ក្រុងស៊ាងហៃៈ ទីក្រុងស៊ាងហៃបានចុះហត្ថលេខាលើគម្រោងវិនិយោគបរទេសចំនួន ៤២ កាលពីថ្ងៃចន្ទជាមួយនឹងទឹកប្រាក់វិនិយោគសរុប ៧,៧ ពាន់លានដុល្លារអាមេរិក។
ក្រុមហ៊ុនអាមេរិក Cargill ដែលជាក្រុមហ៊ុនផ្គត់ផ្គង់ផលិតផលអាហារ កសិកម្ម ហិរញ្ញវត្ថុ ផលិតផលឧស្សាហកម្មបានប្រកាសបង្កើនមូលធន ១០០ លានដុល្លារ ដើម្បីពង្រីកការិយាល័យកណ្ដាលអាស៊ីប៉ាស៊ីហ្វិករបស់ខ្លួននៅទីក្រុងស៊ាងហៃ។
លោក Robert Aspell ប្រធានទទួលបន្ទុកនៅតំបន់អាស៊ីប៉ាស៊ីហ្វិករបស់ក្រុមហ៊ុន Cargill បានឲ្យដឹងនៅក្នុងពិធីចុះហត្ថលេខាកាលពីថ្ងៃចន្ទថា ប្រទេស ចិន នៅតែជាប្រទេស «ដែលយើងមានឱកាសទទួលបានកំណើនខ្លាំងបំផុត»។
ក្រៅពីនេះក៏មានការវិនិយោគពីក្រុមហ៊ុន BASF របស់អាល្លឺមង់ផងដែរ ដោយបានប្រកាសវិនិយោគ ៣២ លានដុល្លារ ដើម្បីបង្កើតក្រុមហ៊ុនពាណិជ្ជកម្មអន្តរជាតិមួយនៅតំបន់ពាណិជ្ជកម្មសេរីក្រុងស៊ាងហៃ ដែលផ្ដោតការយកចិត្តទុកដាក់លើការនាំចូល និងការនាំចេញ និងពាណិជ្ជកម្មនៅក្រៅប្រទេស។
គម្រោងវិនិយោគបរទេស ៤២ ដែលបានចុះហត្ថលេខាកាលពីថ្ងៃចន្ទបានជាប់ពាក់ព័ន្ធនឹងផលិតកម្មឆ្លាតវៃ ជីវឱសថ សារធាតុគីមី បន្ទះសៀគ្វី ថាមពលថ្មី សម្ភារថ្មី ពាណិជ្ជកម្ម និងហិរញ្ញវត្ថុ។
ស្ថិតិបានពីគណៈកម្មការពាណិជ្ជកម្មសាលាក្រុងស៊ាងហៃបង្ហាញថា ចាប់ពីខែមករាដល់ខែសីហាក្នុងឆ្នាំនេះចំនួនគម្រោងវិនិយោគបរទេសថ្មីបានកើនឡើង ៤៧,៨ ភាគរយ ធៀបនឹងរយៈពេលដូចគ្នាកាលពីឆ្នាំមុន៕ People''s Daily/LA