.jpg)
ព័ត៌មានក្រាហ្វិកដែលបង្ហាញពីការប្រែប្រួលនៃតម្លៃប្រេងឆៅប្រចាំថ្ងៃនៅលើទីផ្សារអន្តរជាតិតាមខែនីមួយៗ គិតត្រឹមថ្ងៃទី២២ មិថុនា។ តាមក្រាហ្វិកតម្លៃប្រេងក្នុងខែមិថុនានេះបានបង្ហាញការកើនឡើង ហើយជម្លោះរវាងអាមេរិក និងអីុរ៉ង់ កំពុងជំរុញឲ្យតម្លៃប្រេងនៅលើពិភពលោកបាននិងកំពុងកើនឡើង៕ AFP
ហុងកុងៈ តម្លៃប្រេងបានបន្តកើនឡើងកាលពីថ្ងៃចន្ទ ដោយសារតែភាពតានតឹងរវាងអាមេរិក និងអ៊ុរ៉ង់កាន់តែខ្លាំងឡើង ដែលបានជំរុញឲ្យមានការបារម្ភផ្នែកផ្គត់ផ្គង់ ខណៈឈ្មួញភាគហ៊ុននៅអាស៊ីកំពុងសម្លឹងយ៉ាងប្រុងប្រយ័ត្ន លើកិច្ចប្រជុំដ៏ពិបាកមួយរវាងលោក ដូណាល់ ត្រាំ និងលោក ស៊ី ជិនភីង នៅសប្ដាហ៍នេះ។
តម្លៃនៅក្នុងកិច្ចសន្យារបស់ប្រេងឆៅសំខាន់ទាំង ២ កើនឡើងជិត ១០ ភាគរយ ដោយសារតែទីក្រុងតេអេរ៉ង់ កាលពីសប្ដាហ៍មុន បានបាញ់ទម្លាក់ «យន្តហោះគ្មានមនុស្សបើក» របស់អាមេរិក ដោយអះអាងពីការរំលោភដែនអាកាសរបស់ខ្លួន ដែលបង្កើនការបារម្ភអំពីជម្លោះរវាងសត្រូវចាស់ទាំង ២ នេះ។
កាលពីចុងសប្ដាហ៍លោក ត្រាំ បានឲ្យដឹងថា លោកនឹងដាក់ទណ្ឌកម្មថ្មីទៀតលើប្រទេស អ៊ុរ៉ង់ បន្ទាប់ពីហាមឃាត់បណ្ដាប្រទេសជាច្រើនទិញប្រេងរបស់អ៊ុរ៉ង់ ខណៈប្រព័ន្ធព័ត៌មានអាមេរិករាយការណ៍ថា ទីក្រុងវ៉ាស៊ីនតោនបានដាក់ឲ្យដំណើរការដោយសម្ងាត់ការវាយប្រហារអ៊ិនធឺណិតប្រឆាំងនឹងប្រព័ន្ធគ្រប់គ្រងមីស៊ីល និងបណ្ដាញចារកម្មអ៊ីរ៉ង់។
ភាគីទាំង ២ ឲ្យដឹងថា ពួកគេចង់គេចផុតពីសង្គ្រាម ប៉ុន្តែភាពតានតឹងបានកើនឡើងខ្លាំងដោយសារតែឧប្បតិ្តហេតុជាបន្តបន្ទាប់ ដែលរួមមានការបាញ់ទម្លាក់ដ្រូន និងការវាយប្រហារនៅពេលថ្មីៗលើនាវាដឹកប្រេង ដែលបង្កើនការបារម្ភអំពីការរុញច្រានឆ្ពោះទៅរកជម្លោះ។
ប្រធានាធិបតីអាមេរិកបានឲ្យដឹងថា លោកត្រៀមខ្លួនរួចហើយដើម្បីទាក់ទងប្រទេស អ៊ីរ៉ង់ ប្រសិនបើប្រទេសនេះបោះបង់អាវុធនុយក្លេអ៊ែរ។ លោកបន្ថែមថា បើក្រុមមេដឹកនាំបានធ្វើដូចនេះ «ខ្ញុំនឹងក្លាយជាមិត្តភកិ្ដដ៏ល្អបំផុត»។ ប៉ុន្តែប្រទេស អ៊ីរ៉ង់ បន្តបញ្ជាក់ពីកម្មវិធីអាតូមិករបស់ខ្លួនគឺសម្រាប់គោលបំណងស៊ីវិល។
តម្លៃប្រេងឆៅ Brent បានកើនឡើង ០,៣ ភាគរយ កាលពីថ្ងៃចន្ទ និងតម្លៃប្រេងឆៅ WTI កើនឡើង ០,៥ ភាគរយ។
លោក Stephen Innes ដៃគូគ្រប់គ្រងនៅក្រុមហ៊ុន Vanguard Markets បានថ្លែងថា៖ «ការកើនឡើងផ្នែកភូមិសាស្ដ្រនយោបាយនៅមជ្ឈិមបូព៌ា គឺពិតជាសញ្ញានៃការកើនឡើងរយៈពេលខ្លីសម្រាប់ទីផ្សារប្រេង»។ លោកបន្តថា៖ «ហើយការបារម្ភទាំងនេះកំពុងកើនឡើងគួរឲ្យកត់សម្គាល់»។
ការជាប់គាំង រួមជាមួយនឹងតម្លៃប្រាក់ដុល្លារចុះខ្សោយ ដោយសារធនាគារកណ្ដាលអាមេរិកផ្ដល់សញ្ញាពីការកាត់បន្ថយអត្រាការប្រាក់ បានជួយជំរុញតម្លៃមាសកើនដល់កម្រិតខ្ពស់រយៈពេល ៦ ឆ្នាំ ដល់ជាង ១ ៤០០ ដុល្លារ ដោយសារតែក្រុមឈ្មួញស្វែងរកទ្រព្យមានសុវត្ថិភាព ដើម្បីរក្សាសាច់ប្រាក់របស់ពួកគេ។
ទោះបីជាយ៉ាងណាក៏ដោយ ក៏ទីផ្សារភាគហ៊ុននៅតែមានក្ដីសង្ឃឹមថា លោក ត្រាំ និងលោក ស៊ី អាចបំបែកភាពជាប់គាំងនៃសង្គ្រាមពាណិជ្ជកម្មរបស់ពួកគេ នៅពេលពួកគេជួបគ្នានៅក្រៅជំនួបនៃកិច្ចប្រជុំកំពូលរបស់ក្រុមប្រទេស G20 នៅទីក្រុងអូសាកា ប្រទេស ជប៉ុន នៅសប្ដាហ៍នេះ។
តម្លៃភាគហ៊ុនពិភពលោកកំពុងកើនឡើង ចាប់តាំងពីលោក ត្រាំ បានកោតសរសើរការចរចាតាមទូរស័ព្ទដ៏វិជ្ជមាន កាលពីសប្ដាហ៍មុន និងបានឲ្យដឹងថា អ្នកទាំង ២ នឹងជួបគ្នាដោយផ្ទាល់នៅក្នុងប្រទេស ជប៉ុន ដែលជំរុញឲ្យមានក្ដីសង្ឃឹមនៃលទ្ធភាពបញ្ចប់សង្គ្រាមពន្ធនាំចូល។
នៅក្នុងការជួញដូរពេលព្រឹក តម្លៃផ្សារហ៊ុនហុងកុង បានកើនឡើង ០,៤ ភាគរយ ខណៈតម្លៃផ្សារហ៊ុនស៊ាងហៃ បានកើនឡើង ០,២ ភាគរយ និងផ្សារហ៊ុនតូក្យូបានបញ្ឈប់ការជួញដូរក្នុងតម្លៃកើនឡើង ០,១ ភាគរយ។
តម្លៃផ្សារហ៊ុនសេអ៊ូល តម្លៃផ្សារហ៊ុនវែលីងតុន និងតម្លៃផ្សារហ៊ុនម៉ានីល ផ្សារហ៊ុនទាំងអស់នេះកើនឡើង ០,២ ភាគរយ ទោះបីជាផ្សារហ៊ុនស៊ីដនី ផ្សារហ៊ុនសិង្ហបុរី ផ្សារហ៊ុនតៃប៉ិ និងផ្សារហ៊ុនហ្សាការតា បានខាតបង់ក៏ដោយ។
ប្រាក់ដុល្លារបន្តប្រឈមនឹងសម្ពាធពីធនាគារកណ្ដាល ដែលនឹងបន្ទាបអត្រាការប្រាក់ក្នុងពេលឆាប់ៗនៅខែកក្កដា ដោយសារតែធនាគារនេះស្វែងរកច្រកចេញពីផលប៉ះពាល់នៃជម្លោះពាណិជ្ជកម្ម និងដោយសារតែសេដ្ឋកិច្ចអាមេរិកបង្ហាញសញ្ញានៃការចុះខ្សោយ។
តម្លៃប្រាក់ដុល្លារអាមេរិកបានធ្លាក់ចុះធៀបនឹងរូបិយប័ណ្ណដៃគូសំខាន់ៗរបស់ខ្លួន ជាមួយនឹងប្រាក់ដុល្លារអូស្ដ្រាលី និងប្រាក់វ៉ុនរបស់កូរ៉េខាងត្បូង កើនឡើង ០,៤ ភាគរយ។
តម្លៃប្រាក់លីរ៉ា របស់តួកគី បានកើនឡើង ០,៨ ភាគរយ បន្ទាប់ពីបេក្ខជនគណបក្សប្រឆាំងនៅក្នុងការបោះឆ្នោតចៅហ្វាយក្រុងដ៏ចម្រូងចម្រាសឈរឈ្មោះជាថ្មីម្ដងទៀត ឈ្នះគណបក្សកំពុងកាន់អំណាចរបស់ប្រធានាធិបតី Recep Tayyip Erdogan។
តម្លៃរូបិយប័ណ្ណឌីជីថល Bitcoin បានកើនឡើងប្រហែល ២០ ភាគរយ គ្រាន់តែនៅខែនេះ ប៉ុន្តែគឺនៅតែប្រសើរជាងកម្រិតកំណត់ត្រាជិត ២០ ០០០ ដុល្លារ ដែលបានមើលឃើញកាលពីចុងឆ្នាំ ២០១៧៕ AFP/LA
