.jpg)
បុគ្គលិកកំពុងដើរនៅរង្វង់មូលតោ ២ ក្នុងខេត្តព្រះសីហនុ។ ខេត្តតំបន់ឆ្នេររបស់កម្ពុជាមួយនេះត្រូវបានរកឃើញ វីរុសកូរ៉ូណាប្រភេទថ្មីកាលពីថ្ងៃចន្ទ។ ហេង ជីវ័ន
ភ្នំពេញៈ អ្នកនៅក្នុងវិស័យទេសចរណ៍ និងមន្ត្រីបានបង្ហាញការបារម្ភយ៉ាងខ្លាំងចំពោះការផ្ទុះ វីរុសកូរ៉ូណាប្រភេទថ្មីថានឹងប៉ះពាល់ដល់ឧស្សាហកម្មទេសចរណ៍របស់កម្ពុជា ដែលទាក់ទាញភាគច្រើនចិន បន្ទាប់ពីកម្ពុជាបានរកឃើញករណី វីរុសកូរ៉ូណា ប្រភេទថ្មីលើកដំបូងនៅខេត្តព្រះសីហនុ។
កាលពីល្ងាចថ្ងៃចន្ទលោក ម៉ម ប៊ុនហេង រដ្ឋមន្ដ្រីក្រសួងសុខាភិបាល បានបញ្ជាក់ពីករណីវីរុសនេះនៅលើភ្ញៀវទេសចរជនជាតិចិន អាយុ ៦០ ឆ្នាំ ម្នាក់នៅក្រុងព្រះសីហនុដែលបានធ្វើដំណើរមកពីទីក្រុងវូហានដែលជាទីតាំងផ្ទុះវីរុសនេះមុនគេ។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបានឲ្យដឹងថា ព័ត៌មានពីការរកឃើញវត្តមាននៃ វីរុស កូរ៉ូណា ប្រភេទថ្មីនៅខេត្តព្រះសីហនុលើជនជាតិចិនកំពុងធ្វើឲ្យប៉ះពាល់យ៉ាងខ្លាំងដល់វិស័យទេសចរណ៍កម្ពុជា ពិសេសកន្លែងដែលមានវត្តមានជនជាតិចិនច្រើន។
លោកស្រីថ្លែងថា៖ «ខ្ញុំពិតជាមានការព្រួយបារម្ភ ព្រោះវិស័យទេសចរណ៍មិនត្រឹមតែបង្កើតការងារជាច្រើនសម្រាប់ប្រជាជនខ្មែរប៉ុណ្ណោះទេ តែវាក៏ជាចំណែកដ៏សំខាន់ក្នុងការជំរុញកំណើនសេដ្ឋកិច្ចកម្ពុជាផងដែរ»។
លោកស្រីលើកឡើងថា ករណីនេះក៏កំពុងធ្វើឲ្យការកក់ដំណើរទេសចរណ៍ និងសេវាកម្មទាក់ទងទេសចរណ៍នៅកម្ពុជាធ្លាក់ចុះច្រើនដែរ។ លោកស្រីបញ្ជាក់ថា៖ «យើងទទួលបានព័ត៌មានពីការលុបដំណើរទេសចរណ៍ពីប្រទេសចិន និងប្រទេសផ្សេងៗទៀតជាច្រើននៅពេលនេះ។ ជាមួយនេះការធ្វើដំណើរទេសចរណ៍ក្នុងស្រុកក៏អាចធ្លាក់ចុះផងដែរ»។
លោក តាំង សុចិត្រគ្រឹះស្នា ប្រធានមន្ទីរទេសចរណ៍ខេត្តព្រះសីហនុបានឲ្យដឹងថា ចំនួនភ្ញៀវទេសចរជនជាតិចិនដែលធ្វើដំណើរមកខេត្តព្រះសីហនុបានធ្លាក់ចុះជាបន្តបន្ទាប់ចាប់តាំងពីរដ្ឋាភិបាលកម្ពុជាប្រកាសបញ្ឈប់ល្បែងអនឡាញមក ហេតុនេះការរកឃើញវត្តមានជំងឺនេះនឹងមិនសូវមានផលប៉ះពាល់ធ្ងន់ធ្ងរទេ។ លោកបន្តថា បច្ចុប្បន្នអាជ្ញាធរក៏បាននិងកំពុងខិតខំក្នុងការទប់ស្កាត់ការរីករាលដាល និងធ្វើការផ្សព្វផ្សាយទៅសាធារណជន។
លោក តុប សុភ័ក អ្នកនាំពាក្យក្រសួងទេសចរណ៍បាននិយាយថា ការរកឃើញវត្តមានជំងឺផ្តាសាយបានក្លាយជាចំណែកមួយដែលអាចធ្វើឲ្យចំនួនភ្ញៀវទេសចរអន្តរជាតិមកទស្សនាកម្ពុជាថយចុះ តែទន្ទឹមនឹងនេះក្រសួងទេសចរណ៍ក៏បានដាក់ចេញនូវយន្តការបន្ទាន់មួយចំនួនដើម្បីរក្សានិរន្តរភាពសម្រាប់អ្នកប្រកបរបរក្នុងវិស័យទេសចរណ៍ក៏ដូចជាផ្ទះសំណាក់ និងសណ្ឋាគារជាដើម។
លោកថ្លែងថា៖ «យន្តការដំបូងដែលយើងត្រូវធ្វើនៅពេលនេះគឺជំរុញចរន្តទេសចរណ៍ក្នុងស្រុក ដើម្បីធ្វើយ៉ាងណាឲ្យមូលដ្ឋានអាជីវកម្មក្នុងវិស័យទេសចរណ៍អាចដំណើរទៅមុខជាបន្តទៀតបាន»។
ដើម្បីទប់ស្កាត់ការរីករាលដាលនៃជំងឺរលាកផ្លូវដង្ហើមនេះបច្ចុប្បន្នកម្ពុជាបានដាក់ម៉ាស៊ីនត្រួតពិនិត្យសុខភាពជាច្រើននៅតាមព្រលានយន្តហោះ និងច្រកព្រំដែនអន្តរជាតិសំខាន់ៗ។
លោក ខែក នរិន្ទដា នាយកផ្នែកទំនាក់ទំនងសាធារណៈនៅក្រុមហ៊ុន Cambodia Airports បានឲ្យដឹងថា មានជើងហោះហើរ ៣ ប៉ុណ្ណោះរវាងទីក្រុង វូហាន និងសៀមរាប (៣ ដងប្រចាំសប្ដាហ៍) និង វូហាន និងក្រុងព្រះសីហនុ (៣ ប្រចាំសប្ដាហ៍) ត្រូវបានផ្អាក ខណៈជើងហោះហើរមកពីទិសដៅផ្សេងៗរបស់ប្រទេសចិនមកកម្ពុជា នៅតែកំពុងប្រតិបត្តិការ។
លោកបានបន្តថា៖ «ផ្អែកលើបទពិសោធកន្លងមករបស់យើង ក្នុងអំឡុងការផ្ទុះជំងឺ SARS នឹងមានផលប៉ះពាល់អវិជ្ជមានលើចរាចរណ៍នៅក្នុងព្រលានយន្តហោះអន្តរជាតិទាំង ៣ នេះ ប៉ុន្តែវានៅតែលឿនពេកមិនអាចវាយតម្លៃពីកម្រិតរបស់វាបានទេ»។
ទិន្នន័យពីក្រសួងទេសចរណ៍ចេញផ្សាយកាលពីល្ងាចថ្ងៃអង្គារបង្ហាញថា ក្នុងរយៈពេល ១១ ខែឆ្នាំ ២០១៩ កម្ពុជាទទួលបានភ្ញៀវទេសចរបរទេសសរុប ៥,៨៩ លាននាក់ កើនឡើង ៨,៣ ភាគរយ បើធៀបនឹងរយៈពេលដូចគ្នាកាលពីឆ្នាំ ២០១៨។ ភ្ញៀវទេសចរចិនបាននាំមុខគេ ដោយមានចំនួន ២,១៨ លាននាក់ កើនឡើង ១៩,៥ ភាគរយ បើធៀបនឹងរយៈពេលដូចគ្នាកាលពីឆ្នាំ ២០១៨ ខណៈភ្ញៀវជនជាតិវៀតណាមស្ថិតនៅលេខ ២ មានចំនួន ៨០៩ ១៧០ នាក់ ក្នុងកំណើន ១៥,២ ភាគរយ៕LA
