.jpg)
លោក ត្រាំ និងលោក ស៊ី ក្នុងជំនួបក្នុងទីក្រុងប៉េកាំង កាលពីខែវិច្ឆិកា ឆ្នាំ២០១៧។ រូបថត AFP
ក្រុងវ៉ាស៊ីនតោនៈ មន្ដ្រីជាន់ខ្ពស់អាមេរិកមួយរូបបានឲ្យដឹងកាលពីថ្ងៃអង្គារថា លោកប្រធានាធិបតីអាមេរិក ដូណាល់ ត្រាំ និងលោកប្រធានាធិបតីចិន ស៊ី ជីនភីង នឹងពិភាក្សាអំពីពាណិជ្ជកម្មនៅក្រៅជំនួបនៃកិច្ចប្រជុំកំពូលក្រុមប្រទេសមានសេដ្ឋកិច្ចរីកចម្រើនទាំង ២០ (G-20) នៅប្រទេសអាហ្សង់ទីននៅខែនេះ។
លោក Larry Kudlow ទីប្រឹក្សាសេដ្ឋកិច្ចជាន់ខ្ពស់នៅសេតវិមានបានឲ្យដឹងថា កិច្ចខិតខំប្រឹងប្រែងកម្រិតខ្ពស់នានា នឹងបន្តដោះស្រាយបញ្ហាសង្គ្រាមពាណិជ្ជកម្មអាមេរិក និងចិន និងបន្ទាប់ពីមានការទូរស័ព្ទទាក់ទងគ្នារបស់លោក ត្រាំ ទៅលោក ស៊ី នៅពេលថ្មីៗនេះ។
លោក Kudlow បានប្រាប់ទីភ្នាក់ងារព័ត៌មាន CNBC ថា៖ «នៅពេលនេះយើងកំពុងទាក់ទងនៅគ្រប់កម្រិតទាំងអស់របស់អាមេរិក និងរដ្ឋាភិបាលចិន»។
លោកមានប្រសាសន៍ថា៖ «នៅពេលនេះយើងដឹងថា តាមពិតយើងនឹងពិភាក្សាពាណិជ្ជកម្មនៅក្នុងកិច្ចប្រជុំ G-20 នៅក្នុងប្រទេសអាហ្សង់ទីន។ យើងមិនបានដឹងបញ្ហានោះពីមុនទេ ប៉ុន្តែវាច្បាស់លាស់»។
លោក ត្រាំ គ្រោងនឹងទៅដល់ទីក្រុងប៊ុយណូស៊ែ នៅថ្ងៃទី ២៩ ខែ វិច្ឆិកា សម្រាប់កិច្ចប្រជុំកំពូល G-20 ដែលនឹងផ្ដល់ឱកាសដល់រូបលោកសម្រាប់កិច្ចប្រជុំទល់មុខគ្នា ដើម្បីកាត់បន្ថយភាពតានតឹងផ្នែកពាណិជ្ជកម្ម។
ក្រុមហ៊ុនរបស់អាមេរិកធំៗជាច្រើនបានឲ្យដឹងថា ពួកគេកំពុងបង្កើនតម្លៃ និងប្រឈមការចំណាយកាន់តែខ្ពស់ ដោយសារតែសង្គ្រាមពាណិជ្ជកម្ម ដែលទីក្រុងវ៉ាស៊ីនតោន បានហូតពន្ធលើទំនិញនាំចូលពីប្រទេសចិនក្នុងតម្លៃជាង ២៥០ ពាន់លានដុល្លារ ។ ប្រទេសចិនបានវាយបកវិញជាមួយនឹងពន្ធនាំចូលលើទំនិញអាមេរិកក្នុងតម្លៃ ១១០ ពាន់លានដុល្លារ។
អត្រាពន្ធលើការនាំចូល ២០០ ពាន់លានដុល្លារ គ្រោងនឹងបង្កើនពី ១០ ភាគរយនៅពេលបច្ចុប្បន្នដល់ ២៥ ភាគរយធៀប ហើយលោក ត្រាំ គំរាមកំហែងថា នឹងហូតពន្ធនាំចូលបន្ថែមលើទំនិញរបស់ប្រទេសចិនក្នុងតម្លៃ ២៦៧ ពាន់លានដុល្លារផ្សេងទៀត៕ AFP/LA
