្រឹះស្ថានមីក្រូហិរញ្ញវត្ថុ ៧៤ ប្រតិបត្តិករឥណទានជនបទ ២៥៤ ក្រុមហ៊ុនជួល ១៥ និងក្រុមហ៊ុនផ្ដល់សេវាទូទាត់ ១៦៕LA