ក្រុងវ៉ាស៊ីនតោនៈ ក្រុមមន្ដ្រីប្រតិបត្តិជាន់ខ្ពស់ក្នុងក្រុមហ៊ុនធំៗរបស់អាមេរិកជាច្រើនទទួលបានប្រាក់បៀវត្សរ៍ច្រើនជាងនិយោជិតរបស់ក្រុមហ៊ុនរបស់ពួកគេចំនួន ២៧៨ ដង ហើយគម្លាតនេះបន្តរីកកាន់តែធំ។ នេះបើយោងតាមការសិក្សាមួយដែលចេញផ្សាយកាលពីថ្ងៃពុធ។
ការសិក្សាមួយចេញផ្សាយដោយវិទ្យាស្ថានគោលនយោបាយសេដ្ឋកិច្ច (EPI) បានឲ្យដឹងថា ប្រាក់ដែលត្រូវបង់ទៅឲ្យប្រធាននាយកប្រតិបត្តិ (CEO) ជាមធ្យមក្នុងក្រុមហ៊ុនធំៗរបស់អាមេរិកចំនួន ៣៥០ ក្រុមហ៊ុនកាលពីឆ្នាំ ២០១៨ មានចំនួន ១៧,២ លានដុល្លារក្នុង ១ ឆ្នាំរួមទាំង ជម្រើសភាគហ៊ុនដែលជាទូទៅមានចំនួន ២ ភាគ ៣ នៃកញ្ចប់ទូទាត់របស់ពួកគេ។
គម្លាតទូទាត់សម្រាប់ CEO និងបុគ្គលិក-កម្មករកើនពី ៥៨ ដងនៅឆ្នាំ ១៩៨៩ និង ២០ ដងនៅឆ្នាំ ១៩៦៥។ នេះបើតាមក្រុមប្រឹក្សាយោបល់ EPI ដែលផ្ដោតការយកចិត្តទុកដាក់លើបញ្ហាប្រឈមរបស់បុគ្គលិក-កម្មករមានប្រាក់ចំណូលទាប និងមធ្យម។
ចាប់ពីឆ្នាំ ១៩៧៨ ដល់ឆ្នាំ ២០១៨ កញ្ចប់ទូទាត់សម្រាប់ CEO បានកើនជាង ១០០០ ភាគរយជាមួយនឹងរង្វាន់ជាភាគហ៊ុនកាន់តែច្រើនឡើងៗ ខណៈដែលប្រាក់ខែបុគ្គលិក-កម្មករបានកើនឡើងក្រោម ១២ ភាគរយ។
ការសិក្សានេះបានឲ្យដឹងថា៖ «ការកើនឡើងប្រាក់កញ្ចប់ទូទាត់សម្រាប់ CEO និងប្រាក់កញ្ចប់ទូទាត់សម្រាប់មន្ដ្រីប្រតិបត្តិជាទូទៅបានជំរុញឲ្យកំណើនប្រាក់ចំណូល ១ ភាគរយ និង ០,១ ភាគរយរៀងគ្នាដែលបណ្ដាលឲ្យការទទួលបានផ្លែផ្កាកាន់តែតិចនៃកំណើនសេដ្ឋកិច្ចសម្រាប់កម្មករធម្មតា និងបង្កឲ្យមានកំណើនគម្លាតរវាងអ្នកមានប្រាក់ចំណូលខ្ពស់បំផុត និងទាបបំផុត»។ ការសិក្សានេះបន្តថា៖ «សេដ្ឋកិច្ចនឹងមិនទទួលរងផលប៉ះពាល់នោះទេ ប្រសិនបើ CEO ទទួលបានប្រាក់ខែកាន់តែតិច (ឬបង់ពន្ធកាន់តែច្រើន) នោះ»។
ការសិក្សានេះបានរកឃើញទៀតថា ការកើនឡើងប្រាក់ខែ «មិនឆ្លុះបញ្ចាំងពីការកើនឡើងតម្លៃជំនាញនោះទេ ប៉ុន្តែជាការប្រើប្រាស់របស់ CEO នូវអំណាចរបស់ពួកគេក្នុងការកំណត់ប្រាក់ខែផ្ទាល់ខ្លួនរបស់ពួកគេ។ ហើយអំណាចដែលកើនឡើងនៅថ្នាក់គ្រប់គ្រងថ្នាក់ខ្ពស់នេះកំពុង និងជំរុញឲ្យមានកំណើនវិសមភាពនៅក្នុងប្រទេសរបស់យើង»៕ LA