ក្រុងហ្សឺណែវៈ ក្រុមសេដ្ឋវិទូអង្គការសហប្រជាជាតិ (UN) បានឲ្យដឹងកាលពីថ្ងៃអង្គារថា ចក្រភពអង់គ្លេសអាចបាត់បង់រហូតដល់ ៣២ ពាន់លានដុល្លារក្នុង ១ ឆ្នាំក្នុងការនាំចេញទៅសហភាពអឺរ៉ុប ប្រសិនបើប្រទេសនេះបរាជ័យក្នុងការសម្រេចបានកិច្ចព្រមព្រៀងពាណិជ្ជកម្មមួយជាមួយប្លុកនេះ។
អង្គការសន្និសីទសហប្រជាជាតិទទួលបន្ទុកពាណិជ្ជកម្ម ការវិនិយោគ និងការអភិវឌ្ឍ (UNCTAD) បានឲ្យដឹងថា ការខាតបង់នេះនឹងស្មើនឹង ១៤ ភាគរយនៃការនាំចេញរបស់ចក្រភពអង់គ្លេសទៅអឺរ៉ុប។
អង្គការ UNCTAD ឲ្យដឹងថា ពាក់កណ្ដាលនៃការខាតបង់នេះនឹងកើតឡើងដោយសារពន្ធនាំចូលដែលអាចត្រូវដកហូតដោយភាគីទាំង ២ និងពាក់កណ្ដាលដោយសារវិធានការមិនមែនពន្ធនាំចូល ដែលប៉ះពាល់លើពាណិជ្ជកម្មដូចជាសុខាភិបាល និងបទប្បញ្ញត្តិបរិស្ថាន ឬស្ដង់ដាវេចខ្ចប់ជាដើម។
ការសិក្សាដោយអង្គការមានមូលដ្ឋាននៅទីក្រុងហ្សឺណែវមួយនេះបានឲ្យដឹងថា៖ «ការខាតបង់នេះនឹងប៉ះពាល់សំខាន់លើសេដ្ឋកិច្ចរបស់ចក្រភពអង់គ្លេស ខណៈដែលទីផ្សារ EU មានចំនួន ៤៦ ភាគរយនៃការនាំចេញរបស់ UK»។
ការសិក្សានេះក៏បានរកឃើញផងដែរនូវផលប៉ះពាល់អវិជ្ជមានសម្រាប់បណ្ដាប្រទេសជាសមាជិករបស់សហភាពអឺរ៉ុបមួយចំនួន។
ប្រទេសដែលរងផលប៉ះពាល់ខ្លាំងបំផុតនឹងជាប្រទេសអៀរឡង់ដែលអាចមើលឃើញការកាត់បន្ថយ ១០ ភាគរយក្នុងការនាំចេញរបស់ខ្លួនស្ថិតក្រោមសេណារីយោមិនមានកិច្ចព្រមព្រៀង។
ចក្រភពអង់គ្លេសបានចាកចេញពីសហភាពអឺរ៉ុបកាលពីខែមុន និងបានប្ដេជ្ញាថា នឹងសម្រេចបានកិច្ចព្រមព្រៀងមួយស្តីពីទំនាក់ទំនងពាណិជ្ជកម្មថ្មីជាមួយប្លុកនេះនៅត្រឹមចុងឆ្នាំនេះ ដោយលើកឡើងថា ខ្លួននឹងប្រកាន់យកទំនាក់ទំនងសេដ្ឋកិច្ចកាន់តែធូររលុង បើមិនមានកិច្ចព្រមព្រៀងនៅពេលនោះ។
ប៉ុន្តែការសិក្សារបស់អង្គការ UNCTAD បានរកឃើញថាសូម្បីកិច្ចព្រមព្រៀងពាណិជ្ជកម្ម «ស្ដង់ដា» មួយដូចជាកិច្ចព្រមព្រៀងដែលយកគំរូតាមកិច្ចព្រមព្រៀងសហភាពអឺរ៉ុប និងកាណាដាដែលគាំទ្រដោយលោកនាយករដ្ឋមន្ដ្រីអង់គ្លេស Boris Johnson ក្តី ក៏វានឹងនៅតែមើលឃើញការនាំចេញរបស់អង់គ្លេសទៅអឺរ៉ុបធ្លាក់ ៩ ភាគរយដែរ។
ការណ៍នេះគឺដោយសារថា កិច្ចព្រមព្រៀងពាណិជ្ជកម្មស្ដង់ដា ជាធម្មតាផ្ដោតការយកចិត្តទុកដាក់កាន់តែខ្លាំងលើការកាត់បន្ថយ ឬការលុបចោលពន្ធនាំចូលជាជាងវិធានការមិនមែនពន្ធនាំចូល៕ LA